Thŭn 2023, prăk hlue ngă Hdră kñăm ala čar mđĭ kyar krĭng mnuih djuê ƀiă leh anăn krĭng čư̆ čhiăng mbha kơ čar Quảng Nam êbeh 782 êklai prăk. Hlăm thŭn 2022 leha năn gưl I thŭn 2023, bruă pŏk hlue ngă Hdră anei dôk tuôm hŏng dleh dlan. Mta phŭn jing dŭm anôk bruă Gưl dlông êmưt mtrŭn hră mơar ktrâo lač hlue ngă, dŭm alŭ wăl mtŭk mtŭl hlăm bruă pŏk ngă dŭm hdră bruă. Hlue si Nguyễn Công Thành, K’iăng Khua Knơ̆ng bruă sang hră mtô bi hriăm čar Quảng Nam, lu hdră kčah, hnơ̆ng čuăn hlue ngă klei bhiăn hdră êlan hŏng phung hđeh sang hră krĭng čư̆ čhiăng ti dŭm Hdră bruă sang hră hlăm Hdră kñăm ala čar mđĭ kyar bruă duh mkra- ala čar krĭng mnuih djuê ƀiă leh anăn krĭng čư̆ čhiăng mơ̆ng čar adôk lu klei gun kpăk.

“Hlăm sa boh sang hră, sa boh adŭ, lu hđeh sang hră hriăm dôk sa boh jhưng ƀiădah 1 čô snăn dưi dưn hdră êlan mơ̆ng Gưl dlông, 1 čô dưi dưn hdră êlan mơ̆ng alŭ wăl snăn lu klei êdu kƀah. Hmei kčĕ brei mkra mlih hdră êlan čiăng dưi dưn mtăp mđơr.”

 Lê Văn Dũng, K’iăng Khua dlăng bruă Đảng čar Quảng Nam ktrâo lač dŭm klei dleh dlan ti dŭm alŭ wăl krĭng čư̆ čhiăng tơdah pŏk ngă dŭm hdră bruă msĕ si ênoh gŏ êsei ƀun lu đei, klei hdĭp mnuih ƀuôn sang adôk lu klei dleh dlan anăn klei dưi ngă bruă tơdah pŏk ngă hdră bruă êdu kƀah snăk. Mbĭt anăn, klei thâo phung knuă druh ti krĭng čư̆ čhiăng ka dưi ngă djŏ hlăm bruă pŏk ngă dŭm hdră bruă. Lê Văn Dũng akâo:

“Brei bi ênưih hră mơar hlăm hdră pŏk ngă kyua hră mơar mtŭk mtŭk. Bruă dưi mbha gưl kơ čar, kdriêk, boh knik să snăn Gưl dlông brei mâo hdră êlan čiăng dưi mbha.”

Blŭ hrăm hlăm mmông mă bruă, Hầu A Lềnh, Khua phŭn bruă - Khua Knơ̆ng bruă djuê ana čih yap klei akâo, kčĕ mơ̆ng čar Quảng Nam. Lu klei dleh dlan, gun kpăk bluh mâo hlăm hdră pŏk ngă Hdră kñăm ala čar mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhoăng srăng mâo Êpul bruă hưn mdah Knŭk kna hnưm mâo hdră msir ruh mgaih. Hầu A Lềnh mtă kơ čar Quảng Nam brei bi hgĭm hŏng dŭm Phŭn, dhar bruă gưl dlông hlăm hdră ruh mgaih dleh dlan, mkra mlih hdră êlan.

“Bruă jing bruă klam mơ̆ng gưl dlông snăn gưl dlông ngă, brei ruh mgaih. Khua knŭk kna jao leh kơ dŭm Phŭn bruă, dhar bruă kƀĭn mkra mlih. Mâo 3 bruă brei ngă: Êpul tal sa jing ruh mgaih klei dleh dlan, êpul tal 2 jing msir mgaih dŭm bruă mtŭk mtŭl leh anăn êpul tal 3 jing mbŏ ya klei ka mâo”./.