VOV4.Êđê- Bruă dăp mnuih mă bruă jing sa hlăm dŭm mta phŭn yuôm bhăn hlăm 2 hruê mă bruă knhal tuič hlăm klei kƀĭn tal 2 hlăm 3 hruê. Aguah anei mtam (26/7), dhar bruă gĭt gai Bruă kƀĭn ala srăng hưn mdah boh tŭ dưn hlăm klei bi trông mơ̆ng êpul lehanăn hlak mblang, čih yap klei blŭ mơ̆ng dŭm čô bi ala bruă kƀĭn ala lehanăn klei kơ dăp mnuih čiăng čuăn ruah khua lăn čar. Pô mâo klei dưi hưn ba mgơ̆ng jing Nguyễn Xuân Phúc – khua lăn čar dôk păn bruă ară anei.

Leh klei bi trông, bruă kƀĭn ala srăng čuăn ruah khua lăn čar hŏng klei mplĕ hră hgăm lehanăn hlŏng mdah boh tŭ dưn leh kơ năn mtam, leh kơ anăn khua lăn čar mrâo srăng đĭ păn bruă. Lŏ čuê bruă anăn jing dŭm hdră êlan čuăn ruah mnuih mă bruă, khua lăn čar ba mdah anăn phung mgơ̆ng asei čiăng kơ bruă kƀĭn ala čuăn ruah khua knŭk kna, k’iăng khua lăn čar, khua phat kđi sang phat kđi gưl dlông, khua knơ̆ng kiă kriê sang phat kđi yang ƀuôn gưl dlông. Boh tŭ dưn kơ klei dăp mnuih mă bruă kơ dŭm bruă dưi dhar bruă gĭt gai bruă kƀĭn ala hưn mdah hlăm klei mă bruă tlam anei, leh bruă kƀĭn ala bi klă hră anăn čiăng dưi čuăn ruah.

Pô mblang: Y-Ƀel Êban