VOV4.Êđê - Hlăm wưng giăm anei, hŏng dŭm knhuang đĭ kyar mrâo hlăm bruă kdrăp hâo hưn, ba yua mrô čiăng kriê pioh, kriê dlăng ênoh yuôm dhar kreh jing hdră ngă mâo dŭm anôk bruă knŭk kna leh anăn êpul bruă êngao knŭk kna khăp kơ ênoh yuôm djuê ana ba yua. Mkŏ mjing hdră mrô mbĭt hlăm bruă dhar kreh ăt jing sa hlăm hdră kñăm dưi mđing truh sĭt pŏk ngă Hdră bruă mrô 6 “Kriê pioh, mđĭ lar ênoh dhar kreh jăk siam mơ̆ng dŭm djuê ƀiă hŏng klei mđĭ kyar hiu čhưn ênguê, hlăm hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă

Čar Thái Nguyên dưi thâo jing ƀăng jang mjĕ êrô bruă duh mkra ala ƀuôn ti krah krĭng čư̆ čhiăng hŏng krĭng dap mnai kwar Dưr, leh anăn mâo truh 46 djuê ƀiă hdĭp mda. Mđrĭng hŏng bruă, Thái Nguyên ăt mâo mnơ̆ng kriê pioh dhar kreh djuê lu snăk leh anăn lu jơr.

Ti Sang kriê pioh čar Thái Nguyên, wưng anei, dŭm hdră msir ba yua kdrăp mrâo mkăn msĕ si kdrăp čih kač 3D, dưm mrô mnơ̆ng dhơ̆ng grăp knhuang bi hrô kơ hdră kriê dlăng mơ̆ng đưm, hŏng êbeh 32 êbâo mta mnơ̆ng hlăk dưi kriê pioh tinei. Lương Thị Duyên, K’iăng Khua Sang kriê pioh brei thâo: Hmei thâo săng anei jing bruă ngă čiăng êdi, ñu đru kơ sang kriê pioh mâo klei găl dưi hưn mthâo kơ phung tuê hiu čhưn dlăng dŭm mta mnơ̆ng ară anei dôk kriê pioh tinei. Leh anăn ăt ênưih đru hlăm bruă ba yuam ksiêm dlăng klei hâo hưn, hưn mthâo hŏng mnuih ƀuôn sang.

Hluê si phung ksiêm hriăm, bruă ba yua kdrăp mrâp djŏ guôp hŏng bruă kriê pioh, mđĭ lar ênoh yuôm mnơ̆ng kriê pioh. Leh ba yua mrô, kdrăp mrâp djŏ guôp ênai mñê, klei mmuiñ, pŏk rup, boh nik ênai thâo hmư̆ leh anăn rup jăk siam, mâo lu mnuih khăp. Thiăm hlăm anăn, dŭm mta mnơ̆ng kriê pioh mâo wăt mnơ̆ng êdah klă leh anăn amâo êdah klă hlăm ênoh mrô dưi hưn mdah pral hlăm internet, amâo kčah ôh kơ hruê mmông, anôk, klei blŭ. Hŏng Thái Nguyên, ba yua mrô hlăm mnơ̆ng kriê pioh ăt mrâo dưi mđĭ hlăm wưng giăm anei. Boh nih mơ̆ng leh Anôk bruă Đảng čar mâo Hdră mtrŭn mrô 01 kơ klei mlih mrô. Hluê si amai Nguyễn Thị Trang, Khua Adŭ bruă dhar kreh - hâo hưn kdriêk Phú Bình, čar Thái Nguyên, hŏng sa hdră lu jơr dŭm mta mnơ̆ng kriê pioh hlăk mâo, mđĭ ktang ba yua kdrăp mrâo hlăk mâo dŭm dhar bruă, alŭ wăl, anôk bruă gĭr tŭ mă leh anăn mđing hluê ngă. Hlăm hdră bi mlih mrô djŏ tuôm kơ bruă dhar kreh, snăn Knơ̆ng bruă sang čư̆ êa kdriêk ăt bi mklă kƀĭn bi mlih dŭm mta bruă mnơ̆ng kriê pioh leh anăn srăng mđing bi mlih mrô kơ mnơ̆ng kriê pioh gưl ala čar čiăng kơ mnuih ƀuôn sang alŭ wăl leh anăn tuê hiu čhưn hŏng ƀĭng găp hlăm ala čar, quốc tế ăt thâo.

Ară anei ti alŭ wăl čar Thái Nguyên mâo êbeh 800 mnơ̆ng kriê pioh, anôk jăk siam êbeh 500 mta mnơ̆ng dhar kreh amâo êdah klă, hlăm anăn mâo 17 mta mnơ̆ng dhar kreh ala čar amâo êdah klă, hŏng dŭm êbâo mta mnơ̆ng hlăk dưi kriê pioh hlăm Sang kriê pioh ala čar. Čiăng mđĭ hnơ̆ng jăk bruă kriê dlăng leh anăn hưn mdah bruă dhar kreh, mjuăt ktang asei mlei leh anăn hiu čhưn ênguê ăt kčah hdră klă klơ̆ng čiăng hnưm bi leh bruă ba yua kdrăp mrô, đru kriê pioh, mđĭ lar ênoh yuôm dhar kreh ti alŭ wăl.

Ară anei, êpul êya 53 djuê ƀiă hlăk mâo êbeh 14 êklăk čô mnuih, hdĭp mda ti 52 čar, ƀuôn prŏng, kƀĭn ti dŭm krĭng dleh dlan, krĭng knông lăn čar kwar. Boh sĭt brei ƀuh, dưm mrô dhar kreh mnuih djuê ƀiă amâo djŏ knŏng đru mđĭ hnơ̆ng jăk bruă kriê dlăng dhar kreh đuič ôh, ƀiădah lŏ jing kdrăp pioh lar bra dŭm mnơ̆ng yuôm djuê ana hlăm ênuk kdrăp mrâo đĭ kyar.

Hà Việt Quân, Khua adŭ bruă gĭt gai hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng brei thâo, Hdră bruă mrô 6 mâo 19 boh phŭn hŏng ênoh bi liê hlăm brô 5900 êklai prăk. Năng ai dưi lač anei jing gưl tal êlâo mâo sa hdră bruă prŏng snăn kơ bruă dhar kreh djuê ana. Dŭm bruă klă klơ̆ng mđĭng truh kơ klei găl ba klei tŭ dưn kơ klei hdĭp ai tiê, kriê pioh mđĭ lar dŭm knhuah jăk siam, msĕ si mkŏ mjing mrâo klei bhiăn, bi hriăm hlăm sang hră, mkŏ mjing dŭm knăm mơak, leh anăn boh nik yua ênoh mrô mnơ̆ng kriê pioh. Klei yăl dliê kơ bruă ba yua mrô dŭm kdrăp mnơ̆ng kriê pioh dhar kreh snăn Khua phŭn bruă hmei mâo leh klei gĭt gai kơ bruă ksiêm hriăm kơ klei mlih mrô leh anăn ba yua mrô hlăm bruă pŏk ngă hdră kñăm ala čar. Êngao anăn, Khua phŭn bruă ăt mâo klei gĭt gai ksiêm hriăm, bi hgŭm hŏng Phŭn bruă Dhar kreh, dŭm Phŭn dhar bruă djŏ tuôm leh anăn boh nik dŭm alŭ wăl, êpul êya dŭm djuê ƀiă mkŏ mjing sa hdră kriê pioh mrô, čiăng mđĭ lar ăt msĕ mơh hưn mthâo ênoh yuôm dhar kreh djuê ƀiă. Leh anăn mâo sang kriê pioh dưm mrô kơ dhar kreh duh mkra ala ƀuôn, duh kơ bruă mđĭ kyar ênoh yuôm ai tiê leh anăn kơ hdră kñăm mđĭ kyar bruă duh mkra ala ƀuôn hlăm dŭm hdră hiu čhưn ênguê./.

H’Zawut pô mblang