VOV4.Êđê- Lŏ čuê dŭm hră êlan hlăm klei kƀĭn tal 1 bruă kƀĭn ala gưl 15, aguah anei, khua bruă kƀĭn ala Vương Đình Huệ mâo leh klei blŭ ti anăp bruă kƀĭn ala ƀri hdơr hruê lĭng kahan êka êkeh - êngiă asei (27/7). Ăt ti aguah anei, bruă kƀĭn ala bi trông kơ dŭm bruă duh bi liê kơ dŭm hdră kñăm ala čar bi hrŏ klei ƀun ƀĭn lehanăn mkŏ mkra krĭng ƀuôn sang mrâo wưng thŭn 2021-2025. Năng mđing hĭn, boh phŭn klei kƀĭn tlam anei, phung bi ala srăng bi trông kơ hdră êlan ngăn prăk ala čar, klei lĭng čan, tla nư klei lehanăn hdră êlan duh bi liê bruă mbĭt mâo wưng kčah wưng thŭn 2021-2025. Mơ̆ng 5 mmông tlam anei, bruă kƀĭn ala mâo klei kƀĭn êngao mmông mă bruă, bi klă tui si hdră mtrŭn kơ hdră êlan mđĭ kyar bruă duh mkra - ala ƀuôn 5 thŭn wưng thŭn 2021-2025. Bi klă tui si hdră mtrŭn kơ hdră êlan čih mkra klei bhiăn ala čar, asăp mtrŭn thŭn 2022. Bi mlih hdră êlan mkŏ mjing klei bhiăn thŭn 2021 lehanăn bi klă tui si dŭm hdră mtrŭn kơ bruă mkŏ mjing êpul ksiêm dlăng mơ̆ng bruă kƀĭn ala thŭn 2022.

Pô mblang: Y-Ƀel Êban