VOV4.Êđê- Hruê m’ak mnơ̆ng ƀơ̆ng huă mâo bi mklă boh tŭ kdlưn hĭn ala čar, jing hdră hưn mthâo lehanăn mkra mjing 100 mta mnơ̆ng ƀơ̆ng mơ̆ng djam – mnga – boh kroh Đà Lạt dưi mkŏ mjing hlăm akŏ mlan 4/2021 jing hdră bruă tŭ yuôm, pŏk mlar dŭm bruă kkuh m’ak Festival Mnga Đà Lạt thŭn 2021. Tĭng truh kơ hruê 15/3/2021, hdră anei jak iêu leh phung nao bi lông jing phung tŭk knă êsei djam, mâo bi mklă srăng tŭk knă êbeh 100 mta mnơ̆ng ƀơ̆ng, hlăm anăn, knŏng tĭng phung tŭk knă ti Lâm Đồng mâo leh 77 čô bi lông mơ̆ng Đà Lạt, 17 čô bi lông mơ̆ng dŭm kdriêk, adôk jing mơ̆ng dŭm čar, ƀuôn prŏng hlăm kluôm ala. Phung tŭk knă amâo djŏ knŏng hriê mơ̆ng dŭm anôk tŭk knă pprŏng, ƀiădah đa đa mơ̆ng dŭm sang hră mtô bruă, anôk tŭk knă êsei djam… Hlăm hdră 100 mta mnơ̆ng ƀơ̆ng mơ̆ng djam – mnga – boh kroh Đà Lạt mâo Êpul hgŭm bruă hiu čhưn Lâm Đồng - Đà Lạt (LDTA) mkŏ mjing, mjing klei găl bi tuôm, bi mjĕ mjuk, êmuh hriăm klei thâo hlăm klei tŭk knă asei djam, mnơ̆ng ƀơ̆ng mơ̆ng phung tŭk knă mơ̆ng djăp krĭng ăt msĕ mơh hưn mthâo lehanăn bi lar bra djam mtam – boh kroh – mnga Đà Lạt./.

Pô mblang: H’Nêč Êñuôl