Dlăng sang dôk mkra dơ̆ng leh, H ‘Win Byă (khăng iêô jing Amĭ Bŏ), ti să Drai Săp, kdriêk Krông Ana, čar Dak Lak, brei thâo, sang rŭ mdơ̆ng êbeh 700 êklăk prăk. Ênoh prăk anăn jing klei ung mô̆ mkiêt mkriêm anăn diñu răng snăk hlăm bruă ruah rup bi hmô, mnơ̆ng mkra mjing. Bruă rŭ mdơ̆ng sang mâo gŏ sang đăo knang jao kơ Êpul mkŏ mjing rŭ mdơ̆ng Ƀuôn Tuôr B, jing phung mưng hlăm ƀuôn. Amĭ Bŏ lač:

 “Êlâo hĭn, kâo bi mni kơ knuă druh kdriêk bi hriăm leh bruă kơ čô kâo, anak čô kâo wĭt tinei rŭ mdơ̆ng sang kâo. Kâo mơak kyua anak čô hlăm ƀuôn rŭ mdơ̆ng leh kơ kâo sa boh sang siam snăk.”

       Ayŏng Y Kun Kƀuôr, Khua Êpul rŭ mdơ̆ng ƀuôn Tuôr B, să Drai Săp brei thâo, mkŏ mjing mơ̆ng thŭn 2020, ară anei mâo 12 čô, anăn jing phung dưi mtô bi hriăm bruă rŭ mdơ̆ng. Hlăm wưng êgao, diñu rŭ mdơ̆ng leh 7 boh sang mrâo leh anăn lu hdră bruă kơ mnuih ƀuôn sang hlăm ƀuôn. Ară anei, prăk hrui wĭt kah knar   phung rŭ mdơ̆ng phŭn mơ̆ng 9 truh 10 êklăk prăk/mlan leh anăn phung rŭ mdơ̆ng mkăn hlăm brô 6-7 êklăk prăk/mlan. Mbĭt hŏng bruă mjing prăk hrui wĭt kơ phung hlăm êpul, grăp thŭn Êpul srăng kah sa kdrêč čiăng blei thiăm kdrăp masin pioh kơ bruă mă. Ayŏng Y Kun Kbuôr lač:

 “Ayŏng adei nao lu leh, ară anei nao hriăm bruă rŭ mdơ̆ng ayŏng adei gĭr nao, hrô kơ nao mă bruă kbưi snăn pô mkŏ mjing êpul čiăng đru kơ ƀuôn čiăng kơ bruă duh mkra đĭ kyar. Mă bruă ti ƀuôn lŏ mâo prăk rông gŏ sang pô”.

 Ayŏng Y Riêng Niê, phung hlăm Êpul rŭ mdơ̆ng ƀuôn Tuôr B brei thâo, ñu mâo prăk hrui wĭt hlăm brô 3 êtuh êbâo prăk hlăm sa hruê:

 “Mă bruă anei ênưih, mâo prăk mơh, ƀuh sang kyua êpul rŭ mdơ̆ng snăn mnuih ƀuôn sang đăo knang mơak mơh”

 Êpul rŭ mdơ̆ng ƀuôn Tuôr B jing gru hmô mrâo hŏng mnuih ƀuôn sang djuê ana Êđê, dưi mkŏ mjing leh dŭm gưl mtô bi hriăm bruă krĭng ƀuôn sang. Hlue si Y Phen Niê, Khua Êpul hgŭm ƀĭng ngă lŏ hma să Drai Săp, bruă sang čư̆ êa alŭ wăl đru dŭm kdrăp, hưn mthâo kơ hdră… đru kơ mnuih ƀuôn sang mđĭ kyar bruă mkŏ mjing, pŏk hdră bi hrŏ ƀun hơĭt kjăp.

 “Bi mklă gru hmô anei msir klei ư̆ êpa, bi hrŏ klei ƀun knap jing kjăp hĭn ti alŭ wăl. Êlâo dih iêô phung rŭ mdơ̆ng ti alŭ wăl mkăn kơ bruă rŭ mdơ̆ng snăn ară anei hmei mâo Êpul bi hgŭm anei. Hmei bi hgŭm ăt msĕ mơh bi mkŏ dŭm gŏ êsei ti alŭ wăl amâo djŏ ôh iêô phung anôk mkăn ôh ƀiădah jing mnuih ƀuôn sang ti alŭ wăl ngă leh anăn mkŏ mjing kơ alŭ wăl.”

Êngao kơ Êpul rŭ mdơ̆ng ƀuôn Tuôr B, să Drai Săp, ti dŭm să mkăn hlăm kdriêk Krông Ana, mnuih ƀuôn sang djuê ƀiă ăt dưi hriăm bruă rŭ mdơ̆ng leh anăn mđĭ lar tŭ dưn. Si tô hmô Y Sao Mlô, ti Ƀuôn Tơ Lơ, să Ea Ana, mơ̆ng sa čô đru rŭ mdơ̆ng, ñu tui hriăm bruă leh anăn jing pô rŭ mdơ̆ng phŭn.

 Y Sao brei thâo: êlâo anăn ñu knŏng tui hlue dŭm êpul rŭ mdơ̆ng, ngă dŭm bruă đđiêt prăk ƀiă. Leh thâo klei hâo hưn mâo adŭ mtô bi hriăm bruă dưi mkŏ mjing ti alŭ wăl, ñu bi mklă čih anăn nao hriăm. Kriăng hriăm leh anăn nao ênŭm hruê mmông, leh ruê̆ hriăm, khua pô rŭ mdơ̆ng brei ñu ngă pô rŭ mdơ̆ng phŭn, hŏng prăk hrui wĭt mơ̆ng 300-350 êbâo prăk/hruê.

 Bi Y Xiếp Ƀuôn Yă, ti ƀuôn Kruê̆, să Ea Bông, wăt tơdah jing leh pô rŭ mdơ̆ng, ƀiădah kyua mâo klei čiăng hriăm kơ bruă lu snăn ñu lŏ čih anăn hriăm bruă rŭ mdơ̆ng sơ wil. Mơ̆ng adŭ bruă, amâo djŏ knŏng thâo tĭng yap klă klơ̆ng kơ hdră leh anăn mnơ̆ng dhơ̆ng rŭ mdơ̆ng kơ hdră bruă ôh, ƀiădah ñu lŏ mâo klei thâo kơ doh êƀăt mnơ̆ng ƀơ̆ng.

 Hlue si anôk bruă sang hră mtô bi hriăm kdriêk Krông Ana, čar Dak lak, kahnar grăp thŭn klei čiăng hriăm bruă mơ̆ng mnuih mă bruă ti alŭ wăl hlăm brô 4 êtuh čô. Hlăm anăn, kƀĭn hlăm bruă msĕ si: rŭ mdơ̆ng, pla mjing mmao, tă kčoh. Mơ̆ng bruă mtô bo hriăm đru kơ phung hriăm păn kjăp klei bhiăn klă klơ̆ng mơ̆ng djăp bruă ngă čih anăn klei tŭ dưn djăp bruă dưi mđĭ, mâo bruă ngă kjăp leh anăn prăk hrui wĭt đĭ lu.

 Mơ̆ng klei tŭ jing mơ̆ng êpul rŭ mdơ̆ng Buôn Tuôr pŏk êlan nao mrâo, hdră ngă mrâo hlăm bruă mtô bi hriăm, msir mgaih bruă mă ti dŭm krĭng ƀuôn sang, krĭng mnuih djuê ƀiă ti Dak Lak hlăm wưng kơ anăp: Anăn jing mguôp hŏng bruă klă sĭt, bruă čiăng êdi hlăm klei hdĭp mnuih ƀuôn sang./.