VOV4.Êđê - Hlăm sa klei kƀĭn klei mrâo kơ bruă mprăk kơ klei kƀĭn tal 1 bruă kƀĭn ala gưl 15, khua čih hră bruă kƀĭn ala Bùi Văn Cường brei thâo: klei ruă tưp Covid-19 dôk dleh êdi dưi ktuê dlăng hlăm lu alŭ wăl, khădah, tui si klei bhiăn sui êdi 60 hruê srăng mkŏ mjing klei kƀĭn tal 1 bruă gưl mrâo. Bruă kñăm hlăm klei kƀĭn anei jing bi kluôm ênŭm mnuih mă bruă gưl dlông mơ̆ng knŭk kna, kyuanăn yơh dŭm čô khua êmua srăng ngă klei bi kƀĭn, mplĕ hră hgăm.

Klei bi kƀĭn anei srăng pŏk kčưm ti hruê 20/7/2021 ti sang bruă kƀĭn ala lehanăn bi ruê̆ ti hruê 31/7/2021, bi ruê̆ hnưm 5 hruê mkă hŏng hdră êlâo anăn. Klei bi kƀĭn tal anei mâo klei yuôm bhăn êdi, mkŏ mjing atur kơ bruă kƀĭn ala gưl 15, hlăm anăn mâo mta phŭn bruă kƀĭn ala srăng ngă bruă čuăn ruah, bi klă mnuih mă bruă lehanăn bruă mă kơ dŭm anôk bruă knŭk kna, ksiêm dlăng, bi trông kơ dŭm klei hưn mdah bruă duh mkra - ala ƀuôn lehanăn dŭm klei bi klă kơ dŭm boh klei yuôm bhăn mkăn.

Y Ƀel pô mblang