Dak Lak ară anei mâo êbeh 41.000 ha durian, hlăm anăn hlăm brô 30.000 ha dôk pĕ boh, hnơ̆ng thŭn 2026 đăo knăl giăm 500.000 ton, ƀiădah kluôm čar Dak Lak mrâo mâo 280 mrô krĭng pla mjing hŏng hlăm brô 7.500 ha leh anăn 42 mrô anôk đŭng hruh mâo China bi mklă. Ară anei adôk 165 mrô krĭng pla mjing leh anăn 66 mrô anôk đŭng hruh bi leh hră mơar ƀiădah ăt dôk guôn tĭng China ksiêm dlăng.

Ti anôk mă bruă hŏng phung khua Phŭn bruă lŏ hma leh anăn wăl hdĭp mda, Nguyễn Thiên Văn, Kiăng khua knơ̆ng bruă sang čư̆ êa čar Daklak mtă.

"Akâo kơ Phŭn bruă lŏ hma leh anăn wăl hdĭp mda mbĭt hŏng dŭm anôk bruă djŏ tuôm, boh nik jing Phŭn Bruă hŏng tač êngao, bi mguôp mă bruă hŏng tĭng China čiăng hnưm bi klă dŭm hră mơar mrô krĭng pla mjing bi leh, mơ̆ng anăn pŏk mlar ênhă djăp klei găl ba čhĭ kơ ala tač êngao. Mbĭt anăn mjing klei găl čiăng mâo thiăm anôk bruă duh mkra bi liê kơ anôk bruă đŭng hruh ti alŭ wăl.”

Mbĭt hŏng Dak Lak, dŭm čar Gia Lai, Lâm Đồng, Quảng Ngãi ăt hưn mdah lu klei dleh dlan êjai pŏk ngă Hdră mtrŭn mrô 38 kơ mrô krĭng pla mjing leh anăn anôk đŭng hruh. Dŭm alŭ wăl akâo hnưm mâo klei ktrâo lač bi sa anăn kơ hdră êlan jao klei dưi ba čhĭ kơ ala tač êngao, mbĭt anăn bi leh hdră kriê dlăng klei čih pioh leh hdră mtrŭn mâo boh tŭ dưn. Hà Ngọc Chiến, Khua Anôk bruă kriê dlăng mnơ̆ng pla mjing leh anăn răng mgang mnơ̆ng pla mjing čar Lâm Đồng mâo klei blŭ:

"Leh hdră mtrŭn mrô 38 mâo boh tŭ dưn, akâo hnưm mâo klei ktrâo lač bi sa hnơ̆ng kơ hdră kriê dlăng čiăng kơ dŭm alŭ wăl mâo tur knơ̆ng pŏk ngă, tơdah ka mâo ôh hdră mtô klă klơ̆ng snăn dleh snăk hluê ngă".

Nguyễn Hoàng Hiệp, K’iăng khua phŭn bruă lŏ hma leh anăn wăl hdĭp mda brei thâo, Phŭn bruă dôk ksiêm duah mkra mlih mrâo hdră mtrŭn mrô 38 hluê si klei gĭt gai mơ̆ng Khua knŭk kna hluê hŏng hdră êlan mbruă hĭn; leh anăn bi mlih jih jang hdră êlan mkăp mrô knăl krĭng pla mjing, leh anăn anôk đŭng hruh, bi mlih mơ̆ng klei ksiêm dlăng êlâo jing ksiêm wĭt êdei, čiăng bi hrŏ klei ngă hră mơar kơ mnuih ƀuôn sang leh anăn phung duh mkra.

Hŏng yan boh durian thŭn anei, dŭm phŭn, dhar bruă Việt Nam dôk mă bruă hŏng tĭng China čiăng mđĭ bruă mkăp mrô krĭng pla mjing, anôk đŭng hruh; mbĭt anăn mđĭ kyar bruă ba čhĭ boh durian bi êăt, pŏk mlar wăl anôk mnia mblei leh anăn đru kơ Dak Lak pŏk ngă hdră 30 hruê  bi leh ênoh mrô krĭng pla mjing. Khădah snăn, hdră êlan phŭn čiăng kơ bruă durian đĭ kyar hơĭt kjăp ăt jing mkŏ mjing klei đăo knang mơ̆ng anôk mnia mblei hŏng bruă mkra mjing mâo klei đua klam. Djăp mta mnơ̆ng dhơ̆ng brei thâo klă phŭn agha, bi klă bruă klam mơ̆ng grăp pô hlăm hdră mkra mjing.

Hlăk êjai hnơ̆ng jăk dưi rơ̆ng leh anăn klă mngač, durian Việt Nam mrâo  dưi mkŏ mjing anăn knăl ala čar, pŏk mlar "êlan mtah" hlăm dŭm anôk ba čhĭ kơ ala tač êngao leh anăn bi hrŏ klei jưh knang hlăm sa anôk mnia mblei sa anăn. Nguyễn Hoàng Hiệp lač klă:

"Čiăng mkŏ mjing klei đăo knang mơ̆ng wăl anôk mnia mblei snăn jih jang mnơ̆ng dhơ̆ng brei thâo bĭt phŭn agha, hlei mkra mnơ̆ng mkra mjing, si hdră ngă leh anăn tơdah mâo klei ngă soh snăn brei bi mklă klei đua klam. Tơdah hdră tui duah phŭn agha dưi ba yua djăp ênŭm, hmei srăng mbĭt hŏng dŭm alŭ wăl ngă hrăm mbĭt bruă anei.”