Ti čar Dak Lak mơ̆ng hruê 6 – 8/1, Êpul hgŭm mnuih mă bruă Việt Nam bi mguôp hŏng êpul hgŭm mnuih mă bruă čar Dak Lak mkŏ mjing hdră “Anôk čhĭ mnia Tết công đoàn năm 2023”. Anei jing bruă ngă klă klơ̆ng đru kriê dlăng klei hdĭp mnuih mă bruă mâo klei hdĭp dleh dlan, gŏ sang ƀun ƀin, amâo mâo lui kơ sa čô ti tluôn êjai Tết hriê, yan mnga truh. Djă ti kngan dŭm mta mnơ̆ng mrâo blei hlăm anôk mnia mblei anăn, ayŏng Nguyễn Hữu Lâm Sơn, sa čô mă bruă ti knơ̆ng bruă riă msei, anôk bruă tuh tia Hoà Phú brei thâo:

 “Kâo mâo arăng brei 2 pŏk hră 150 êbâo blei huôm kñĭt anei, hnư mnơ̆ng hŏng ênoh 0 prăk mâo sa boh gŏ tŭk êa sa giêt êa prăi leh anăn sa blah ao.”

Gưl tal êlâo nao hlăm anôk mnia mblei “Tết Công đoàn”, amai Nguyễn Thị Phượng, sa čô mnuih mă bruă mơ̆ng Knơ̆ng bruă wăl hdĭp mda ƀuôn prŏng čar Dak Lak lač, bruă anei dưi đru kơ mnuih mă bruă mâo klei găl blei ba yua lu mta mnơ̆ng dhơ̆ng tết hŏng ênoh êlưih hĭn:

         “Thŭn anei jing gưl tal êlâo kâo hriê mă hnư mnơ̆ng anei. Kâo ƀuh klei mơak mñai êdi. Dŭm hnư mnơ̆ng anei đru kơ gŏ sang kâo mâo thiăm sa wưng tết yâo mơak.”

           Anôk mnia mblei Tết Công đoàn 2023 čar Dak Lak mkŏ mjing mơ̆ng hruê 6 – 8/1/2023, mâo 40 anôk čhĭ mnia, čhĭ dŭm mta mnơ̆ng bi djăp ênŭm klei čiăng blei ba yua hŏng ênoh êlưih amâodah amâo mâo mă prăk brei kơ êbeh 3.000 čô mnuih mă bruă. Mbĭt anăn, Êpul hgŭm mnuih mă bruă čar Dak Lak ăt mđup brei 400 hnư mnơ̆ng kơ mnuih mă bruă, mkŏ mjing dŭm mta bruă dhar kreh, kdŏ mmuñ, hlăp lêñ, dŭm mta bruă đru hâo hưn klei bhiăn ala čar, mkă dlăng, mdrao klei ruă leh anăn mbha êa drao amâo mâo mă prăk kơ phung mă bruă. Nguyễn Công Bảo, khua kiă kriê Êpul hgŭm mnuih mă bruă čar Dak Lak brei thâo:

 “Anôk mnia blei Công đoàn jing hdră kriê dlăng kơ mnuih mă bruă, anei jing gưl tal êlâo Công đoàn čar dưi mkŏ mjing Anôk mnia blei Công đoàn, phŭn kčưm kâo ăt uêñ mĭn, ƀiădah mâo klei đru mơ̆ng Êpul hgŭm kluôm mnuih mă bruă, klei uêñ mĭn, ktrâo lač mơ̆ng bruă Đảng čar, klei bi mguôp mơ̆ng dŭm dhar bruă, anôk bruă djŏ tuôm leh anăn boh nik jing klei gĭr mơ̆ng ayŏng amai adei công đoàn dŭm gư, hmei hmao hluê ngă, mtrŭt mjhar giăm 40 anôk bruă nao hgŭm hlăm anôk mnia mblei.”

            Dak Lak jing sa hlăm 22 alŭ wăl mâo Êpul hgŭm mnuih mă bruă Việt Nam čuăn ruah mkŏ mjing “Anôk mnia mblei công đoàn thŭn 2023”. Hluê si aduôn Trần Thị Thanh Hà, khua hlăm Êpul khua gĭt gai, khua êpul mjĕ giăm klei mă bruă, Êpul hgŭm mnuih mă bruă Việt Nam, anei jing bruă ngă klă klơ̆ng mơ̆ng Công đoàn đru kah mbha čiăng kơ dŭm gŏ sang đoàn viên, mnuih mă bruă mâo klei hdĭp dleh dlan dưi mơak yan mnga, drông tết trei mđao yâo mơak:

 “Dŭm anôk mnia blei Tết Công đoàn thŭn anei dưi mkŏ mjing hŏng hnơ̆ng mơ̆ng 30 – 120 anôk čhĭ mnia kơ dŭm alŭ wăl, ti năn mâo dŭm anôk mnia blei hŏng ênoh 0 prăk leh anăn boh nik Êpul hgŭm mnuih mă bruă Việt Nam mâo mơ̆ng 2500 – 3000 vocher kơ grăp anôk čhĭ mnia leh anăn grăp vocher jing 300 êbâo prăk čiăng kơ mnuih mă bruă dưi yua pioh blei mta mnơ̆ng dhơ̆ng ti anôk anei, boh nik hmei ăt iêo mkrum dŭm anôk čhĭ mnia mơ̆ng gưl dlông leh anăn alŭ wăl ba truh dŭm mta mnơ̆ng dhơ̆ng mâo hnơ̆ng tŭ jăk hŏng hnơ̆ng bi hrŏ ênoh mơ̆ng 10 truh kơ 50, 70% čiăng kơ mnuih mă bruă mâo sa wưng tết trei mđao yâo mơak hĭn.”

            Ti wăl anôk mkra mjing Linh Trung 1, ƀuôn prŏng Hồ Chí Minh, công đoàn dŭm anôk mkra mjing ăt mkŏ mjing hruê knăm Klei khăp – tết bi hgŭm thŭn 2023 kñăm kriê dăng dŭm pluh êbâo čô mnuih mă bruă dleh dlan. Hruê knăm mkŏ mjing hŏng lu mta bruă klă klơ̆ng. Brei kơ phung mă bruă dŭm pŏk hră blei mnơ̆ng čiăng mlih hŏng mnơ̆ng ƀơ̆ng, mnơ̆ng yua hlăm gŏ sang čiăng đru kơ dŭm gŏ sang wưng tết. Êngao kơnăn, hdră ăt mđup brei hră đĭ êdeh phiơr, êdeh treng, êdeh ôtô, hnư mnơ̆ng tết kơ phung mă bruă mâo klei hdĭp dleh dlan. Pô mă bruă Nguyễn Thị Thiết, ti knơ̆ng bruă Freetrend, ƀuôn phŭn ti Quảng Trị dưi mâo hră đĭ êdeh treng wĭt kơ ƀuôn sang kơ jih gŏ sang hơ̆k mơak brei thâo:

   “Anei jing gưl tal êlâo kâo mâo dŭm pŏk hră đĭ êdeh klei khăp anei leh 3 thŭn mă bruă. Hŏng hră đĭ êdeh ani tơdah blei ăt êbeh 2 êklăk prăk leh, ară anei arăng brei dŭm pŏk hră đĭ êdeh anei đru mdul kơ kâo lu lĭn. Amâo djŏ knŏng kâo ƀiădah wăt kơ gŏ sang kâo dưi hrăm mbĭt wĭt ƀơ̆ng tết.”

            Hluê si klei mĭn tĭng, Công đoàn anôk mkra mjing, wăl anôk bruă tuh tia ƀuôn prŏng Hồ Chí Minh srăng kriê dlăng kơ êbeh 30.000 čô đoàn viên, mnuih mă bruă hŏng dŭm hdră msĕ si: Hruê knăm mnuih mă bruă, anôk mnia blei klei khăp, Tết bi hgŭm, bi tuôm hŏng mnuih mă bruă, mđup brei hră đĭ êdeh phiơr, êdeh treng, êdeh ôtô, khăp ƀŭk, mkra k’kâo jơ̆ng kngan amâo mâo mă bruă, mđup brei boh hră čih, bi lông mmuñ karaoke… hŏng kluôm ênoh êbeh 20 êklai prăk.