VOV4.Êđê- Ti čar Dak Lak hlăm dŭm hruê knhal jih thŭn, dŭm anôk bruă, alŭ wăl dôk ngă hmar bruă rŭ mdơ̆ng dŭm êtuh boh sang đru kơ dŭm gŏ sang ƀun ƀin čiăng bi hơĭt klei hdĭp. Hlăm wưng dleh dlan kyua klei ruă tưp Covid-19, ƀiădah dŭm boh sang klei khăp dưi bi mđao mnuih ƀun knap hlăm yap puih êăt.

Dôk hlăm sang dôk ƀâo mnâo êa mil mrâo, anak êkei amai H’Nuyn Êban, ti ƀuôn Jŭng A, să Ea Ktur, êran hiu bŏ sang. Ênai phung hđeh tlao mơak mñai wơr jih klei yan adiê êăt. Amai H’Nuyn mgei ai tiê:

        Kâo mơak snăk kyua mơ̆ng ară anei mâo leh sang dôk mrâo. Êlâo dih gŏ sang kâo dôk hlăm sang tĭ, ară anei amâo lŏ rŭng răng ôh sĭt adiê hjan amâodah mđiă. Kâo bi mni lač jăk kơ dŭm gưl lu snăk kyua rŭ mdơ̆ng leh sang dôk kơ gŏ sang kâo.”

Dŭm anôk bruă mđup brei mnơ̆ng kơ gŏ sang amai H’Nuyn Êban

Ăt mâo Knơ̆ng bruă pui kmlă Dak Lak đru 60 êklăk prăk čiăng rŭ mdơ̆ng sang tal anei, amai H’Blinh Niê, ti ƀuôn Kniêt, să Ea Ktur hơ̆k mơak, 2 ung mô̆, 4 čô anak ară anei amâo huĭ ôh sĭt adiê hjan amâodah angĭn thut.

Ung mô̆ kâo dleh dlan, ară anei mâo pui kmlă đru mra brei sang dôk snăn mơak snăk. Ung mô̆ hmei srăng gĭr mă bruă knuă.

Sang mrâo mơ̆ng gŏ sang amai H’Blinh Niê

H’Kim Hoa Byă, Khua Knơ̆ng bruă mặt trận čar Dak Lak brei thâo, leh wưng bi ktlah ala ƀuôn kyua klei ruă Covid-19, dŭm hruê knhal jih thŭn anei, dŭm anôk bruă, alŭ wăl hlăm čar dôk mđĭ pral bruă mkŏ mjing bi leh dŭm êtuh boh sang đru kơ dŭm gŏ êsei ƀun hơĭt klei hdĭp. Hluê anăn grăp gŏ êsei đru 50-60 êklăk prăk, gŏ sang leh anăn dŭm êpul bruă alŭ wăl đru mguôp thiăm hruê ai leh anăn prăk kăk čiăng rŭ mdơ̆ng sang dôk prŏng siam hĭn.

Hjăn thŭn anei snăn Knơ̆ng bruă mặt trận čar mâo leh phung mâo ai tiê kmah đru 9 êklei prăk, snăn mbha kơ dŭm kdriêk ƀuôn prŏng leh anăn truh mông anei snăn mkŏ mjing leh 165 boh sang. Anăn jing hlue si ênoh mbha, bi kơ anăp snăn mặt trận srăng mâo klei đru mkăn, ăt msĕ mơh phung mâo ai tiê kmah, dŭm êpul bruă mâo klei găl snăn arăng ăt đru kơ phung ƀun ti alŭ wăl.

Pô mblang: H’Zawut Ƀuôn Yă