VOV4.Êđê- Hŏng knhuah gru thâo bi mguôp, bi đru čung ba mơ̆ng djuê ana, leh asăp iêu mthưr mơ̆ng Khua lăn čar lehanăn Êpul khua hlăm Dhar bruă mặt trận čar kwar gưl dlông Việt Nam, lu êpul êya, anôk bruă, mnuih mđĭ lar leh klei đua klam, tui si klei găl mâo mơ̆ng pô, nao hgŭm đru mguôp hlăm Keh gang mkhư̆ klei ruă Covid 19. Anei jing klei găl mâo yuôm bhăn hrăm mbĭt hŏng knŭk kna đru kơ phung nai aê mdrao, jing phung mă bruă dŏng mdrao, ngă bruă ti dŭm krĭng bi ktlah ăt msĕ mơh mjing klei găl kơ hdră dưi tlŏ mgang vaccine kơ jih jang mnuih ƀuôn sang hlăm kluôm ala.

Adŭ drông phung mâo ai tiê kmah mguôp hlăm hdră gang mkhư̆ klei ruă Covid-19 hlăm Knơ̆ng bruă gưl dlông mặt trận čar kwar Việt Nam dŭm hruê anei pŏk ƀăng nanao drông êpul, mnuih, dŭm anôk bruă mnia blei, phung mâo ai tiê kmah hrăm mbĭt hŏng Knŭk kna gang mkhư̆ klei ruă Covid-19.

Ba ênoh prăk 131 êklăk prăk mơ̆ng Êpul hgŭm mnuih ƀuôn sang Việt Nam ti Ma Cao (Trung Quốc) wĭt kơ ala čar gang mkhư̆ klei ruă Covid-19, aduôn Nguyễn Thị Hương brei thâo: mnuih ƀuôn sang ti ala tač êngao ktuê dlăng nanao boh klei ruă tưp hlăm ala čar, čang hmăng dŭm klei đru mguôp truh kơ êpul knuă druh,  aê mdrao, phung ngă bruă mdrao mgŭn, đru msưh kdŭn klei ruă Covid-19:

“Hmei bi mguôp hŏng Anôk bruă bi ala Việt Nam leh anăn Êpul hgŭm mnuih ƀuôn sang Việt Nam ti Ma Cao mkŏ mjing klei bi kƀĭn mnuih ƀuôn sang leh anăn iêu mthưr. Mnuih ƀuôn sang mđing snăk, kyua êrah djuê ana pô, ti anôk nao ăt mđing kơ ƀuôn sang. Kyua anăn, drei iêu mthưr leh anăn mâo klei tŭ dưn.”

 Mđing kơ asăp iêu mthưr mơ̆ng Khua lăn čar Nguyễn Xuân Phúc: lăn čar čiăng êdi klei hrăm mbĭt mguôp ai tiê mơ̆ng mnuih ƀuôn sang. Dŭm hruê êgao, lu anôk bruă pŏk ngă iêu jak mnuih mă bruă knŭk kna grăp čô mguôp sa hruê prăk mlan mă bruă kơ hdră gang mkhư̆ klei ruă Covid-19. Ti Phŭn bruă kriê dlăng mnuih mă bruă, leh pŏk ngă dưi mâo jih jang êbeh 430 êklăk prăk, ênoh prăk anei dưi ba kơ Keh gang mkhư̆ klei ruă Covuid-19 čiăng đru mguôp ngă dŭm hdră gang mkhư̆ klei ruă tưp. Khua adŭ bruă Phŭn bruă kriê dlăng bruă knuă, Vũ Đăng Minh brei thâo:

“100% knuă druh hlăm Phŭn bruă kriê dlăng bruă knuă mđrăm mbĭt pŏk ngă. Knuă druh hlăm Phŭn bruă kriê dlăng bruă knuă čang hmăng drei mâo hdră gang mkhư̆ jăk hŏng klei ruă tưp čiăng ktuê dlăng jăk boh klei, Si bĕ ngă čiăng gang mkhư̆ hnưm hơĭt klei hdĭp čiăng mđĭ kyar lăn čar. Ƀiădah yuôm bhăn hĭn ênoh prăk khă gơ̆ ƀiă, ƀiădah êlâo hĭn mđing duh bi liê, klei dưi dưn hdră êlan kơ phung knuă druh anôk phŭn mdrơ̆ng hŏng klei ruă tưp. Kyua adiê mđiă ayŏng amai adei suăi êmăn snăk.”

Mđup brei 3 êtuh êklăk prăk hlăm Knơ̆ng bruă gưl dlông mặt trận čar kwar Việt Nam, K’iăng Khua Sang mđung asăp blŭ Việt Nam Vũ Hải Quang brei thâo grăp čô knuă druh, phung čih klei mrâo, čih mkra hdră, kdŏ mmuiñ hlăm Sang mđung asăp blŭ Việt Nam đru 3 êtuh êklăk prăk hŏng klei čang hmăng thiăm klei dưi mbĭt hŏng Đảng, Knŭk kna gang mkhư̆ klei tưp lar klei ruă hlăm êpul êya. Êngao kơ bruă đru mguôp, hlăm wưng êgao, Sang mđung asăp blŭ Việt Nam gĭr hâo hưn mtô mblang gang mkhư̆ klei ruă tưp:

“Hŏng bruă jing sa anôk bruă hâo hưn prŏng mơ̆ng Đảng, Knŭk kna, hmei pioh lu mmông hâo hưn klei mrâo leh anăn bruă ngă hlăm bruă gang mkhư̆ klei ruă Covid-19. Tiŏ nao phung čih klei mrâo hlăm krĭng mâo klei ruă tưp, hâo hưn klei tŭ mơ̆ng Đảng, knŭk kna hlăm klei gĭt gai. Bruă hluê ngă hdră kñăm mdua jing gang mkhư̆ klei ruă tưp leh anăn mđĭ kyar bruă duh mkra, bi mni kơ gru mngač ăt msĕ mơh dŭm êpul anôk phŭn bŏ hŏng dleh dlan, săn asei.”

Dŭm mmông dleh dlan hĭn jing gưl čiăng kơ grăp čô mnuih ƀuôn sang bi êdah ai tiê bi hgŭm, ngă bruă leh anăn đua klam kyua lăn čar, kyua yang ƀuôn. Lu anôk bruă leh anăn mnuih ƀuôn sang mđĭ klei bi hgŭm, bi khăp bi đru, “khăp kơ pô mkăn msĕ si khăp kơ pô”, “hla hmum hruôm hla tĭ”. Bi ala dŭm anôk bruă mnia blei, knơ̆ng prăk leh anăn mnuih bi yăl dliê:“Kâo bi mĭn, klei čŏng đru anăn kbiă mơ̆ng ai tiê, Mơ̆ng ai tiê kma leh hlăm klei mĭn grăp čô mnuih Việt Nam. Bruă klam snăn êngao kơ bruă čŏng ngă, phung thâo ƀuh bruă klam brei hrăm mbĭt hŏng knŭk kna, êpul êya.”

Klei bi mklă srăng dưi ba yua djŏ hdră kñăm, hưn mdah leh anăn tŭ dưn ênoh prăk mơ̆ng anôk bruă mnia blei, phung mâo ai tiê kmah mguôp hlăm Keh gang mkhư̆ klei ruă Covid-19, K’iăng Khua Knơ̆ng bruă gưl dlông măjt trận čar kwar Việt Nam Trương Thị Ngọc Ánh brei thâo: Anei jing sa klei găl prŏng prĭn čiăng blei vaccin tlŏ kơ mnuih ƀuôn sang hlăm kluôm ala, čiăng đru kơ êpul knuă druh, aê mdrao, phung ngă bruă mdrao mgŭn amâodah mă bruă hlăm dŭm wăl bi ktlah hjăn ăt msĕ mơh mjing klei găl đru blei kdrăp mnơ̆ng mdrao mgŭn kơ hdră gang mkhư̆ klei ruă Covid-19:

“Hŏng klei găl iêu mkrum mơ̆ng Gưl dlông, hmei bi hgŭm hŏng Anôk bruă gĭt gai ala čar gang mkhư̆ klei ruă Covid-19 čiăng rơ̆ng kơ bruă kriê dlăng, ba yua ênoh prăk đru mơ̆ng anôk bruă mnia blei, phung mâo ai tiê kmah, rơ̆ng djŏ hdră kñăm, brei ba yua tŭ dưn ênoh prăk dưi iêu mkrum”.

Ai ktang mơ̆ng klei bi hgŭm, hrăm mbĭt sa ai tiê, jih jang mnuih ƀuôn sang mdrơ̆ng hŏng klei ruă tưp- phung bi ala kơ anôk bruă mnia blei, êpul bruă đru mguôp hlăm Knơ̆ng bruă gưl dlông mặt trận čar kwar Việt Nam dŭm hruê anei jing bi mklă anei jing amâo djŏ jing boh blŭ ôh, ƀiădah jing boh sĭt djŏ klă kơ ai tiê bi hgŭm, sa knhuah gru yuôm bhăn mơ̆ng djuê ana. Ai tiê anăn ƀrư̆ dleh dlan, ƀrư̆ mđĭ klei thâo leh anăn klei mĭn anak mnuih Việt Nam./.

Pô mblang: H’Zawut Ƀuôn Yă