VOV4.Êđê- Aguah hruê 20-8, Anôk bruă mặt trận čar kwar ƀuôn prŏng Hồ Chí Minh mkŏ mjing klei tŭ mă masin ECMO mâo ênoh 145 êbâo USD, kyua Anôk bruă bi ala India leh anăn Êpul êya mnuih India ti krĭng wăl nah Dhŭng mđup brei kơ Sang êa drao krĭng hlơr ƀuôn prŏng Hồ Chí Minh. Tô Thị Bích Châu, Khua Knơ̆ng bruă mặt trân čar kwar ƀuôn prŏng bi êdah klei bi đru klei dleh dlan leh anăn luič liê mnuih ƀuôn sang India găn leh kyua klei ruă Covid-19 tal 2, mbĭt anăn bi mni kơ tŭ jing mơ̆ng Knŭk kna leh anăn mnuih ƀuôn sang India mâo leh hlăm bruă ktuê dlăng klei ruă Covid-19. Khă gơ̆ dôk mâo lu klei dleh dlan, ƀiădah Knŭk kna India bi mklă đru kơ Knŭk kna leh anăn mnuih ƀuôn sang Việt Nam dôk tlă anăp hŏng klei dleh ktuê dlăng mơ̆ng klei ruă tưp, jing sa bruă ngă yuôm bhăn snăk. Khua bi ala India ti ƀuôn prŏng Hồ Chí Minh - Madan Mohan Sethi brei thâo, mĭn tĭng hruê 30-8 kơ anăp, hô̆ pui lĭng kahan êa India srăng truh ti kdrŭn ksĭ ƀuôn prŏng Hồ Chí Minh, mdiăng 300 boh masin mjing oxy leh anăn 100 ton oxy mta êa mơ̆ng Knŭk kna India đru kơ Việt Nam.

Pô mblang: H’Zawut Ƀuôn Yă