VOV4.Êđê - Dŭm djuê ƀiă ti Lăn Dap Kngư mâo lu mta djam tam jăk. Ƀiădah čiăng mjing klei mdê anăn, êngao kơ klei thâo mbruă mơ̆ng phung tŭk knă lŏ mâo klei ngă mdê hjăn, anăn jing mnơ̆ng bi mƀăt. Si tô hmô, hŏng mnuih M’Nông ti Dak Nông, sĭt tŭk djam kpŭng, amâo dưi kƀah ôh hla yao.

Mnuih djuê ana Mnông pia hla Rnhao, bi kơ mnuih djuê ana Êđê pia hla êyao. Hŏng mnuih djuê ana M’nông tơdah čiăng tŭk djam lai êyao bâo mgưi amâo dưi kƀah ôh hla êyao.

Djam lai yao mơ̆ng mnuih djuê ana Mnông dưi tŭk hŏng gŏ ƀung mâo dah gŏ msei prŏng čiăng djăp ƀơ̆ng kơ jih gŏ sang. Djam anei mâo lu mnơ̆ng tŭk hlăm anăn, čiăng ƀăt wăt kơ mnuih prŏng lehanăn phung hđeh. Dŭm mnơ̆ng tŭk hlăm djam lai êyao dưi bi mlih tui si pô tŭk, dưi yua dŭm mnơ̆ng mâo hlăm grăp yan msĕ si hla djam biăp, guôl hwiê, knăt êyăñ, knăt plei, mnga êyañ…

Dưi yua dŭm mta kđeh čim msĕ si kđeh čĭm ŭn, klang grưh ŭn, kđeh čĭm êmô, kđeh čĭm mnŭ… khădah hlei čiăng thâo mnâo djam êyao djŏ mơ̆ng mnuih Mnông srăng nao kơ hma, truh kơ dliê tui duah hla êyao ba wĭt tŭk djam.

Ana êyao kreh čăt ti gŭ ana kyâo mkăn, kreh đĭ kơ ana kyâo mkan čiăng hriê kơ prŏng. Hla anei dlăng čiăng msĕ hŏng hla djam biăp, ƀiădah ñu êbơr msĕ hŏng hla êhăng. Hla êyao mâo klei mmih tơdah ƀơ̆ng, mâo mnâo jăk jin. Phung M’Nông ruah pĕ dŭm hlăm mrâo khua čiăng wĭt tŭk djam lai êyao

Klei ba yua hla djam anei hlăm bruă tŭk djam lai êyao ăt mâo klei mdê. Dưi yua wăt hla mtah amâo dah hla leh krô. Kyua mnuih M’Nông kreh bơ̆ng djam lai êyao mbĭt hŏng huă êsei grăp hruê, kyuanăn diñu pioh hĕ hla Yao hlăm sang pui. Khădah tơdah tŭk djam lai yao hŏng hla yao mtah srăng mâo klei mmih lehanăn bâo mngưi hĭn.

Hla yao srăng yua hlăm klei mkra mjing kpŭng. Anei jing mnơ̆ng  amâo dưi kƀah tơdah čiăng tŭk djam lai yao mâo dah djam bâo, dưm 5 truh kơ 10 pŏk hla Yao ba tlê mbĭt hŏng briah leh tram mơ̆ng êlâo leh. Dưm braih hŏng hla yao hlăm sa boh êsung prŏng leh anăn tlê lik, brei diñu bi kma mbĭt.

Tui hlue si mnuih Mnông, braih hŏng hla êyao ktang tlê lik, djam lai êyao anăn srăng ƀơ̆ng jăk hĭn. Hlăm klei tŭk djam lai êyao, leh êa ktơ̆ng srăng dưm dŭm mta kđeh čim, hla djam leh anăn bi ƀăt hra, hbrui mmih. Lehanăn mă braih leh tlê hŏng hla êyao lai hŏng êa tuh brư̆ brư̆ hlăm gŏ djam. Kpŭng braih čiăng mâo klei kdlik kơ djam anăn, hla êyao srăng ngă kơ djam êjai dôk tŭk mâo klei djin, mâo klei mmih lehanăn mnâo bâo mngưi kơ djam lai yao knhuah gru djuê ana.