Mmông aguah yan mdei prŏng ti să knông lăn Ia Dom (čar Gia Lai), ung mô̆ ayŏng Kpuih Đin, ti ƀuôn Bi, hơ̆k mơak drông nai mtô anak ñu mbĭt hŏng knuă druh să nao čhưn. Klei mơak mơ̆ng gŏ sang ñu jing adei Ksor Đam dưi nao mŭt hriăm ti sang hră Knŭk kna rông ba mlir gưl hriăm gưl 1 leh anăn gưl 2 Ia Dom hlăm thŭn hriăm mrâo 2026 - 2027. Anăn jing klei hơ̆k mơak prŏng hŏng gŏ sang ƀun ƀin msĕ si ayŏng Đin. Mơ̆ng thŭn hriăm kơ anăp, êjai mŭt hriăm adŭ 8, adei Ksor Dam srăng dưi nao hriăm, huă ƀơ̆ng leh anăn hdĭp ti sang hră, đru kơ gŏ sang ayŏng Đin hơĭt ai tiê.

"Kâo ƀuh mơak êdi kyua sang hră mkŏ mjing klei găl kơ anak dưi nao hriăm. Mô̆ kâo rông anak điêt, bi kâo nao mă bruă mưn kơ arăng. Brei anak nao hriăm ti sang hră Knŭk kna rông ba čiăng dưi mâo klei uêñ mĭn, brei ñu uêñ kơ klei hriăm hră mơar, thâo lu, êdei anăp amâo mâo knap mñai ôh”.

Klei hơ̆k mơak anăn ăt mâo hlăm lu gŏ sang ti ƀuôn Bi, să Ia Dom. Amai Triệu Thị Say, mnuih djuê ana Dao brei thâo, lu thŭn êgao, grăp hruê anak nao sang hră găn êlan dơ̆ng mrô 19 jing grăp hruê amai čang guôn nanao. Êjai thâo anôk dơ̆ng dưi nao hriăm leh anăn dôk ti sang hră, jih gŏ sang amai hơ̆k mơak êdi.

 “Kâo kreh nao mă bruă găn anôk anăn, kâo mdei êdi leh anăn iêp dlăng ƀuh mơak êdi. Dŭm boh sang siam, anak pô nao sang hră ƀuh jăk êdi. Nao hriăm ti sang hră Knŭk kna rông ba kâo ƀuh hơĭt ai tiê, phung nao hlăm sang hră, mâo pô răng mgang, mâo anôk huă ƀơ̆ng, anôk dôk, huă ƀơ̆ng ăt djăp ênŭm mơh.”

Să knông lăn Ia Dom mâo êbeh 9.000 čô mnuih ƀuôn sang ti 7 alŭ, ƀuôn, hlăm anăn mnuih djuê ƀiă mâo êbeh 34%. Alŭ wăl prŏng, lu alŭ ƀuôn kbưi hŏng wăl krah, mâo anôk hđeh sang hră nao giăm 20km truh ti sang hră. Mâo lu phung hđeh sang hră grăp hruê ti êlan dơ̆ng 19 hŏng ênoh lu êdeh êdâo, arưp mâo lu klei ngă luč klei êđăp ênang hlăm êlan klông.

Kyuanăn yơh, bruă rŭ mkra sang hră Knŭk kna rông ba dưi dlăng jing klei mblang kơ dŭm klei dleh dlan sui ti krĭng knông lăn, mơ̆ng klei kbưi, klei găl bruă duh mkra truh kơ klei hđeh kbiă sang hră. Nguyễn Văn Tiến, k’iăng khua Bruă sang čư̆ êa dă Ia Dom, čar Gia Lai brei thâo, să mâo 272 čô hđeh mơ̆ng adŭ 4 - 9 dưi ruah mŭt hriăm sang hră Knŭk kna rông ba. Lu phung hđeh jing anak čô gŏ sang Knŭk kna dlăng ba, hđeh sang hră mnuih djuê ƀiă gŏ sang ƀun, giăm ƀun, hđeh êrĭt amĭ ama amâodah mâo sang kbưi hŏng sang hră. Êngao kơnăn, 876 čô hđeh sang hră mkăn dưi huă yang hruê. Să ăt bi kluôm klei kiă kriê leh anăn phung nai, dưi drông phung hđeh nao hriăm mơ̆ng dŭm hruê akŏ thŭn hriăm mrâo.

"Hŏng boh klei phung nai, êlâo hĭn jing rơ̆ng kơ dŭm klei mđing tal êlâo kơ sang hră Knŭk kna rông ba čiăng rơ̆ng klei ngă bruă. Tal 2 jing srăng hluê si klei thâo, ênoh phung nai hlăm grăp mta hriăm. Mtrŭt mjhar mđing tal êlâo hŏng dŭm sang hră Knŭk kna rông ba jing phung nai jĕ giăm, dôk mda asei čiăng đru hlăm klei kiă kriê phung hđeh êngao mmông hriăm, yang hruê leh anăn mmăt mlam.”

Phạm Văn Nam, Khua knơ̆ng bruă sang hră mơar čar Gia Lai brei thâo, ară anei, knơ̆ng bruă bi mguôp hŏng Bruă sang čư̆ êa 7 să knông lăn bi kluôm hdră êlan čiăng hưn mdah hŏng gưl bruă mâo klei dưi bi klă. Mbĭt anăn, dhar bruă ksiêm dlăng ênoh phung hđeh, tĭng mkra ênoh phung nai, bi mguôp hŏng knơ̆ng bruă kiă kriê bruă knuă dăp êpul knuă druh kiă kriê, phung nai djŏ klei čuăn.

"Hŏng ênoh phung nai ară anei, hmei srăng tĭng mkă bi mguôp hŏng knơ̆ng bruă kiă kriê bruă knuă hưn hŏng Bruă sang čư̆ êa čar bi mbŏ ênoh nai čiăng rơ̆ng djŏ hŏng hdră kčah, bi mâo djăp bruă mtô bi hriăm. Bi kơ phung tŭk knă, hmei bi mguôp hŏng sang hră gưl krah Gia Lai, ară anei dôk mkŏ mjing adŭ mtô tŭk knă čiăng mâo êpul mă bruă tŭk knă đru kơ klei rông ba, kriê dlăng kơ phung hđeh hlăm wưng kơ anăp.”

Dŭm hruê yan mdei prŏng, mbĭt hŏng hdră 90 hruê mlam mtrŭt bi pral hdră rŭ mkra 7 sang hră Knŭk kna rông ba mlir gưl hriăm ti dŭm să Yŭ čar Gia Lai, bruă ruah hđeh, dăp mnuih mă bruă leh anăn mprăp klei găl ngă bruă ăt dưi ngă mjêč. Jih jang dŭm sang hră Knŭk kna rông ba krĭng knông lăn ba mbĭt klei hmăng hmưi kơ bruă krơ̆ng phung hđeh nao sang hră, bi hrŏ klei kpleh bruă mtô bi hriăm ti krĭng găl leh anăn krĭng dleh dlan. Mơ̆ng nei, lu phung hđeh hđiêt mnuih djuê ƀiă srăng mâo thiăm klei găl dưi hriăm, rông ba dŭm klei hmăng hmưi leh anăn pŏk êlan nao bi mlih êdei anăp hŏng klei hriăm.