VOV4.Êđê - Tlam hruê 10/6, ti Sang bruă kƀĭn ala mkŏ mjing leh Klei bi kƀĭn phung čih klei mrâo hưn mthâo kơ Hdră mtrŭn mŏng Êpul hgŭm ruah khua ala čar kơ boh tŭ hdră ruah khua lehanăn anăn phung mgơ̆ng ruah djŏ pô bi ala bruă kƀĭn ala gưl XV. Hluê anăn, mâo 499 čô djŏ ruah ngă pô bi ala bruă kƀĭn ala gưl XV. Mphŭn pŏk klei bi kƀĭn, Trần Thanh Mẫn – Khua hlăm Phŭn bruă kđi čar, K’iăng khua bruă kƀĭn ala, K’iăng khua kiă kriê Êpul hgŭm ruah khua ala čar mñă klă, klei ruah khua mâo mkŏ mjing hlăm ai êwa hơ̆k m’ak, ngă phŭn mil pô, mtăp mđơr, djŏ hdră bhiăn, êđăp ênang, mkiêt mkriêm, tŭ jing jăk siam, klă sĭt jing hruê m’ak mơ̆ng jih jang mnuih ƀuôn sang hŏng 99,6% ênoh mnuih nao ruah. Bùi Văn Cường – Khua hlăm Anôk bruă kƀĭn ala, Khua adŭ bruă Êpul hgŭm ruah khua ala čar brei thâo, klei ruah khua dưi ruah djăp leh 500 čô bi ala bruă kƀĭn ala. Khă snăn, hdră ksiêm dlăng, bi mklă k’hưm mnuih mgơ̆ng ruah, Êpul hgŭm ruah khua ala čar ti klei bi kƀĭn tal 6 amâo bi mklă ôh k’hưm phung bi ala kyua amâo rơ̆ng hnơ̆ng čuăn kčah mtrŭn hŏng 1 čô, ti êpul êya ruah khua mrô 1 čar Bình Dương. /.

H Nêč pô mblang