VOV4.Êđê- Tlam mmăt hruê 5/8, hnơ̆ng êa drao mdrao klei ruă tưp Covid-19 mâo anăn Remdesivir tal êlâo hĭn dưi ba truh ti tač êdeh phiơr Tân Sơn Nhất. Kyua klei dŭ mdiăng tuôm hŏng lu klei dleh dlan, dŭm hnơ̆ng anei dưi mbha jing lu blư̆ mdiăng, kyua anăn êa drao srăng ba truh hŏng lu gưl. Mĭn tĭng truh kơ hruê kăm êdei, srăng mâo hlăm brô 100 êbâo tŏ êa drao wĭt truh kơ ala čar Việt Nam čiăng dưi hmao brei kơ phŭn bruă mdrao mgŭn yua mjêč hlăm bruă mdrao kơ dŭm čô mnuih mâo klei ruă kjham.

Snăn, ka bŏ sa hruê kăm ôh, êpul group Vingroup dưi blei leh hlăm brô 100 êbâo tŏ êa drao mdrao klei ruă tưp Covid-19. Dŭm adôk srăng dưi mdiăng wĭt hlăm mlan 8 anei mơh. Remdesivir jing sa mta êa drao dưi bi kdơ̆ng hŏng kman dưi mâo leh klei bi mklă mơ̆ng anôk bruă ksiêm dlăng mnơ̆ng ƀơ̆ng huă lehanăn êa drao gŭn Mi hlăm bruă mdrao kơ mnuih mâo klei ruă tưp Covid-19.

Pô mblang: Y-Ƀel Êban