Ară anei hlăm kluôm ala mâo giăm 25 êklăk čô phung hđeh. Jih jang phung hđeh kgŭ 6 thŭn lehanăn phung hđeh dưi dưn klei đru ba mơ̆ng yang ƀuôn hlăm grăp mlan, mâo knŭk kna duh brei hră ênua klei mdrao mgŭn,. Hdră tlŏ mgang pŏk mlar hŏng jih jang djăp mta vắc xin, hnơ̆ng mâo tlŏ mgang kơ phung hđeh kgŭ 1 thŭn djăp 97%; phung hđeh 5 thŭn dưi nao sang hră adŭ hđeh điêt. Knŭk kna amâo mâo hrui mă prăk ôh hŏng hđeh hriăm adŭ hđeh điêt, hriăm gưl 1;2;3 ti dŭm sang hră knŭk kna, lehanăn mâo klei đru prăk hriăm hŏng hđeh hriăm adŭ hđeh điêt, hriăm gưl 1;2;3 ti dŭm sang hră êngao knŭk kna.

Phung hđeh dôk hlăm klei hdĭp dleh dlan, dưi dưn hdră êlan đru ba kơ klei hdĭp ti alŭ wăl. Jih jang bruă răng mgang kơ phung hđeh mâo ti 3 hnơ̆ng: Gang mkhư̆, đru ba, mghaih msir hlăk mâo klei dôk ba yua hŏng klei tŭ dưn. Ti anôk bi kƀĭn, dŭm čar, ƀuôn prŏng ăt mâo klei bi trông kơ dŭm boh tŭ dưn hlue ngă bruă knuă kơ phung hđeh ti alŭ wăl, lehanăn mâo klei akâo kơ bruă răng mgang, dlăng kriê phung hđeh hŏng klei kluôm ênŭm hĭn. Klah čŭn klei bi kƀĭn, k’iăng khua knŭk kna Phạm Thị Thanh Trà hŏng klei klă mngač bi êdah dŭm klei awăt kƀah dôk mâo, msĕ si klei nga jhat kơ phung hđeh, klei duah mčhua hŏng hla pŏk ngă klei mplư mplêč phung hđeh knư̆ hrue knư̆ lu…  K’ĭang khua knŭk kna mtă lŏ dơ̆ng bi leh jăk hĭn dŭm hdră êlan čiăgn pral dưi mâo klei đru mgang phung hđeh bi hmao kơ klei dưi êngiê kơ phung hđeh, čŏng gang mkhư̆ jih jang klei jhat, hmăi djŏ hŏng phung hđeh./.