Ti ƀuôn Mlăng, să Ea Tar, kdriêk Čư̆ Mgar, čar Dak Lak ăt thâo sơăi Y-Hoăt Niê (kreh iêo jing Aê Trân), kyua ñu jing pô mâo kơhưm hlăm krĭng mnuih djuê ƀiă. Hluê ngă hdră mkŏ mkra krĭng ƀuôn sang mrâo, ñu nao truh kơ grăp gŏ sang mtrŭt mjhar mnuih ƀuôn sang amâo lŏ phưi tha ŭn êmô, amâo lŏ rông êmô kbao ŭn mnŭ ti gŭ krum sang, čiăng rơ̆ng klei doh kơ gŏ sang leh anăn ƀuôn êlan. Klei blŭ mơ̆ng ñu mâo mnuih ƀuôn sang mđing hmư̆, đăo knang leh anăn hluê ngă.

“Jing sa čô mâo kơhưm hlăm ƀuôn, kâo nao hrăm mbĭt hŏng mnuih ƀuôn sang grăp blư̆ mâo klei čiăng. Mtô lač kơ mnuih ƀuôn sang răng mgang klei êđăp ênang hlăm ƀuôn sang, mnuih ƀuôn sang, hđeh êdam êra bi dôk dơ̆ng ƀơ̆ng huă jăk hŏng hdơ̆ng pô, kreh kriăm mă bruă knuă, găn hgao dŭm klei dleh dlan hlăm klei hdĭp. Sĭt kâo mâo klei hriăm, kâo srăng lŏ hưn mmta hŏng grăp čô hlăm ƀuôn čiăng bi mâo klei hdĭp jăk siam hĭn”.

Phung mâo klei đăo knang hlăm êpul êya mnuih Êđê mâo nanao klei thâo săng, pô srăng mâo nanao klei nao êlâo čiăng kơ mnuih ƀuôn sang hluê ngă, hrăm mbĭt bi mguôp mkŏ mjing ƀuôn sang trei mđao, yâo mơak. H’Ngọc Êban (kreh iêo aduôn Trăm), êlâo dih jing k’iăng khua bruă Đảng să Čư̆ Suê, kdriêk Čư̆ mgar, čar Dak Lak. Leh wĭt mdei bruă, ñu wĭt hdĭp ti ƀuôn Sŭt Mđưng, să Čư̆ Suê, leh anăn mâo mnuih ƀuôn sang đăo knang jing pô mâo Kơhưm. Asei Aduôn Trăm pô leh anăn gŏ sang mâo nanao klei bi hmô hluê ngă djăp hdră mtrŭn, hdră êlan mơ̆ng Đảng, knŭk kna leh anăn jing anôk knang kơ mnuih ƀuôn sang ti ƀuôn Sŭt Mđưng.

“Kâo mtă nanao kơ mnuih ƀuôn sang ƀuôn pô gĭr mtă mtăn kơ anak čô mă bruă knuă, hriăm hră mơar truh kơ jih, amâo mâo hmư̆ klei arăng mplư. Anak čô hriăm hră thâo, amĭ ama kreh kriăng mă bruă knuă, klei hdĭp trei mđao. Drei amâo mâo ngăn dŏ brei kơ anak čô drei srăng rơ̆ng klei hdĭp, knhuah hdĭp jăk čiăng kơ ana čô pô mâo klei hơĭt hriăm hră mơar, đei dih mâo bruă knuă mă tŭ dưn kơ yang ƀuôn”.

            Đru mguôp kơ klei mđĭ kyar bruă duh mkra ala ƀuôn, rơ̆ng klei êđăp ênang bruă kđi čar, klei êđăp ênang yang ƀuôn ti alŭ wăl leh anăn jing kmeh gơ̆ng “Blŭ mnuih ƀuôn sang hmư̆, ngă bruă mnuih ƀuôn sang hluê ngă”, “phung mâo kơhưm” ăt đru mguôp prŏn hlăm bruă kriê pioh, ba lar knhuah gru dhar kreh djuê ana. Hlăm dŭm thŭn êgao, Y-Đheh Ayŭn, kreh iêo jing Aê Bình, jing pô mâo kơhưm ti Buôn Phơng, să Ea Tul, kdriêk Čư̆ Mgar, čar Dak Lak hur har iêo mthưr mnuih ƀuôn sang hlăm ƀuôn djă pioh dŭm klei bhiăn yuôm bhăn hlăm êpul êya yang ƀuôn, bruă pơ̆k mñam, djă pioh 14 sang krum ti ƀuôn, djă pioh 4 kdrăp čing, giăm 30 pô thâo mbruă tông čing, krah rup, mtô mjuăt kơ ênuk êdei anăp…

“Mnuih ƀuôn sang ti să Ea Tul ăt dôk djă pioh knhuah dhar kreh djuê ana pô. Hmei hâo hưn nanao kơ ƀuôn sang čiăng kriê pioh knhuah dhar kreh djuê ana. Tal 2 jing mâo Đảng, knŭk kna đru brei ngăn prăk kyuanăn dưi lŏ djăp pioh knuah dhar kreh djuê ana pô. Tơdah drei bi luč hĕ knhuah dhar kreh djuê ana pô jing klei ênguôt ưn êdi.”

H’Yâo Knul – Khua êpul bruă djuê ana čar Dak Lak brei thâo, kluôm čar ară anei mâo 942 čô mâo kơhưm. Êpul êya phung kơhưm hlăm mnuih djuê ƀiă, hlăm anăn mâo mnuih Êđê năng mâo klei pah mni. Phung mâo kơhưm amâo mâo uên kơ klei dleh dlan, nao djăp kdjiêt khŏk ƀăng grăp sang, djă kngan grăp čô, mtrŭt mjhar mnuih ƀuôn sang mkă bruă knuă, hlăm lui klei ư̆ êpa, bi hrŏ klei sƀun ƀin, lui leh dŭm klei bhiăn kdhul mluk, kriê pioh knhuah dhar kreh djuê ana, ñu kma hŏng yang ƀuôn.

“Bi hŏng klei đĭ kyar mơ̆ng krĭng mnuih djuê ƀiă ti čar Dak Lak leh anăn wăt hlăm ala čar, mâo klei đru mguôp prŏng mơ̆ng phung mâo kơhưm jing êpul êya kmeh gơ̆ng, kdrông mkŏ mơ̆ng Đảng, bruă sang čư êa hŏng mnuih ƀuôn sang. Hlăm dŭm thŭn êgao, phung mâo kơhưm dưi bi lar bruă klam pô hlăm êpul êya yang ƀuôn leh anăn dưi bi djăp ênŭm klei hmăng hmưi mơ̆ng Đảng leh anăn knŭk kna.

Dưi lač klă, phung mâo kơhưm hlăm krĭng mnuih djuê ƀiă ti čar Dak Lak mâo nao klei bi hmô nao êlâo hlăm klei bi lông, bi ktưn khăp kơ ala čar, dŭm klei mtrŭt mjhar, jing kdrông mkŏ plah wah bruă sang čư êa leh anăn mnuih ƀuôn sang. Klă sĭt brei ƀuh, phung kơhưm bi êdah leh bruă klam yuôm bhăn hlăm bruă hâo hưn, mtrŭt mjhar hluê ngă djŏ hdră êlan, hdră mtrŭn mơ̆ng Đảng, klei bhiăn ala čar, dŭm hdră bruă, hdră êlan mđĭ kyar bruă duh mkra ala ƀuôn, rơ̆ng kơ klei êđăp ênang ti alŭ wăl.