VOV4.Êđê - Ƀuôn Akŏ Dhông ti ƀuôn prŏng Ƀuôn Ama Thuôt, čar Dak Lak amâo djŏ knŏng hing ang kơ klei jăk siam mơ̆ng dŭm boh ƀuôn mnuih djuê ana Êđê ƀiădah lŏ mâo dŭm mta mnơ̆ng ƀơ̆ng jăk jĭn. Ti djiêu kpur pui sang dlông, phung tuê hiu čhưn ênguê dưi ƀơ̆ng dŭm mta mnơ̆ng jăk jĭn, dưi pla hlăm pưk hma ti krĭng lăn čư̆ dliê anei mâo kiê kngan mnuih djuê ana Êđê pô tŭk knă.

Tơdah jing sa čô khăp kơ klei hiu čhưn ênguê leh anăn ƀơ̆ng mnăm, klei huă mnăm dŭm mta mnơ̆ng ƀơ̆ng jăk yâo mơ̆ng mnuih Êđê krĭng Lăn Dap Kngư srăng bi mbŏ hlăm bruă dưi thâo lu mnơ̆ng ƀơ̆ng jăk. Khă mâo mă ƀiă hruê mmông, hriê ti ƀuôn prŏng Ƀuôn Ama Thuôt, čar Dak Lak, phung tuê hiu čhưn ênguê ăt dưi huă mnăm dŭm mta mnơ̆ng ƀơ̆ng jăk yâo mơ̆ng mnuih Êđê, tơdah hriê ti Ƀuôn Akŏ Dhông.

Ƀuôn Akŏ Dhông mâo klei siam leh anăn jing anôk mkăp kơ bruă hiu čhưn ênguê mâo klei hĭng ang hŏng lu boh sang krum mơ̆ng mnuih Êđê. Nao mbĭt hŏng anăn jing dŭm bruă ngă mâo knhuah gru dhar kreh djuê ana. Ayŏng Y-Ya Ƀuôn Yă jing sa čô êkei êdam dôk mă bruă ti anôk pioh čhưn ênguê Akŏ Êa, Ƀuôn Akŏ Dhông hưn mdah hŏng phung tuê: “Kâo srăng hưn mdah klei siam djuê ana Êđê ti nei, leh nao truh ti êñan srăng ƀuh sa nah mâo 2 boh ksâo leh anăn nah dih amâo mâo ôh. Yăng đar phung tuê srăng êmuh si ngă sơnăn, kâo srăng hlăk mbang kyua mnuih Êđê mă djuê tĭng amĭ, Amĭ yơh jing pô mâo klei dưi hĭn, kyuanăn êjai drông phung tuê, phung tuê srăng đĭ êñan mâo 2 boh ksâo leh anăn tơdah trŭn srăng trŭn êñan nah dih amâo dah êlan đĭ êlâo anăn dưi mơh.”

Dôk guôn tuê êmưt êmưt đi êñan sang krum, sang huă mnăm Akŏ Êa ti  sang krŭm sa gŏ sang mâo nanao klei iêo jak tuê hŏng mnâo ƀâo mngưi mơ̆ng djam wêč dôk drŏng ti kpur pui. Hlăm djam năn, mnâo amâo dưi kƀah jing klei hăng mơ̆ng amrêč hlăm jih jang mta djam. Ƀơ̆ng boh kroh tak hŏng amrêč hra, djam leh kơŭl ăt tak amrêč hra, bi mƀăt djam hŏng amrêč hra. Bi kơ dŭm mta pioh tak amrêč hra, ruah dŭm asăr amrêč mtah, ăm leh anăn tlê srăng mâo mnâo ƀâo mngưi. Y-Hem Ƀuôn krông jing pô kiă kriê hlŏng ngă pô tŭk knă ti sang huă mnăm blŭ hưn si ngă srăng tŭk knă mnơ̆ng ƀơ̆ng jăk, mâo klei dleh mkra mjing mơ̆ng mnuih Êđê jing djam wêč: “Djam wêč jing sa mta dleh mkra mjing, jing mnơ̆ng ƀơ̆ng mâo mơ̆ng đưm mơ̆ng mnuih Êđê. Pô blei prôč tiê êmô êđai, rao hŏng hra asăr, đrŭt ƀiă hlăm gŏ êa hlơr, khăt điêt leh anăn mđam hŏng êsŭn Êđê, amrêč mtah. Tui si klei tŭk riă mơ̆ng phung đưm, amâo guôn đeh êlâo ôh, knŏng plĕ hlăm gŏ, tuk êla ksă leh anăn dưm yơh mnơ̆ng bi mƀăt jing djam wêč.”

Mâo đa đa ƀuh amâo jăk ôh hŏng mnâo prôč mda êmô hlăm djam wêč anăn, ƀiădah leh mâo tôč, ƀuh yơh klei jăk êdimi. Y-Hem Ƀuôn Krông yăl dliê, tơdah khăp ƀơ̆ng trŏng phĭ srăng čiă trŏng leh anăn mplĕ hlăm gŏ, ƀiădah knŏng tŭk ksă ƀiă ƀiă, ƀơ̆ng đrêñ đrêñ mâo klei jăk êdimima. Leh năn, kyuanăn yơh lŏ mâo sa mta djam amâo dưi kƀah jing djam trŏng, trŏng anei kreh čăt lu hlăm hma. Diñu ƀơ̆ng lu djam trŏng hlăm klei huă ƀơ̆ng grăp hruê, hlăm anăn mâo djam trŏng tŭk hŏng kan krô: “Djam trŏng kreh tŭk hŏng kan điêt aruăt, dah mâo srăng riă hŏng klang êmô, kđeh čim êmô. Bi kơ djam trŏng anei kâo tŭk hŏng êbai gri, tŭk êa hlơr, leh ksă trŏng djŏng mă hĕ leh anăn jê lik, plĕ bai gri, lŏ tŭk ksă leh anăn bi mƀăt. Dưm ƀiă hla êč Êđê srăng mâo mnâo ƀâo ngưi djam trŏng.”

Sa mta djam mkăn, bơ̆ng hăng, bhĭ leh truh knhal tuič jing dôk klei mmih, Y-Hem Ƀkrông tŭk riă msĕ hŏng klei tŭk riă mơ̆ng phung đưm: “Djam yaut dliê, ñu čăt mâo lu hlăm pưk hma mnuih êđê, ñu anei ƀơ̆ng phĭ êdi. Mâo 2 klei tŭk riă djam anei, tal sa jing ăm, tlê hŏng kŏ kan krô leh anăn đeh ksă. Boh nik jing, djam anei amâo hăng amâo thâo ƀơ̆ng ôh. Ñu hăng kơh dưi juă hĕ ƀiă klei phĭ mơ̆ng yaut anăn, leh anăn amâo dưi kƀah ôh jing êsŭn Êđê.”

Djam ƀơ̆ng mnơ̆ng mnuih Êđê tŭk riă amâo đei dleh êdi ôh, ƀiădah yuôm hĭn jing hnơ̆ng mnơ̆ng bi mƀăt. Y-Hem Ƀuôn krông lač, iêo jak phung tuê hriê ti Lăn Dap Kngư hlăm grăp yan, srăng mâo dŭm mta mnơ̆ng ƀơ̆ng nao hŏng yan anăn, leh anăn phung tuê amâo dưi wơr ôh krĭng Lăn Dap Kngư: “Dŭm mta mđrĭng hŏng yan msĕ si mrâo anei mâo boh knôk, yaut dliê, êyăn, êbung alê, hla hbei ƀlang. Anăn jing dŭm mta djam mâo nao mđrĭng hŏng yan ñu, kyua djŏ yan ñu kơh mâo hlăm sa thŭn.”

Dŭm mta djam ƀơ̆ng srăng jăk hĭn leh dưi bi mƀăt ênŭm, mâo klei mơak mñai hlăm anôk dhar kreh gŏ sang mâo leh mơ̆ng đưm. Ti yan, srăng mâo mnơ̆ng ƀơ̆ng djŏ hŏng yan anăn, phung tuê hriê ti Ƀuôn Akŏ Dhông ti ƀuôn prŏng Ƀuôn Ama Thuôt, čar Dak Lak amâo srăng dưi wơr ôh mnĭt mmông dôk guôn ƀơ̆ng huă ti djiêu kpur pui sang krum, mâo mnâo ƀâo mngưi mơ̆ng kpiê čeh, mnâo hla kyâo đung hlăm êwa mŭt hlăm sang anăn.