VOV4.Êđê- Hrue anei (20/7), pŏk leh klei bi kƀĭn tal sa – Bruă kƀĭn ala gưl 15. Êlâo anăn, ti Sang bruă kƀĭn ala mkŏ mjing leh klei bi kƀĭn bruă Đảng Êpul bruă kƀĭn ala, hŏng Êpul kiă kriê bruă Đảng knŭk kna. Ksiêm wĭt kơ bruă mprăp boh phŭn kơ klei bi kƀĭn tal sa, Khua bruă kƀĭn ala Vương Đình Huệ lač, dŭm anôk bruă hlăm bruă kƀĭn ala, Dhar bruă gĭt gai Bruă kƀĭn ala lehanăn knŭk kna, dŭm phŭn dhar bruă, anôk bruă hlue ngă hdră bhiăn mâo hgŭm leh kjăp hlăm klei bi tŭ ư prŏng hlăm jih jang klei bi kƀĭn bruă kƀĭn ala. Êjai dôk găn klei ruă tưp covid 19 dleh dưi ksiêm dlăng, Bruă Đảng hlăm bruă kƀĭn ala ngă leh bruă hŏng dŭm anôk bruă djŏ tuôm, hâo mdah kơ Phŭn bruă kđi čar lehanăn srăng bi kƀĭn sa anôk hlăm adŭ bi kƀĭn Diên Hồng, hŏng ai tiê thâo mkiêt mkriêm mmông, lehanăn bi mâo klei tŭ dưn hĭn, êđăp ênang hĭn, hdră bi kƀĭn srăng klah čŭn, tĭng năng ai srăng bi ruĕ hlăm hrue 31/7. Ngă bruă wăt hlăm hrue mdei. Kơ hdră čiăng rơ̆ng dưi mâo klei êđăp ênang kơ klei bi kƀĭn, Khua bruă kƀĭn ala Vương Đình Huệ mñă, Adŭ bruă knŭk kna, Phŭn bruă mdrao mgŭn ngă leh bruă mơ̆ng hnưm čiăng prăp êmiêt jăk kơ klei bi kƀĭn tal sa, bruă kƀĭn ala gưl 15. Hŏng klei êđăp ênang sĭt êmĭt, tơl truh ti mmông anei jih jang phung bi ala bruă kƀĭn ala, lehanăn mnuih ngă bruă mơ̆ng Adŭ bruă kƀĭn ala mâo tlŏ mgang, lehanăn mkă dlăng kman djăp ênŭm leh./.

Pô mblang: Y-Khem Niê