VOV4.Êđê – Ti kdriêk Ea Kar leh anăn ƀuôn prŏng Ƀuôn Ama Thuôt, čar Dak Lak mrâo mkŏ mjing Knăm mơak myơr êrah hrah Lăn Dap Kngư thŭn 2021. Dŭm êbâo čô mnuih hluê ngă jăk hdră gang mkhư̆ klei ruă tưp, dăp pruĕ dlông čiăng dôk guôn myơr êrah.

Hruê knăm aruăt êrah hrah Lăn Dap Kngư thŭn 2021 jing bruă ngă sa ai hŏng hdră êlan dŭm aruăt êrah hrah - yan hjan thŭn 2021 lehanăn hdră “Êlan nao hrah” tal 8 mơ̆ng dhar bruă gĭt gai ala čar mtrŭt mjar bruă čŏng myơr êrah. Hŏng klei čiăng “Sa aruăt êrah thiê - sa čô hdĭp ”, khădah dôk hlăm wưng klei ruă tưp Covid-19 dôk dleh dưi ksiêm dlăng hlăm lu anôk, ƀiădah mnuih ƀuôn sang čar Dak Lak ăt hur har kơ bruă myơr êrah. Jing ngă djŏ tui si 5 klei mtă mơ̆ng phŭn bruă mdrao mgŭn, gĭr dăp pruê̆ čiăng truh tuôr pô ngă hră mơar. Ayŏng Trương Văn Lợi, pô mă bruă ti anôk bruă mnia blei čar Dak Lak brei thâo:“Sa ai hŏng klei iêu mthưr mơ̆ng êpul gĭt gai êpul, kâo pô ăt čŏng nao myơr êrah lehanăn mbĭt hŏng ala čar bi hrŏ klei ruă tưp Covid-19. Êjai nao myơr êra ăt čŏng ngă 5 klei mtă gang mkhư̆ klei ruă tưp Covid-19. Hlăm bruă myơr êrah, kâo čiăng bi mguôp dŭm aruăt êrah mkăp kơ dŭm čô mnuih amâo mâo myun.”

Ti gưl myơr êrah anei, amâo djŏ knŏng dŭm čô mnuih ƀuôn sang ti ƀuôn prŏng Ƀuôn Ama Thuôt, mâo wăt dŭm čô mnuih hlăm dŭm kdriêk jĕ giăm. Amai Nguyễn Thị Hương, nai mtô ti sang hră gưl 3 Quang Trung, kdriêk Krông Pač, čar Dak Lak, truh mơ̆ng ưm lehanăn lač:“Grăp thŭn kâo nao hgŭm hlăm bruă mtrŭt mjhar mơ̆ng dŭm gưl, grăp thŭn kâo nao myơr 2 - 3 blư̆ tui si klei hưn hlăm klei suaih pral. Hruê anei mâo klei mtă mơ̆ng khua bruă ti sang hră kơ bruă gang mkhư̆ klei ruă tưp lehanăn kâo ăt msĕ hŏng dŭm čô hlăm sang hră, ngă jăk bruă gang mkhư̆ klei ruă tưp Covid-19, ngă djŏ 5 mta klei mtă mơ̆ng phŭn bruă mdrao mgŭn”.

Nguyễn Đức Phú, khua adŭ bruă êpul gĭt gai bruă čŏng myơr êrah čar Dak Lak, čiăng mâo ênŭm hnơ̆ng êrah đru kơ bruă dŏng mdrao lehanăn hlăm klei mdrao mgŭn hlăm gưl gang mkhư̆ klei ruă tưp Covid-19. Mơ̆ng akŏ thŭn truh kơ ară anei, čar Dak Lak ngă leh lu gưl myơr êrah lehanăn mâo lu mnuih ƀuôn sang nao hgŭm. Bi kơ hdră “Êlan nao hrah” lehanăn bruă ngă dŭm aruăt êrah hrah - yan hjan thŭn anei dưi mkŏ mjing hnưm sa mlan mkă hŏng grăp thŭn, čiăng dưi hmao mâo hnơ̆ng êrah truh kơ anôk bruă ksiêm duah êrah lehanăn mkăp mbŏ êrah gưl dlông.“Dŭm gưl myơr êrah tal anei, êngao kơ bruă dŏng mdrao lehanăn mdrao mgŭn hlăm čar, lŏ ba đru kơ anôk bruă ksiêm duah kơ êrah lehanăn mbŏ êrah gưl dlông jing anôk bruă krĭng dưr. Ară anei kyua klei ruă tưp ti dih diñu amâo mâo êrah ôh, kyuanăn êpul gĭt gai ăt mă êrah lehanăn ba truh ti anôk bruă ksiêm duah êrah lehanăn tlŏ mbŏ êrah gưl dlông”

Hruê knăm myơr êrah aruăt êrah hrah Lăn Dap Kngư thŭn anei dưi mkŏ mjing hlăm 6 anôk ti čar Dak Lak, mĭng tĭng srăng mâo ƀiă êdi 2.900 hnơ̆ng êrah. Knŏng hjăn hruê 8/6 leh êgao, hdră êlan dưi mâo leh êbeh 1.000 hnơ̆ng êrah. Êlâo kơ anăn, ti hruê 6/6, hruê knăm myơr êrah mkŏ mjing ti kdriêk Êa kar lehanăn dưi mâo êbeh 1.200 hnơ̆ng êrah lehanăn ba mơĭt 500 hnơ̆ng êrah đru kơ anôk bruă ksiêm duah êrah lehanăn mkăp mbŏ êrah gưl dlông.