VOV4.Êđê- Tlam mmăt mbruê, ti sang bruă knŭk kna, khua knŭk kna Phạm Minh Chính mâo leh klei kƀĭn kơ bruă gang mkhư̆ klei ruă tưp Covid-19 lehanăn hưn mdah kơ klei bi klă bruă bi kluôm ênŭm êpul gĭt gai ala čar bruă gang mkhư̆ klei ruă tưp Covid-19. Tui si hdră mtrŭn 1438/QĐ-TTg, khua knŭk kna Phạm Minh Chính ngă khua êpul gĭt gai. Êpul gĭt gai anei mâo bruă klam lehanăn klei dưi jing: mkŏ mjing hdră êlan, bi êdah bruă klam, hdră êlan čiăng gĭt gai, ngă kjăp, djŏ lehanăn mâo boh tŭ dưn hlăm bruă gang mkhư̆ klei ruă tưp Covid-19. Blŭ hlăm klei kƀĭn anăn, khua knŭk kna Phạm Minh Chính mtă kơ dŭm čô khua êmua hlăm êpul gĭt gai ngă mtam dŭm bruă klam, hŏng ai tiê lehanăn bruă ngă kjăp, hrăm mbĭt hŏng mnuih ƀuôn sang gang mkhư̆, msưh kdŭn klei ruă tưp. Khua knŭk kna lač klă, hlăm bruă gang mkhư̆ klei ruă tưp, êpul nao đru mơ̆ng gưl dlông amâo ngă ôh dŭm bruă klam, bruă ngă, klei dưi hlăm alŭ wăl, knŏng đru kơ dŭm mta bruă alŭ wăl amâo dưi ngă, mbĭt hŏng anăn, mđĭ bruă ksiêm dlăng, ktuê dlăng bruă gang mkhư̆ klei ruă tưp.

Pô mblang: Y-Ƀel Êban