VOV4.Êđê- Mơ̆ng mlan 7 truh knhal jih thŭn anei srăng mâo ƀiă êdi 50% čô mnuih mơ̆ng 18 thŭn kơ dlông dưi tlŏ vaccin Covid-19. Anei jing klei hâo hưn mơ̆ng Phŭn bruă mdrao mgŭn leh anăn Phŭn bruă lĭng kahan hưn hlăm klei bi kƀĭb tal êlâo mơ̆ng Anôk bruă gĭt gai pŏk ngă tlŏ vaccin Covid-19 thŭn 2021-2022 mkŏ mjing aguah 2-7 ti Hà Nội. Hluê anăn, bruă tlŏ mgang dưi ngă mơ̆ng mlan 7 thŭn anei truh mlan 4 thŭn 2022, hlăm anăn, ƀiă êdi 50% čô mnuih mơ̆ng 18 thŭn kơ dlông dưi tlŏ vaccin hlăm thŭn 2021 leh anăn truh jih gưl 1 thŭn 2022 mâo êbeh 70% mnuih ƀuôn sang dưi tlŏ. Hdră tlŏ vaccin gang mkhư̆ dưi tlŏ hlăm kluôm ala hŏng giăm 19 êbâo anôk tlŏ mgang sa anôk leh anăn êrô hiu. Hlăm anăn, mđing kơ dŭm čar, ƀuôn prŏng dôk mâo klei ruă tưp, mâo lu wăl tuh tia mkra mjing. Hlăm čar, ƀuôn prŏng, tlŏ êlâo kơ phung hlăm krĭng ruă tưp. Mñă klă anei jing hdră tlŏ mgang prŏng hĭn mơ̆ng êlâo truh ară anei, Khua Phŭn bruă mdrao mgŭn Nguyễn Thanh Long brei thâo, srăng bi hgŭm tliêr kjăp hŏng Phŭn bruă lĭng kahan leh anăn dŭm alŭ wăl mơ̆ng bruă tŭ mă, dŭ mdiăng, răng kriê, mbha vaccin, boh nik rơ̆ng êđăp ênang tlŏ mgang jih hnơ̆ng.

Pô mblang: H’Zawut Ƀuôn Yă