Giăm sa hruê kăm hŏng anei, dŭm pluh čô knuă druh, lĭng kahan, kahan ƀuôn leh anăn êpul thơ̆ng kơ bruă mâo ƀô̆ mta mơ̆ng hnưm ti msat Knŭk kna djiê êngiă Mỹ Thắng. Grăp čô grăp bruă klam; êpul răng mgang klei êđăp ênang, êpul kuai mă, êpul mdrao mgŭn, đru bruă…Jih jang bi mđing kơ mta kñăm jing bi leh bruă mă mta ksiêm mkă kla klơ̆ng djŏ hŏng hdră bhiăn, djŏ hŏng hdră kčah. Trung tá Phạm Hữu Lộc, khua bruă kđi čar, khua bruă kđi čar k’iăng khua knơ̆ng gĭt gai lĭng kahan xă Phù Mỹ Đông brei thâo, leh ngă bruă kuai mă, klang kleh mâo êpul K52 mă mta ksiêm mkă, ba wĭt kơ êpul ksiêm dlăng, djă pioh êlâo kơ ba jao kơ Êpul khua gĭt gai lĭng kahan să.

"Bi hŏng hdră 500 hruê mlam, anôk bruă kčưm hluê ngă mơ̆ng hruê 25/6 truh kơ ară anei. Anôk bruă hluê ngă hŏng tur knơ̆ng mkŏ mjing mâo bruă Đảng, Bruă sang čư̆ êa să mkŏ mjing, hluê ngă grăp hruê čiăng bi djŏ hŏng hdră kčah.”

Ti dŭm bĭt msat dưi kuai mă, sa blah jal mâo phung lĭng kahan kă čiăng gang hĕ mđiă ktang. Hŏng klei hriăm lu thŭn ngă bruă bi kƀĭn klang kleh lĭng kahan êngiă asei, grăp bruă ngă mơ̆ng knuă druh, lĭng kahan êpul K52 mâo klei răng sơăi. Thiếu tá Trần Hoàng Nam, sa čô hgŭm hlăm êpul K52, knơ̆ng gĭt gai lĭng kahan čar Gia Lai brei thâo, grăp bĭt msat mâo lăn mdê mdê, kyuanăn bruă kuai mă ăt mâo klei dleh mdê mdê:

"Hlăm klei ngă bruă klam ƀuh dŭm bĭt msat ti dŭm alŭ wăl mâo klei mdê mdê. Mâo đa đa msat lăn êjin, dleh bi kƀĭn, sitôhmô Phù Mỹ Đông jing lăn čuah kyuanăn yŏng adei mă bruă mâo klei kngăm hĕ. Đa đa bĭt msat êjai klei ƀuh mâo êa ăt hmăi kơ klei bi kƀĭn ktlang.”

Bruă anăn ngă nanao ti gŭ mđiă hlơr. Pô anei êmăn hrô pô mkăn. Ea hŏ gang msah wăt rŏng ƀiădan kăn mâo pô ruăt lei. Hŏng kƀay điêt, kơr hĕ jih lăn, grăp mta mnơ̆ng, klang kleh dưi mă jăk êdi. Ktang lu klei dleh dlan, phung hgŭm hlăm êpul ăt gĭr hĭn.

"Ăt mâo mơh phung djiê sui leh, klang kleh rai lu leh. Hŏng dŭm klei sơnăn, êpul K52 pŏk phai hnơ̆ng tui duah. năng ai hŏng klei čuăl mkă amâodah kyua hƀuê ênuk ngă kơ msat kpleh đuê̆. Ayŏng adei gĭr pŏk phai, duah klă, amâodưi lui ôh.”

Kbưi hŏng anôk kuai mă dŭm pluh met jing dŭm anôk phung ngă bruă mă mta ADN hluê si hdră bhiăn ktang phĭt. Grăp mta ksiêm mkă dưi čih pioh, mă rup, kđăm mrô, kđăl hĕ leh anăn djă pioh čiăng đru kơ klei bi klă êdei anăp. Aê mdrao Dương Công Hoàng, khua kiă kriê êpul mă mta ksiêm mkă brei thâo:

“Leh mă mta ksiêm mkă, klang kleh adôk srăng ba jao kơ anôk bruă bi mlih mrô čiăng ba wĭt kơ msat. Bi anôk bruă srăng mơĭt mta ksiêm mkă hluê si klei čuăn anei ba jap kơ anôk bruă tŭ mă, mơĭt nao ksiêm mkă, bi klă.”

Msat lĭng kahan êngiă asei Mỹ Thắng ară anei mâo 445 boh msat lĭng kahan djiê êngiă, hlăm anăn adôk 118 msat ka thâo hlei pô. Bruă mă mta ksiêm mkă ADN tinei knŏng jing sa hlăm dŭm klei kčưm mơ̆ng hdră bruă 500 hruê mlam mâo čar Gia Lai dôk ngă ti lu msat lĭng kahan êngiă asei ti alŭ wăl. Êlan nao dôk lu klei dleh dlan kyua gru klei bi blah sui leh. Ƀiădah grăp klang kleh dưi djă pioh hruê anei jing klei hmăng hmưi kơ sa hruê phung lĭng kahan đưm dih dưi iêo djŏ anăn pô, leh anăn lŏ wĭt hŏng gŏ sang./.