VOV4.Êđê- Knŭk kna Hungari bi mklă mđup brei kơ Knŭk kna Việt Nam 1 êtuh êbâo aruăt vaccin Astra Zeneca leh anăn 1 êtuh êbâo kdrăp ksiêm mkă čiăng mdrơ̆ng hŏng klei ruă Covid-19. Hlăm boh klei ruă tưp lŏ dơ̆ng mâo klei bi mlih dleh ktuê dlăng hŏng klei mâo lu mta mrâo hŏng hnơ̆ng huĭ hyưt leh anăn tưp lar pral, Knŭk kna Việt Nam bi mklă bruă dưi ba yua vaccin leh anăn pral tlŏ mgang lu anôk jing hdră yuôm bhăn leh anăn mjêč ară anei. Bruă knŭk kna Hungari đru vaccin leh anăn kdrăp ksiêm mkă pral kơ Việt Nam jing bruă yuôm bhăn bi êdah kơ klei bi hgŭm kluôm ênŭm jăk siam plah wah Việt Nam - Hungari hlăm êbeh 70 thŭn êgao, mbĭt anăn bi êdah klei bi đru hlăk tuôm hŏng klei dleh dlan, jih ai tiê hrăm mbĭt msưh kdŭn klei ruă Covid-19 kluôm rŏng lăn.

Pô mblang: H’Zawut Ƀuôn Yă