VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19 ti ƀuôn prŏng Hồ Chí Minh lehanăn dŭm čar kwar Dhŭng, dŭm êbâo čô mnuih mă bruă krĭng lăn dap kngư wĭt leh kơ ƀuôn sang pô hŏng êdeh ph’phŭt hluê êlan dơ̆ng prŏng mrô 14. Đĭ dŭm êtuh km hŏng êdeh p’phŭt, đa truh dŭm êbâo km, mdiăng lu mnơ̆ng mnua, đa mâo wăt hđeh đ’điêt, amâo uêñ adiê mlam hlĭm hjan, diñu knŏng čiăng wĭt kơ ƀuôn sang hŏng klei êđăp ênang. Hlăm ktuê êlan anăn, mnuih mă bruă mâo leh êpul bruă djŏ tuôm đru mnơ̆ng ƀơ̆ng, êa mnăm, êa săng, hdră kriê dlăng klei suaih pral lehanăn ksiêm mkă dlăng čiăng bi ktlah mnuih djŏ mâo klei ruă Covid 19.

Anôk ksiêm dlăng ti Cây Chanh, hlăk kdriêk Dak Rlâp, čar Daknông, jing mbah tal êlâo đĭ hriê kơ Lăn Dap kngư, snăn anei jing klei ktrŏ kyuadah mnuih kluh wĭt knư̆ hrue knư̆ lu. Kñăm čiăng bi hrŏ klei kpăk đuôm hlăm êlan, ênưih truh kơ klei bi mtưp, êpul bruă djŏ tuôm pral mbha klông êlan, lehanăn ksiêm dlăng kjăp klei suaih pral čiăng hrŏng, mă ba bi ktlah tơdah mâo. Phan Nhật Thanh, khua knơ̆ng bruă sang čư̆ êa kdriêk Dak Rlâp brei thâo:

“Ti anôk ksiêm dlăng ti Cây Chanh hlăm kdriêk Dak Rlâp, hmei tiŏ nao leh lu phung knuă druh djŏ tuôm, hâo hưn, ksiêm dlăng lehanăn mă klei hưn mdah klei suaih pral. Hlăm wưng êgao khădah ênoh mnuih kluh wĭt jing lu, ƀiădah digơ̆ ăt tui gưt, ngă bi kbưi djŏ hŏng hdră mtrŭn. Lehanăn jih jang phung ngă bruă ti Cây Canh ăt bi mlih ngă bruă mbha hlăm 3 gưl. Djŏ ti mmông kpăk êlan snăn hmei mbha mbĭt hŏng kahan ƀuôn, knuă druh bruă mdrao mgŭn lehanăn mnuih ngă bruă knŭk kna mkăn ti dŭm să nao đru mbĭt”.

Anôk ksiêm mkă klei ruă tưp kban 110 Gia Lai đru êsei huă kơ mnuih ƀuôn sang

Tui si Dhar bruă djŏ tuôm čar Daknông yap mơ̆ng leh dŭm čar nah Dhŭng ngă klei kwang dar bi ktlah yang ƀuôn, snăn hlăm grăp hrue mâo hlăm brô 5 êbâo gưl čô mnuih đĭ êdeh p’phŭt wĭt kơ dŭm čar Lăn Dap Kngư. Ti Daknông hlăm dŭm hrue giăm anei mnuih mơ̆ng dŭm čar wĭt giăm 1 êbâo čô mnuih.

Tlam mmăt hrue 29/7 leh êgao, hlăm brô 900 čô mnuih mơ̆ng Đồng Nai wĭt kơ Daklak hŏng êdeh p’phŭt. Ênoh mnuih mă bruă anei ngă leh hră mơar hŏng čar Đồng Nai, lehanăn knŏng dưi wĭt tơdah leh mâo mkă dlăng test pral amâo mâo kman ôh hŏng klei ruă tưp Covid 19, čiăng truh kơ anôk ksiêm dlăng amâo mâo kơ̆ng kơ anăn ôh. Êpul bruă djŏ tuôm čar Đồng Nai mkŏ mjing leh êpul mgrông atăt wĭt hlăm wang giăm 400km, lehanăn tiŏ nao mbĭt êdeh mdiăng mnơ̆ng ƀơ̆ng êa mnăm kơ êpul wĭt. Ktue êlan wĭt hrue lehanăn mlam hlăm krah adiê hjan êăt, leh truh kơ čar Daklak, êpul bruă djŏ tuôm čar tŭ jum jih jang ênoh mnuih wĭt anăn lehanăn atăt digơ̆  truh ti sang hră knŭk kna čiêm rông mnuih djuê ƀiă Ntrang Long, ƀuôn prŏng Ƀuôn Ama Thuôt ngă djăp mta bruă tal êlâo.

Ktrâo lač kơ mnuih ƀuôn sang mŭt hlăm Anôk ksiêm mkă klei ruă Covid-19 Sao Mai

Hrue kăm êgao, ktue êlan dơ̆ng prŏng mrô 14, mâo nanao lu êpul mnuih wĭt mơ̆ng ƀuôn prŏng Hồ Chí Minh lehanăn dŭm čar nah Dhŭng. Mâo mnuih đuĕ wĭt kơ lăn Dap Kngư, lehanăn mâo lu mnuih mơ̆ng kwar krah taih kbưi. Leh găn čar Daknông; Daklak digơ̆ lŏ tuôm hŏng anôk gak răng kơ klei ruă tưp covid 19 ti kban mrô 110, kdriêk Čư̆ Pưh, čar Gialai. Tinei, Hồ Văn Thanh mbĭt hŏng găp ñu đĭ êdeh p’phŭt êlan mơ̆ng ƀuôn prŏng Hồ Chí Minh wĭt kơ Kontum brei thâo:

“Kâo wĭt mơ̆ng čar mkăn, knuă druh kơ anei mă bruă hŏng klei jăk mơh, brei kơ hmei êa săng, êa mnăm, ƀung hdang krô, kpŭng ƀơ̆ng. kâo lač jăk êdi ai tiê thâo bi đru mơ̆ng čar Gialai”.

Tui si Trung tá Nguyễn Minh Tuấn, khua êpul kahan ksiêm êlan klông mrô 1, kahan ksiêm čar Gialai, hlăm hrue êgao, mâo lu snăk mnuih, lehanăn êdeh êdâo wĭt mơ̆ng krĭng mâo klei ruă tưp. Leh hưn mthâo kơ klei suaih pral, jih jang mnuih mâo dăp anôk jưh mdei, mbha mnơ̆ng ƀơ̆ng huă êa mnăm amâo mâo mă prăk ôh. Leh kơ anăn êpul bruă djŏ tuôm ktrâo atăt klei đuĕ wĭt hŏng klei êđăp ênang truh kơ ƀuôn sang.

“Êjai ară anei, hlăk hlê jing hrue mâo lu mnuih bi kluh đuĕ mơ̆ng čar mâo klei ruă tưp, snăn hmei mâo ba bi ktlah mơ̆ng 500 – 600 čô mnuih. Hŏng dŭm čar mkăn găn hriê kơ čar Gialai ăt năng ai hlăm brô 600 čô mnuih”.

Êpul bruă djŏ tuôm čar Kon Tum atăt mnuih ƀuôn sang găn čar

Ktue êlan đuĕ wĭt kơ ƀuôn sang hlăm êlan dơ̆ng prŏng mrô 14, leh găn jih čar Gialai, mnuih ngă bruă lŏ tuôm hŏng anôk gak răng klei ruă tưp Sao Mai, jing mbah nah Dhŭng mŭt kơ čar Kontum khădah kơ anei amâo mâo ktrŏ msĕ hŏng ti anôk gang răng ti Cây Chanh čar Daknông ôh. Tnei, êpul bruă djŏ tuôm dôk gang răng hrue lehanăn mlam kăp drông mnuih wĭt mơ̆ng krĭng mâo klei ruă tưp. Leh kơ anăn ktrâo atăt kơ digơ̆ anôk mdei msăn čiăng mâo ai, mâo mbha kơ digơ̆ mnơ̆ng ƀơ̆ng êa mnăm, sa anŭng êsei, sa kpăt điŏ, kpŭng ƀơ̆ng lehanăn tuh brei êa săng amâo mâo mă prăk ôh êlâo kơ digơ̆ lŏ dơ̆ng ktuê êlan wĭt kơ sang. Lê Hương, sang ti kdriêk Phú Vang, čar Thừa Thiên Huế brei thâo:

“Kâo mphŭn kbiă hriê mơ̆ng Phú Giáo, čar Bình Dương čiăng wĭt kơ ƀuôn sang. Truh kơ Bình Phước đĭ hriê kơ čar Daknông, mơ̆ng Daknông truh kơ Gialai. Gialai lŏ đru êa săng, mnơ̆ng ƀơ̆ng lehanăn êa mnăm hriê truh kơ anei. Kahan ksiêm êlan klông Kontum tinei; lŏ đru êa săng, mnơ̆ng ƀơ̆ng lehanăn êa mnăm”.

Ti anăp klei dleh dlan, klei suăi êmăn mơ̆ng mnuih ngă bruă hiu duah ƀơ̆ng mơ̆ng krĭng mâo klei ruă tưp Covid 19 ti kwar Dhŭng, ktuê êlan wĭt kơ ƀuôn sang pô, mđrăm mbĭt hŏng bruă sang čư̆ êa dŭm čar hlăm alŭ wăl Lăn Dap Kngư, lu êpul êya, êpul bruă, mnuih mâo ai tiê thâo khăp ti lu alŭ wăl ăt bi krăp mâo klei bi đru grăp hrue dŭm êtuh hnư mnơ̆ng ƀơ̆ng lehanăn mnơ̆ng yua mkăn êjai ktuê êlan kñăm đru kơ mnuih mă bruă mâo klei găl wĭt kơ sang pô hŏng klei êđăp ênang./.

Pô mblang: Y-Khem Niê