VOV4.Êđê- Aguah mbrue (2/7), ti Hà Nội, Adŭ bruă khua lăn čar mkŏ mjing leh klei bi kƀĭn hŏng phung ngă bruă klei mrâo hưn mdah klei bi klă kơ bruă phưi êngiê mnă thŭn 2021 mơ̆ng khua lăn čar Yang ƀuôn ngă phŭn Việt Nam. Khua adŭ bruă khua lăn čar Lê Khánh Hải kiă kriê klei bi kƀĭn hŏng phung ngă bruă klei mrâo. Tui si klei bi klă mơ̆ng khua lăn čar, mơ̆ng wưng hruê msir kđi kñăm pioh mkă dlăng hnơ̆ng brei klei dưi phưi êngiê mnă truh jih hrue 31/8/2021. Phung mnă dưi mâo klei phưi êngiê jing: Jing phung hlăk dôk tŭ klei msir kđi krư̆ hlăm mnă mâo wưng kčah, mnuih tuôm hŏng klei phat kđi krư̆ tưl jih klei hdĭp dưi lŏ bi hrŏ trŭn adôk jing krư̆ mâo wưng kčah, mnuih hlăk dôk tuôm hŏng klei mdei êjai bruă msir kđi krư̆ hlăm mnă. Snăn anei jing gưl tal êlâo yap mơ̆ng leh hdră bhiăn klei phưi êngiê mnă mâo bi mlih hlăk thŭn 2018, Khua lăn čar bi klă kơ klei phưi êngiê mnă djŏ hŏng hdră êlan bi êdah ai tiê thâo pap, mâo klei khăp mơ̆ng Đảng, knŭk kna, lehanăn knhuah thâo pap mâo leh hlăm djuê ana pô hŏng mnuih nga soh dôk tŭ klei msir kđi krư̆ hlăm mnă, mtrŭt digơ̆ gĭt hriăm mjuăt čiăng dưi jing mnuih tŭ dưn kơ yang ƀuôn./.

Pô mblang: Y-Khem Niê