Ƀuôn hgŭm Vĩnh Phước jing sa hlăm ƀuôn hgŭm ktuê hang ksĭ mơ̆ng wăl krah Vĩnh Châu. Lu thŭn êgao, bruă Đảng ƀuôn hgŭm kñăm nanao kơ bruă mđĭ kyar đảng viên, hlăm anăn mâo bi mŭt phung đảng viên jing mnuih djuê ƀiă.

K’iăng khua bruă Đảng ƀuôn hgŭm Vĩnh Phước Nguyễn Thanh Tùng brei thâo, grăp thŭn, hlue si tur knơ̆ng, hdră kčah, bi klă jao hnơ̆ng čoh čuăn ăt msĕ hŏng dŭm hră mơar mơ̆ng bruă Đảng wăl krah kơ bruă mđĭ kyar đảng viên, Bruă Đảng ƀuôn hgŭm kñăm hluê ngă lu hdră êlan čiăng mđĭ ênoh, hnơ̆ng tŭ jăk bi mŭt đảng viên, hlăm anăn, mkŏ mjing dŭm hră mơar gĭt gai, klei bi klă jao hnơ̆ng čuăn bi mŭt đảng viên kơ dŭm anôk bruă mơ̆ng akŏ thŭn, mbĭt anăn ngă jăk bruă mkŏ mjing ai dưi čuăl mkă mđĭ kyar đảng viên:

Phung hmei kñăm jing phung êdam êram, phung hgŭm hlăm êpul, leh anăn phung êdah êdi, boh nik uêñ mĭn kơ mnuih djuê ƀiă ti alŭ wăl ƀuôn hgŭm. Boh tŭ klei ksiêm dlăng bi mbŏ hdră cuăl mkă. Bi kơ hdră čuăl mkă thŭn 2022 anăn hlăm ênoh 27 čô, ba nao mtô mjuăt ti dŭm adŭ hriăm mâo 21. Boh tŭ jing hmei mđĭ kyar 17/16 mkă hŏng hdră kčah gưl dlông jao, mâo 106%, hlăm anăn đảng viên jing mnuih djuê ƀiă mâo 9 čô, mâo êbeh 52%.

Dŭm gưl đảng viên mda asei ti ƀuôn hgŭm Vĩnh Phước dưi hriăm mjuăt, hriê kơ prŏng mơ̆ng nah gŭ. Hŏng dŭm hdră bruă mơ̆ng êpul êdam êra, bruă êpul, lu phung êdah êdi dưi hưn mdah leh anăn bi mŭt hlăm Đảng. Amai Ngô Thảo Trang jing khua bruă êdam êra Khóm Xẻo Me, ƀuôn hgŭm Vĩnh Phước, wăl krah Vĩnh Châu. Amai Trang jing khua bruă êdam êra čŏng pô nao mbĭt hŏng nah gŭ, ksiêm hriăm lu hdră êlan čiăng bi kƀĭn phung êdam êra, mtô kơ klei ngă bruă. Amai kñăm nanao kơ bruă rơ̆ng leh anăn mđĭ hnơ̆ng tŭ jăk bruă êdam êra, hmao thâo klă klei mĭn, klei hmăng hmưi mơ̆ng phung êdam êra. Mơ̆ng anăn, amai mbĭt hŏng alŭ wăl mkŏ mjing lu mta bruă klă klơ̆ng leh anăn tŭ dưn hlăm dŭm mta bruă msĕ si: Hdră bruă hđeh êdam êra čŏng ngă bruă, myơr êrah, hdơr knga tla ai, nao êlâo mđĭ kyar bruă duh mkra…Leh 2 thŭn hluê ngă leh anăn hriăm mjuăt, amai Trang dưi čuăl mkă bi mŭt hlăm Đảng. Amai Ngô Thảo Trang hơ̆k mơak yăl dliê:

Ară anei kâo hriăm jih leh adŭ thâo săng kơ Đảng, hlăm wưng kơ anăp kâo srăng amâo mâo mdei mđĭ klei thâo săng, hluê hriăm, kah mbha klei thâo thơ̆ng kơ bruă kđi čar čiăng bi kluôm asei pô leh anăn bi leh jăk bruă klam dưi jao čiăng dưi dôk hlăm êpul bruă Đảng.

Jing alŭ wăl wăl mâo lu mnuih djuê ƀiă ti čar Sóc Trăng, djuê ana Khmer mâo êbeh 52%, djuê ana Hoa êbeh 17% hlăm kluôm wăl krah, hlăm dŭm thŭn êgao, Bruă Đảng wăl krah Vĩnh Châu kñăm nanao ơ bruă mđĭ kyar đảng viên krĭng mnuih djuê ƀiă leh anăn dlăng anei jing bruă klam jêñ jêñ, yuôm bhăn. Bruă Đảng wăl krah Vĩnh Châu ară anei mâo 42 anôk bruă Đảng hlăm 10 să, ƀuôn hgŭm, 5 anôk bruă Đảng dhar bruă leh anăn 27 anôk bruă Đảng dhar bruă nah gŭ, mâo 207 anôk bruă Đảng nah gŭ. Hluê anăn alŭ wăl mâo êbeh 4.200 čô đảng viên, hlăm anăn mo êbeh 1.700 čô đảng viên jing mnuih djuê ƀiă. Hluê si k’iăng khua bruă Đảng wăl krah Vĩnh Châu Phan Thị Xinh Hưởng, đảng viên jing mnuih djuê ƀiă jing êpul êya đru mguôp yuôm bhăn hlăm klei đĭ kyar wăl krah, diñu jing phung mâo kơhưm, jing phung bi hmô, nao êlâo hlăm bruă mkŏ mkra krĭng ƀuôn sang mrâo. Amai Phan Thị Xinh Hưởng brei thâo:

“Hlăm wưng kơ anăp, Êpul khua bruă Đảng wăl krah Vĩnh Châu ăt bi klă mkŏ mjing ai dưi mđĭ kyar đảng viên hlăm krĭng mnuih djuê ƀiă jing sa bruă klam dưi uêñ mĭn leh anăn kluôm. Thŭn 2023 Êpul khua bruă Đảng wăl krah Vĩnh Châu hluê ngă leh đa đa hdră êlan čiăng mđĭ kyar phung đảng viên krĭng mnuih djuê ƀiă”.

Hŏng dŭm hdră ngă bruă hŏng klei mbruă, klei mđĭ kyar đảng viên jing mnuih djuê ƀiă ti wăl krah Vĩnh Châu dưi ba wĭt lu boh tŭ dưn klă klơ̆ng. Klei anăn dưi bi klă hŏng dŭm mta bruă klă sĭt, bruă kđi čar, êpul bruă Đảng kjăp ktang, bi êdah klă bruă klam gĭt gai mnuih ƀuôn sang hlăm klei mđĭ kyar bruă duh mkra, dhar kreh, yang ƀuôn, răng mgang klei êđăp ênang alŭ wăl.