Êlan nao ti sang Hồ Phình, 47 thŭn, ti ƀuôn Kè, să Lâm Hoá, kdriêk Tuyên Hoá mdêč mdar găn dŭm boh kbuôn čư̆. Êlâo dih, gŏ sang Hồ Phình kreh kƀah mnơ̆ng ƀơ̆ng huă nanao. Hlăm sang mâo 6 čô ƀiădah knŏng mâo mă 2 sao lăn pla djam mtam leh anăn 1 sao lŏ, djŏ thŭn amâo mâo boh mnga, knŏng guôn mă klei đru mơ̆ng knŭk kna.

Amâo mâo tŭ kơ klei ƀun ƀin ư̆ êpa, Hồ Phình hluê hriăm dŭm klei bi hmô mđĭ kyar klei hdĭp mda. Mơ̆ng ênoh 50 êklăk prăk lĭng čan mơ̆ng knơ̆ng prăk đru kơ yang ƀuôn, ñu blei êmô, ŭn leh anăn ana mjeh čiăng pla dliê. Leh lu thŭn mkiêt mkuôm, Hồ Phình mâo leh 5ha dliê mbĭt hŏng lu drei êmô kbao, ŭn mnŭ. Ñu lŏ pla thiăm mdiê ktơr…, hrui wĭt mơ̆ng mdiê djăp ƀơ̆ng huă jih thŭn, ktơr pioh čiêm ŭn mnŭ, klei hdĭp mda gŏ sang ƀuh klei đĭ kyar klă nik.

“Ăt dôk mâo lu klei dleh dlan ƀiădah pô srăng gĭr, mă bruă knuă jăk hĭn. Khădah dôk ƀun ƀiădah ƀuh pô dưi ƀiă leh mkă hŏng arăng mkăn. Čih hră akâo kbiă mơ̆ng gŏ sang ƀun ƀin, giăm ƀun ƀin čiăng kơ Đảng, knŭk kna đru kơ phung dleh dlan hĭn kơ pô. Dŭm gŏ sang dleh dlan pô ăt đru mơh, ka thâo ngă hma pô srăng mtô ngă hma.”

Hồ Phình jing sa hlăm dŭm čô Mã Liềng tal êlâo dưi bi mŭt hlăm Đảng leh anăn ăt jing sa čô tal êlâo ti să Lâm Hóa čih hră akâo kbiă mơ̆ng gŏ sang ƀun ƀin, hră mơ̆ng ñu amâo djŏ knŏng jang klei đru kơ phung dleh dlan hĭn, ƀiădah lŏ jing klei mđĭ ai mnuih ƀuôn sang Mã Liềng hluê ngă msĕ hŏng ñu čiăng tlaih mơ̆ng klei ƀun ƀin.

Aduôn Cao Thị Vân, khua ƀuôn Kè, kdriêk Tuyên Hoá brei thâo, čiăng mtrŭt mjhar mnuih ƀuôn sang Mã Liêng mđĭ kyar klei hdĭp mda phung đảng viên srăng ngă êlâo, srăng tlaih ƀun êlâo, blŭ nao mbĭt hŏng mă, sơnăn kơh mnuih ƀuôn sang hluê ngă. Mbĭt hŏng klei mđĭ kyar klei hdĭp mda gŏ sang, Hồ Phình lŏ nao kơ grăp sang hlăm ƀuôn, mtô kơ mnuih ƀuôn sang klei rông mnơ̆ng, pla dliê, mđup brei mjeh kyâo, mjeh mnơ̆ng rông.

“Ayŏng Hồ Phình nao mblang kơ grăp sang, mđĭ ai mnuih ƀuôn sang tơdah mâo klei dleh dlan srăng đru. Čiăng mtrŭt mjhar mnuih ƀuôn sang tinei, phung knuă duh srăng mâo klei blŭ nao mbĭt hŏng bruă ngă kơh mnuih ƀuôn sang thâo săng. Hlăm wưng êgao Đảng leh anăn knŭk kna mâo nanao klei uêñ mĭn, đru kơ mnuih ƀuôn sang, mnuih ƀuôn sang ară anei ƀrư̆ hruê ƀrư̆ đĭ kyar, mâo sang dôk, êlan klông, pui mngač leh anăn sang hră mơar.”

Să Lâm Hoá mâo êbeh 150 gŏ sang hŏng hlăm brô 650 čô mnuih ƀuôn sang jing mnuih Mă Liêng (sa kdrêč mơ̆ng mnuih djuê ana Chứt). Đinh Văn Bắc, k’iăng khua bruă Đảng să Lâm Hoá, kdriêk Tuyên Hoá, čar Quảng Bình brei thâo, ƀuôn Kè ară anei mâo 10 čô đảng viên, hlăm anăn mâo 7 čô mnuih Mã Liềng, hŏng bruă klam jing k’iăng khua bruă Đảng nah gŭ, Hồ Phình mbĭt hŏng phung đảng viên ƀuôn Kè mâo klei bi hmô, nao êlâo hlăm dŭm hdră bruă, hluê ngă dŭm hdră êlan, hdră mtrŭn mơ̆ng Đảng, knŭk kna, mtrŭt mjhar mnuih ƀuôn sang mđĭ kyar klei hdĭp mda, bi hrŏ ƀun. Hluê si Đinh Văn Bắc, Hồ Phình dưi tŭ yap jing gŏ sang thâo hlăm bruă mkra mjing mnia mblei gưl să hlăm 5 thŭn dơ̆ng. Thŭn dih, ñu jing đảng viên bi leh jăk bruă klam.

“Bruă klam nao êlâo, bi hmô, cŏn pô mơ̆ng đảng viên dưi bi lar bruă bruă hâo hưn mtrŭt mjhar mnuih ƀuôn sang kơ bruă mđĭ kyar bruă duh mkra ala ƀuôn, rơ̆ng klei êđăp ênang tu dŭm ƀuôn. Klei hdĭp mâo lu klei mlih, boh nik jing mnuih ƀuôn sang čŏng pô mđĭ kyar bruă duh mkra ala ƀuôn.

Bùi Thanh Chuyên, k’iăng khua bruă Đảng kdriê Tuyên Hoá, čar Quảng Bình brei thâo, kluôm kdriêk mâo 44 čô đảng viên jing mnuih djuê ƀiă. Anei jing êpul kmeh gơ̆ng hlăm bruă hâo hưn hdră êlan mơ̆ng Đảng, klei bhiăn ala čar, mđĭ kyar bruă duh mkra ala ƀuôn, kriê pioh dhar kreh djuê ana ti dŭm ƀuôn knông lăn. Hluê si Bùi Thanh Chuyên, hlăm wưng kơ anăp, kdriêk srăng lŏ dơ̆ng mđĭ kyar đảng viên hlăm mnuih djuê ƀiă, mkŏ mjing êpul đảng viên bi hmô, mâo ai lar bra:

“Hlăm wưng kơ anăp, bruă Đảng kdriêk srăng lŏ dơ̆ng mđĭ kyar đảng viên hlăm mnuih djuê ƀiă čiăng ƀrư̆ hruê ƀrư̆ mâo lu mnuih djuê ƀiă dưi mŭt hlăm Đảng, jing asăr, kmeh gơ̆ng leh năn klei hrŏng ruah, phung nao êlâo hlăm bruă mtrŭt mjhar mnuih ƀuôn sang hluê ngă jăk dŭm hdră mtrŭn, hdră êlan”.

Bruă bi mŭt dŭm čô jing mnuih djuê ƀiă êdah êdi hlăm Đảng ti kdriêk čư̆ čhiăng Tuyên Hoá, čar Quảng Bình jing bruă klam kđi čar. Hluê anăn dưi bi lar bruă klam kmeh gơ̆ng hlăm krĭng mnuih djuê ƀiă ti dŭm alŭ wăl.