Hlăm ai êwa hơuh mđao ti knông lăn, ai êwa ngă bruă ti Sang hră mlir gưl knŭk kna rông ba mlir gưl hriăm Ia R’vê, să Ia R’vê mkŏ mjing hŏng klei mjêč.45 čô knuă druh, lĭng kahan mâo Knơ̆ng gĭt gai lĭng Kahan čar Dak Lak mđĭ ktang kah mbha jing lu êpul, bi hgŭm hŏng phung mă bruă rơ̆ng dŭm mta bruă mơ̆ng mkra tur, tô, lang tur truh kơ mkra mnư̆ mnang. Dŭm anôk rŭ mdơ̆ng dưi dăp mă bruă hluê si mmông čiăng bi hrŏ wưng bi leh hdră bruă. Thượng úy Nguyễn Bá Công, nao hgŭm rŭ mjing Sang hră knŭk kna rông ba mlir gưl Ia R’vê, brei thâo:

Ayŏng adei mbha ngă dua êpul, sa êpul mdơ̆ng mtih, klia mtih, lang ƀrĭk; êpul adôk tuh gơ̆ng, ngă gơ̆ng mnư leh anăn mkra mnư, ayŏng adei dăp mă bruă hlue si dua gưl: gưl 1 mơ̆ng 6 mmông aguah truh kơ 10 mmông krah mdei huă yang hruê; gưl 2 mơ̆ng 1 mmông krah truh kơ 4 mmông krah tlam.”

Sang hră knŭk kna rông ba mlir gưl hriăm Ia R’vê mâo ênoh duh bi liê 185 êklai prăk, mâo adŭ hriăm, anôk dôk, sang dlăng hră, sang lu mta bruă, anôk bruă ngă hră mơar leh anăn dŭm hdră bruă kluôm; mbĭt anăn mkra mđĭ dŭm hdră bruă dôk mâo mơ̆ng Sang hră gưl 2 Nguyễn Thị Định. Nguyễn Quang Khánh, khua kiă kriê sa êpul ngă bruă brei thâo, phung ngă bruă dôk mđing bi leh čiăng hmao hrui mă, ba jao djŏ hdră kčah.

“Tlâo knơ̆ng bruă rŭ mdơ̆ng hlăm hdră bruă snăn mâo 5 boh êdeh mdiăng, djŏ guôp si ngă snăn bi tiŏ nao. Êdeh dŭ mdiăng snănmâo hlăm brô 20 kdrăp mnơ̆ng, mâo êdeh ben, êdeh cẩu, êdeh lu; klei čiăng rŭ mjing jing mâo leh.Kơ mnuih ngă bruă, tĭng kơ knơ̆ng bruă kâo hlăm brô 30 čô mnuih mă bruă leh anăn kỹ sư; 2 knơ̆ng adôk leh anăn êpul lĭng kahan snăn jih jang truh 80 truh 90 čô, jih jang dôk tuh êyuh ai tiê ngă bruă.”

Dleh dlan hĭn hlăm tlâo hdră bruă jing Sang hră knŭk kna rông ba mlir gưl hriăm Ia Lôp kyua kbưi hŏng wăl krah, klei găl dŭ mnơ̆ng dhơ̆ng leh anăn mkŏ mjing rŭ mdơ̆ng dleh dlan. Čiăng đru kơ pô bi liê leh anăn phung ngă bruă, čar Dak Lak tiŏ nao leh êbeh 60 60 čô knuă druh, lĭng kahan nao hgŭm ngă bruă, đru mđĭ pral hnơ̆ng hlăm anôk dôk ngă bruă.

Hluê si adŭ bruă đru kčĕ ksiêm dlăng, ară anei anôk bruă ba nao giăm 40 kdrăp mnơ̆ng mbĭt hŏng êbeh 140 čô kỹ sư, mnuih mă bruă ngă bruă nanao. Nguyễn Thế Quang, anôk bruă đru kčĕ ksiêm dlăng hdră bruă, brei thâo, lu tal sang dưi ngă leh kdrêč tal êlâo lehanăn dôk nao hlăm wưng bi leh, mkŏ kdrăp pui kmlă, êa lehanăn ƀăng bhă.

“Mâo lĭng kahan mŭt đru snăn hdră bruă dưi mđĭ pral hnơ̆ng kčah, dŭm anôk bruă tŭ mă phăn jao ƀuh lĭng Kahan ngă jăk snăn diñu ăt gĭr hluê ngă mơh, amâo srăng bi kdung hruê mmông, bi luč ênoh bruă mă. Phung ngă bruă rŭ mdơ̆ng dôk gĭr mđĭ pral hnơ̆ng čiăng jao sa boh sang hră gưl sa êlâo kơ hruê 31/7, mă klei anăn mđĭ ai, mtrŭt mjhar hluê ngă dŭm bruă mkăn hriăm hră mơar, tui ngă.”

Hlue si hdră kčah wưng thŭn 2025-2027, Dak Lak rŭ mdơ̆ng 4 sang hră mlir gưl hlăm krĭng knông lăn, knŏng tlâo sang hră Ia R’vê, Ia Lôp leh anăn Ƀuôn Đon brei bi leh dŭm klei găl čiăng ba yua mơ̆ng thŭn hriăm 2026-2027.

Ti čar Dak Lak, wăt tơdah hmăi mơ̆ng yan adiê, ênoh mnơ̆ng dhơ̆ng leh anăn klei kƀah mnuih mă bruă, phung ngă bruă ăt krơ̆ng kjăp dŭm hdră êlan mă bruă, iêô mkrum jih hnơ̆ng mnuih ngă bruă, kdrăp yua leh anăn bi mguôp hŏng êpul lĭng kahan čiăng rơ̆ng djŏ hŏng hdră kčah. Võ Văn Lợi, K’iăng khua Anôk bruă kriê dlăng hdră duh bi liê rŭ mdơ̆ng bruă tuh tia mkra mjing čar Dak Lak, brei thâo, truh kơ ară anei, dŭm hdră bruă mâo leh êbeh 80% hnơ̆ng; lu hdră bruă mŭt hlăm wưng bi leh, mkŏ dăp kdrăp kreh knhâo.

“Êpul hluê ngă hdră  70 hruê mlam, tiŏ nao phung knuă druh, kỹ sư thơ̆ng kơ bruă nao mă bruă mbĭt, huă ƀơ̆ng mbĭt, dôk mbĭt čiăng ruh mtlaih klei dleh dlan, gun kpăk leh anăn mđĭ ai dŭm anôk bruă ngă bruă rơ̆ng hnơ̆ng hluê si klei gĭt gai mơ̆ng Phŭn bruă kđi čar, ăt msĕ mơh bruă Đảng čar, Êpul gơ̆ng bruă ƀuôn sang čar, Anôk bruă sang čư̆ êa čar.Čang hmăng yan adiê jăk, hjan angĭn êbŭ amâo mâo klei hmăi čiăng kơ jih jang sang hră srăng bi leh djŏ wưng kčah, kkuh drông hđeh hriăm hră mphŭn pŏk thŭn hriăm 2026–2027.”

Hŏng klei nao hgŭm ktang phĭt mơ̆ng jih anôk bruă kđi čar, klei gĭr mơ̆ng phung ngă bruă mbĭt hŏng klei đru mguôp jăk mơ̆ng êpul lĭng kahan, dŭm boh sang hră ti knông lăn Dak Lak dôk ƀrư̆ hruê dưi bi leh, ba mbĭt hŏng klei čang hmăng kơ sa wăl anôk hriăm hră mơar doh siam, jăk găl hĭn kơ phung hđeh krĭng dleh dlan. Klei bi lông ktưn hŏng hruê mmông ăt dôk mâo nanao, kñăm rơ̆ng kơ dŭm hdră bruă sang hră mơar hnưm dưi bi leh, pŏk klei găl hriăm thâo hĭn mơ̆ng anak čô mnuih djuê ƀiă ti krĭng knông lăn ala Čar.