Dŭm hruê akŏ mlan 7, ti dŭm anôk rŭ mdơ̆ng sang đru kơ dŭm gŏ sang Knŭk kna dlăng ba ti čar Quảng Ngãi, ênai măi lŭk bêtông, ênai kmŭt, ênah awă kwang mtŭk mtlak. Knuă druh, lĭng kahan, kahan ksiêm mbĭt hŏng phung êdam êra leh anăn mnuih ƀuôn sang alŭ wăl ƀri đru mguôp hruê ai, mtrŭt bi pral bruă rŭ mdơ̆ng sang klei khăp bi leh êlâo kơ hruê 20/7.

Leh giăm 15 thŭn mkŏ mjing gŏ sang leh anăn hdĭp sang sang sô siă kniă kniêt, amai Lê Thị Kiều, ti alŭ Xuân Trung, să Trà Bồng ăt dưi mâo sa boh sang kjăp. Amai Kiều jing anak mơ̆ng kahan rua duam hmăi mơ̆ng drao ruă diosin, asei amai pô ăt tŭ klei hmăi mơ̆ng drao ruă, lu thŭn êgao klei hdĭp gŏ sang dleh dlan. Ênoh prăk đru grăp mlan knŏng djăp yua aguah tlam, bi klei rŭ mdơ̆ng sang amai amâo jhŏng mĭn ôh.

Mrâo anei, gŏ sang amai Lê Thị Kiều mâo Knŭk kna đru 60 êklăk prăk mơ̆ng hdră msir lăm sang dôk êjai, sang tĭ ƀrôč kơ gŏ sang Knŭk kna dlăng ba. Mbĭt hŏng ênoh prăk mkiêt mkriêm lu thŭn, ung mô̆ amai Kiều dưi mdơ̆ng leh sang mrâo.

Sang mrâo mơ̆ng gŏ sang kâo mkra leh ƀiădah ka dưm ƀăng bhă, sang pui ka mkra mơh. Gŏ sang kâo dôk gĭr duah prăk lŏ mkra sang ti gŭ leh anăn sang pui. Sang anei brei dua amĭ anak dôk, gĭr bi leh hnưm sang pui čiăng mâo anôk tŭk knă brei anak mniê hơĭt ai tiê hriăm hră. Ară anei mâo sang mrâo jing jăk leh.”

Bi sang mơ̆ng Hồ Văn Ngoạt dôk ti alŭ Trà Hiệp, să Thanh Bồng ăt dôk mjêč bi leh. Ñu jing anak sa čô nao bi blah leh anăn djŏ drao ruă diosin. Lu thŭn êgao gŏ sang hdĭp sang sang sô siă, hŭi hyưt êjai truh yan hjan hlĭm. Mâo Knŭk kna đru brei 60 êklăk prăk, Hồ Văn Ngoạt  lŏ čan thiăm 200 êklăk prăk čiăng mdơ̆ng sang dôk kjăp:

"Êlâo dih sang kâo tĭ ƀrôč, jhat rai leh. Ară anei mâo Knŭk kna đru 60 êklăk prăk, gŏ sang lŏ mguôp thiăm čiăng mdơ̆ng sang dôk, mâo anôk dôk hơĭt. Ară anei ăt lač jăk kơ Knŭk kna đru leh. Mâo sang dôk jăk, gŏ sang kâo hơ̆k mơak êdi”.

Ti să Thanh Bồng mâo 4 gŏ sang Knŭk kna dlăng ba dưi đru msir lăm sang dôk êjai, sang tĭ ƀrôč. Mphŭn kčưm mơ̆ng mlan 5/2026, truh kơ ară anei jih 4 boh sang dưi leh hlăm brô 70% ênoh bruă. Čiăng bi leh êlâo kơ hruê 20/7 hluê si klei gĭt gai mơ̆ng čar Quảng Ngãi, alŭ wăl mkŏ mjing leh dŭm êpul đru bruă, tiŏ nao êpul kahan ksiêm, lĭng kahan, mặt trận, dŭm êpul bruă leh anăn mnuih ƀuôn sang nao hgŭm ruh sang hđăp, dŭ mdiăng, klei tur, đru kơ kdrêč rŭ mdơ̆ng. Dŭm hruê ai nao đru, đru leh dŭm gŏ sang bi hrŏ lu ênoh prăk mưn.

 Hồ Thanh Trường, k’iăng khua Bruă sang čư̆ êa să Thanh Bồng, čar Quảng Ngãi brei thâo, dŭm gŏ sang dưi mâo klei đru jing gŏ sang dleh dlan. Alŭ wăl mtrŭt mhjar dŭm gŏ sang mơ̆ng prăk hrui wĭt pla ana akasi, rông mnơ̆ng čiăng mbŏ ênoh prăk mkra sang, iêo mthưr phung knuă druh, phung mă bruă Knŭk kna, phung mâo ai tiê kmah leh anăn yua keh prăk kyua phung ƀun ƀin čiăng đru kơ dŭm gŏ sang mâo klei găl rŭ mdơ̆ng sang dôk kjăp, êđăp ênang hĭn:

" Bruă sang čư̆ êa să Thanh Bồng mbha bruă dŭm êpul msĕ si kahan ksiêm, lĭng kahan bi mguôp hŏng mặt trận, dŭm êpul bruă leh anăn êpul êya ti alŭ wăl, boh nik jing dŭm gŏ sang riêng gah srăng nao đru kơ dŭm gŏ sang ti alŭ wăl să, msĕ si ruh sang hđăp, dŭ mdiăng mnơ̆ng, čhuah, boh tâo, simăng, klei tur… čiăng mtrŭt bi pral bruă rŭ mdơ̆ng sang dôk hluê si klei gĭt gai mơ̆ng čar, bi leh êlâo kơ hruê 20/7/2026.”

Mlan 3/2026, Khua Knŭk kna tŭ ư hdră êlan đru msir lăm sang dôk êjai, sang tĭ rưč kơ phung anak phung ngă bruă krŭ kdơ̆ng djŏ drao ruă diosin hŏng ênoh prăk mơ̆ng Keh kyua mnuih ƀun ƀun. Leh kơnăn, Bruă sang čư̆ êa čar Quảng Ngãi ba mdah leh hră êlan, klei mñă kơ dŭm alŭ wăl mjêč ksiêm dlăng, gĭr ngă bruă leh êlâo kơ hruê 20/7/2026.

Čar Quảng Ngãi mâo 175 čô jing anak mơ̆ng phung ngă bruă krŭ kdơ̆ng djăp drao ruă ti 51 să, ƀuôn hgŭm, anôk bruă knơ̆ng mâo klei čiăng đru kơ sang dôk. Knơ̆ng gĭt gai lĭng kahan čar Quảng Ngãi mkŏ mjing leh 74 êpul hŏng 727 knuă druh, lĭng kahan đru kơ mnuih ƀuôn sang rŭ mdơ̆ng sang dôk. Knơ̆ng bruă mkŏ mkra ăt ba mdah lu rup sang gru hmô, rơ̆ng kơ hnơ̆ng jăk bruă leh anăn djŏ guôp hŏng boh sĭt mơ̆ng grăp alŭ wăl. Amâo djŏ knŏng đru sang dôk, lu alŭ wăl ti čar Quảng Ngãi lŏ pluă mbĭt dŭm hdră êlan mkăn msĕ si đru brei ana mjeh, mnơ̆ng rông mjeh, mkŏ mjing klei găl đru kơ mnuih ƀuôn sang ba yua ênoh prăk mnga hdjul mơ̆ng dŭm hdră ala čar kñăm čiăng mđĭ kyar hdră duh ƀơ̆ng, ƀrư̆ ƀrư̆ bi hơĭt klei hdĭp.