VOV4.Êđê - Khua Knŭk kna lŏ dơ̆ng mâo hră mtrŭn mrô: 1102 mơĭt kơ dŭm čar, ƀuôn prŏng hlăm Gưl dlông, dŭm phŭn dhar bruă, anôk bruă Knŭk kna. Boh phŭn hră mtrŭn mtă: Čiăng pral gang mkhư̆, msưh kdŭn, ktuê dlăng klei ruă tưp, rơ̆ng răng mgang klei suaih pral, klei hdĭp mnuih ƀuôn sang jing êlâo hĭn, phung khua dlăng bruă Đảng čar, ƀuôn prŏng, Khua Knơ̆ng bruă sang čư̆ êa, ƀuôn prŏng gưl dlông, Khua phŭn bruă, Khua anôk bruă bi knar hŏng phŭn bruă, anôk bruă knŭk kna, anôk bruă djŏ tuôm lŏ dơ̆ng kƀĭn gĭt gai leh anăn mkŏ mjing hluê ngă bi jăk, tŭ dưn dŭm hdră gang mkhư̆ klei ruă Covid-19, hlăm anăn, mđing kƀĭn gĭt gai leh anăn iêu jak mnuih ƀuôn sang nao hgŭm, mă să, ƀuôn hgŭm, wăl krah jing kđông, mnuih ƀuôn sang jing lĭng kahan, jing anôk phŭn gang mkhư̆ klei ruă tưp. Bruă mkŏ mjing hluê ngă ăt jing bruă phŭn, boh nik ti dŭm să, ƀuôn hgŭm, wăl krah. Dŭm phŭn, dhar bruă, alŭ wăl hluê si bruă klam, klei dưi mjêč msir mgaih klei êdu kƀah, mkŏ mjing hluê ngă jăk hĭn, tŭ dưn hĭn dŭm hdră msir.

H Zawut pô mblang