Sang hră gưl sa să Song Tử Tây, kdriêk plao ksĭ Trường Sa jing adŭ mkruôp mbĭt, mâo 6 čô hđeh hriăm hră, mbha ngă dua êpul dôk hlăm dua adŭ hriăm mdê mdê. Dŭm thŭn êgao, adôk dleh dlan, ƀiădah klei muăt bi hriăm ti kdriêk Trường Sa mâo ngă djŏ hdră, 100% phung hđeh hriăm hră mâo mjuăt bi hriăm hŏng klei kjăp, djăp ênoh čuăn. Kluôm kdriêk mâo 3 boh sang hră gưl sa, mâo iêo ruah phung nai mtô, dưi nao mtô hŏng klei jăk. Nai mtô Nguyễn Hữu Phú, nai ti sang hră gưl sa Song Tử Tây, kdriêk Trường Sa brei thâo:

 “Mkŏ mjing adŭ mkruôp mbĭt, hlăm adŭ mâo klei thâo săng mdê mdê, klei mtô jing dleh mơh, dleh suăi hĭn hŏng drei mtô ti lăn hang. Ti plao ksĭ kbưi hŏng găp djuê, ênguôt pưk sang, kyua boh klei hlăm plao ksĭ msĕ mơh. Pô duh myơr jih ai tiê klei hdĭp kơ lăn čar. Ayŏng adei, lĭng kahan, lehanăn mnuih ƀuôn sang tinei mđing uêñ kơ pô mơh”.

Klei bi mlih prŏng êdi kdriêk plao ksĭ Trường Sa hlăm thŭn êgao dôk tuôm hŏng klei dleh dlan kơ pưk sang. Êngao kơ 3 boh sang hră, hlăm plao ksĭ mâo leh  10 boh sang êa drao, 9 boh sang yang, 2 boh sang dhar kreh, 1 boh kdrŭn ksĭ, 1 boh tač êdeh phiơr, 2 ƀuôn phung trah mă kan 100% sang kơ phung ƀuôn sang mâo mkra kjăp, siam, mâo djăp kdrăp hâo hưn, êlan klông mâo mkra hŏng betong, mâo brŏng mgơ̆ng êa kba djăp ênŭm sơăi. Boh nik, mâo mkra kdrăp bi êran pui kmlă hŏng ai angĭn, hŏng pil yang hrue dưi duh bi liê mkra mjing ngă bi mlih klei jing hlăm klei hdĭp mda hlăm plao ksĭ, lŏ bi kjăp hĭn klei răng mgang plao ksĭ. Trung tá Trần Danh Hoàng, Khua kiă kriê plao ksĭ Sinh Tồn brei thâo:

 “Kdrăp bi êran pui kmlă doh mâo mkŏ mdưm, dưi ba yua leh hŏng klei jăk, amâo lŏ ktrŏ kơ klei bi liê hlăm bruă bi êran môtơr pui ôh, amâo mâo ba klei jhat kơ wăl hdĭp mda ôh, lehanăn kăn ktrŏ kơ ayŏng adei mă bruă rei. Đru kơ mnuih ƀuôn sang, lĭng kahan hlăm plao ksĭ mdul sa kdrêč rơ̆ng dưi đru leh kơ klei hdĭp mnuih ƀuôn sang lehanăn mprăp ai tiê kơ klei bi blah hlăm plao ksĭ”.

Dŭm gŏ êsei mnuih ƀuôn sang hdĭp hlăm plao ksĭ mâo leh bruă sang čư̆ êa ktrâo atăt, đru ba, mjing djăp klei găl mđĭ kyar klei hdĭp mda, rông mnơ̆ng lehanăn dlăng kriê mnơ̆ng pla, hiu trah mă kan bi djŏ hŏng klei jing hlăm êa ksĭ. Grăp gŏ êsei hdĭp mda hlăm sa boh sang prŏng hlăm brô 70 m2 mâo mkra siam lehanăn kjăp, mâo adŭ čhưn, dua boh adŭ pĭt, sang pui lehanăn jhưng đih, hip, tivi… Nguyễn Thị Lan, mnuih ƀuôn sang hdĭp ti să Song Tử Tây, kdriêk Trường Sa, čar Khánh Hòa brei thâo: Ară anei ti kdriêk mâo leh djăp sang hră, sang dhar kreh, mâo dlăng kriê klei suaih pral hŏng klei jăk, mâo duh mĭng kjăp kơ klei hdĭp mda ala ƀuôn, đru kơ mnuih ƀuôn sang hơĭt ai tiê păn kjăp bruă kiă kriê êa ksĭ, plao ksĭ:

 “Hmei ƀuh klei hdĭp bŏ hŏng klei êđăp ênang, knŏng pô gĭr duah ƀơ̆ng, trah mă kan giăm hŏng hang, pioh kơ klei hdĭp mda. Lač jăk êdi kơ klei dŭm anôk bruă êpul êya mơ̆ng lăn hang mđĭ ai nanao lehanăn bi đru ba kơ klei hdĭp ti plao ksĭ anei mâo djăp ênŭm hĭn”.

 Kdriêk pla ksĭ Trường Sa, čar Khánh Hòa ară anei mâo duh bi liê mkra leh 4 boh kban kơ hô̆ pui jưh ti kdrŭn ksĭ: Song Tử Tây, Đá Tây, Trường Sa, Sinh Tồn mbĭt hŏng jih jang bruă kơ klei trah mă kan. 5 thŭn êgao, kđông kahan răng mgang knông lăn Trường Sa mâo tŭ jum leh truh 390 gưl boh hŏ pui hŏng giăm  6.000 čô mnuih nao kdê hlăm kƀhŏk hô̆ kdê, truh êbeh 440 phung đĭ hlăm hô̆ mran mâo dŏng mtlaih kyua mâo klei truh hlăm êa ksĭ. Nguyễn Đức Toàn, pô trah mă kan hlăm wăl Trường Sa brei thâo, jih jang dŭm anôk hô̆ pui mŭt kdê mâo mkra leh hŏng klei kjăp, đru kơ phung trah mă kan hơĭt ai tiê hlăm jih jang bruă hiu trah mă kan, đru mkăp kơ dŭm bruă nah tluôn, čiăng kơ phung trah mă kan dôk hiu trah sui hlăm êa ksĭ, bi hrŏ mơh ênoh bi liê hlăm grăp blư̆ hiu hlăm êa ksĭ:

 “Hô̆ mrâo kâo djiê hĕ amâo mâo lŏ yơ̆ng, kbưi hŏng plao ksĭ hlăm brô dŭm êwang đuič snăn pô iêo đĭng blŭ akâo klei đru mơ̆ng lăn hang. Lăn hang hmư̆ klei anăn, lŏ hưn kơ plao ksĭ, mâo êpul hô̆ pui ti plao ksĭ kbiă nao đoh ba wĭt mkra. Klei msĕ snăn jing lu snăk”.

         Lŏ dơ̆ng mkŏ mjing bruă kđĭ čar hŏng klei kjăp, lehanăn đru bi hơĭt klei hdĭp mda mnuih ƀuôn sang hlăm plao ksĭ dôk hlăm dŭm boh să, wăl krah hlăm kdriêk Trường Sa jing sa hlăm dŭm bruă čiăng mđĭ kyar čar Khánh Hòa. Hluê ngă hdră mtrŭn mrô 09/2022 mơ̆ng phŭn bruă kđĭ čar kơ bruă mkŏ mjing lehanăn mđĭ kyar, ru mdơ̆ng čar Khánh Hòa truh thŭn 2030, tă hdră truh kơ thŭn 2045, kdriêk plao ksĭ Trường Sa hlăk hlê mkŏ mkra kdrăp bi êran pui kmlă, kdrăp kar êa kba ti hnơ̆ng prŏng, bi mguôp hŏng bruă rŭ mkra bruă nah gŭ kơ bruă trah mă kan. Mơ̆ng anăn mjing atur kjăp kơ mnuih ƀuôn sang hlăm bruă trak kan, mđĭ kyar klei hdĭp mda, lehanăn iêo jak êpul hô̆ mran trah kan mơ̆ng dŭm čar ktue hang ksĭ truh hŏng   Trường Sa. Čar Khánh Hòa bi mguôp leh hŏng phŭn bruă lŏ hma lehanăn dŭm dhar bruă djŏ tuôm ba yua, lehanăn hlue ngă dŭm klei bhiăn bi đru kơ mnuih trah kan, lehanăn mkŏ mjing bruă trah mă kan hlŏng bi čhĭ mnia ti dŭm boh ƀuôn trah mă kan hlăm plao ksĭ mtam. Lê Đình Hải, Khua knơ̆ng bruă sang čư̆ êa kdriêk Trường Sa, čar Khánh Hòa brei thâo, kdriêk Trường Sa mă klei mkŏ mkra bruă kđi čar mjing knơ̆ng čiăng mđĭ hŏng klei kjăp, tuh êyuh jih bruă mđĭ kyar klei hdĭp hlăm duh mkra, dhar kreh, yang ƀuôn rơ̆ng kơ klei hdĭp mnuih ƀuôn sang hnŭk ênang, mdrơ̆ng hŏng yan adiê, dŏng đru mnuih mâo klei truh:  

 “Lĭng kahan lehanăn mnuih ƀuôn sang ti kdriêk Trường Sa bi klă leh ai tiê klei mĭn pô, păn kjăp klei đăo knang mbĭt hŏng kluôm ala hlăm bruă prŏng ti êa ksĭ. Bi năng hŏng klei Đảng lehanăn mnuih ƀuôn sang jưh knang. Boh nik, lĭng kahan, lehanăn mnuih ƀuôn sang kdriêk Trường Sa hur har hlue ngă hdră kjăp mđĭ kyar duh mkra ala ƀuôn lehanăn răng mgang klei êđăp ênang. Rŭ mdơ̆ng kdriêk Trường Sa jing anôk phŭn kơ bruă duh mkra, dhar kreh, yang ƀuôn hlăm êa ksĭ kluôm ala, jing mnư̆ mnang kjăp kơ bruă răng mgang klei dưi êngiê wăl êa ksĭ plao ksĭ lăn čar pô”./.