Hlăm 6 mlan akŏ thŭn anei, dŭm gưl, dhar bruă leh anăn alŭ wăl iêo mkrum leh djăp ai dưi, pŏk ngă lu hdră msir kñăm hluê ngă tŭ dưn Hdră bruă. Kluôm čar tŭ mă leh anăn bi klă 500 klei hâo hưn kơ phung êngiă asei, msat lĭng kahan djiê êngiă.

Knŏng ti alŭ wăl êlan Trường Chinh, alŭ wăl krĭng Lăn Dăp Kngư Đăk Cấm leh anăn Kon Tum, êpul êya djŏ tuôm ksiêm dlăng, ară anei dôk kuai mă leh anôk leh anăn dưi bi kƀĭn 3 klang lĭng kahan djiê êngiă. Čar lŏ dơ̆ng bi leh hră kak lăn tui duah, mđĭ bi mklă klei hâo hưn, mđing ksiêm dlăng, kuai mă ti dŭm krĭng phŭn, đru hnưm bi mklă anăn phung lĭng kahan djiê êngiă dôk kƀah klei hưn. Quảng Ngãi ktưn bi leh jih jang bruă mă mta ksiêm mkă hlăm mlan 10/2026.

4- Čar Dak Lak mdưm mta kñăm bi leh bruă mă mta sinh phẩm ksiêm dlăng ADN hŏng dŭm klang lĭng kahan djiê êngiă ka dưi bi mklă anăn êlâo kơ hruê 31/10 kơ anăp. Kluôm čar ară anei mâo 34 bĭt msat lĭng kahan hŏng 15.222 boh msat, hlăm anăn 4.124 boh msat ka bi mklă klei hâo hưn leh anăn 1784 boh msat knŏng mâo sa kdrêč klei hâo hưn. Truh kơ ară anei, êpul bruă djŏ tuôm pŏk ngă leh bruă mă mta ti 5 bĭt msat lĭng kahan djiê êngiă, hrui mă 105 mta mnơ̆ng dhơ̆ng hdĭp djăp klei găl mkăp kơ bruă ksiêm dlăng ADN.

Kơ bruă tui duah, hrui mƀĭn klang kleh lĭng kahan, yan không mrâo êgao, Êpul K51 Anôk bruă gĭt gai lĭng kahan čar Dak Lak dưi bi kƀĭn leh 27 klang kleh phung djiê êngiă ti Campuchia, leh wĭt ti ala čar, êpul lŏ dơ̆ng msir mgaih 12 klei hâo hưn leh anăn bi kƀĭn mbĭt 4 klang kleh lĭng kahan êngiă asei ti dŭm să Krông Bông leh anăn Tây Sơn.