VOV4.Êđê - Khua hlăm Anôk bruă Quốc hội, Khua hlăm Adŭ bruă Êpul hgŭm ruah khua ala čar Bùi Văn Cường mñă klă, hdră ruah pô bi ala Quốc hội gưl XV lehanăn bi ala HĐND wưng thŭn 2021 – 2026 dưi mkŏ mjing tŭ jing. Ênoh mnuih ƀuôn sang kluôm ala nao ruah khua mâo 95,65%, alŭ wăl lu êdi mâo 99,92%, alŭ wăl ƀiă hĭn mâo êbeh 84%. Klei anei bi êdah, lu mnuih ƀuôn sang hlăm kluôm ala, mơ̆ng krĭng lăn dap truh kơ krĭng čư̆ čhiăng, mơ̆ng ƀuôn prŏng truh kơ krĭng ƀuôn sang, krĭng knông lăn, plao ksĭ hơ̆k kdơ̆k nao ruah khua, hluê ngă klei dưi lehanăn bruă klam mơ̆ng pô. Đăo knang hlăm Đảng, Knŭk kna ăt msĕ mơh dưi nao ruah phung bi ala mâo pô đăo knang mŭt hlăm Anôk bruă kiă kriê mơ̆ng knŭk kna, êdah kdlưn jing Quốc hội lehanăn HĐND dŭm gưl. Hŏng ai tiê hơ̆k m’ak, hgŭm mguôp sĭt suôr lehanăn klei đăo knang kjăp hlăm Đảng, Knŭk kna./.

Mbĭt hŏng tar ala čar, êbeh 4 êklăk čô mnuih mplĕ hră hlăm dŭm čar krĭng Lăn Dap Kngư nao leh kơ bruă mplĕ hră ruah pô bi ala Quốc Hội gưl 15 lehanăn HĐND dŭm gưl wưng thŭn 2021-2026. Klei ruah khua dưi mkŏ mjing hŏng ai êwa hruê knăm prŏng. Mâo lu anôk ruah khua mâo truh kơ 100% phŭng nao mplĕ hră. Hŏng klei mprăp kluôm ênŭm, khădah jing krĭng mâo lu alŭ wăl taih kbưi, ƀiădah hruê ruah khua ti krĭng Lăn Dap Kngư ăt mâo klei mơak mñai jing hruê knăm prŏng ala čar. Wăt kơ dôk hlăm anôk bi ktlah, anôk čuăl krĭng kyua mâo klei ruă tưp Covid-19, phŭng mplĕ hră ăt hơ̆k mơak nao ngă klei dưi lehanăn bruă klam jing sa čô mnuih ƀuôn sang. Klei ruah khua ti krĭng Lăn Dap Kngư mâo sơăi klei jăk lehanăn êđăp ênang. Lu alŭ wăl hlăm krĭng Lăn Dap Kngư mâo hnơ̆ng nao ruah khua lu, msĕ hŏng čar Lâm Đồng, mâo 5/12 kdriêk, ƀuôn prŏng mâo hnơ̆ng êbeh 80% ênoh mnuih nao ruah khua. Cát Tiên jing kdriêk taih kbưi hĭn ƀiădah mâo truh kơ 90% ênoh mnuih nao ruah khua. Ti čar Dak Lak, kdriêk Čư̆ Kuiñ, mâo 100% mnuih mplĕ hră nao ruah khua.

H Nêč pô mblang