VOV4.Êđê- Djam brông jing mnơ̆ng ƀơ̆ng jăk mơ̆ng mnuih M’Nông. Hŏng mnuih M’Nông, djam brông jing djam mdê hjăn, jiă hma mnâo jăk leh anăn bi êdah mnơ̆ng ƀơ̆ng jăk mnuih Lăn Dap Kngư, hlăm anăn mâo mnuih M’Nông. Djam brông amâo djŏ knŏng jing djam kreh ƀơ̆ng grăp hruê đuič ôh ƀiădah mnuih M’Nông lŏ yua drông tue yuôm hlăm dŭm gưl knăm mơak djuê ana hlăm ƀuôn sang.

Djam brông suê hŏng đĭng m’ô dưi jeh lu mta djam msĕ si djam biăp, trŏng phĭ, guôl phĭ, amrêč, kan, amâodah kđeh čim hlô. Mơ̆ng jih mnơ̆ng kreh brông, čŏng mâo leh hlăm pưk hma, hlăm dliê ba brông mbĭt mjing sa mta djam ƀơ̆ng jăk êdi. Djam biăp bioh brông jing knăt mda nao pĕ leh dŭm aguah mâo hjan trah knăt pluh mda. Mmông anei hla djam biăp doh siam, amâo guôn rao hŏng êa ôh ƀiădah hlŏng mkra mtam snăn kơh srăng mâo mnâo ƀâo mngưi jăk. Guôl phĭ leh wĭt mă mơ̆ng dliê rao bi doh, lôk hĕ pôk êngao mâo êruê, knŏng mă kdrêč mda hlăm lam. Ba k’ŭl hĕ bhiâo êlâo lehanăn čiă điêt man ƀơ̆ng.

 Dŭm mta pioh tŭk djam brông

Mdê hŏng trŏng phĭ mơ̆ng mnuih Mnông, Êđê kreh yua tŭk mkra djam trŏng phĭ hŏng kan krô, mâo mta trŏng phĭ boh điêt mnuih djuê ana Mnông kreh pla hlăm wăl sang, ñu phĭ mâo mbĭt hŏng mmih.

Sa mnta mnơ̆ng amâo mâo dưi kƀah ôh dưm mbĭt anăn, jing kđeh kan thâodah kđeh čĭm. Kan êa hnoh mkra hĕ êlâo, msĕ si ăm hĕ hŏng pui bi hrŏ mnâo ƀâo nghir. Êjai brông dưm jih sa drei snăn amâo mâo guôm mă hĕ klang ôh. Bi kđeh čĭm jing kđeh čĭm ŭn, čĭm mnŭ, thâodah kđeh čĭm hlô tơdah mâo... jing tui si klei pô khăp ƀơ̆ng.

 Djam brông jăk hlăm đĭng mơô mnuih Mnông

Ngă djam brông djŏ hdră jing nao koh đĭng m’ô, ruah bi jăk đĭng m’ô kăn mda đei, kăn khua đei. Boh dlông hlăm brô sa heh êgao. Mnuih brông djam yua dhŏng ƀơ̆ng kriêt hĕ mbah đăm bi êa hlăm đĭng amâo mâo kbiă kơ tač ôh êjai dôk brông. Bruă jeh jih jang djam mtam pioh brông hlăm đĭng hŏng klei mdjĕ mơh.

Đĭng m’ô dưi mhưng ti dhông anghar pui hrah. Êjai anăn mkă hnơ̆ng jhar pui man dưn, amâo mâo lui pui trơ̆ng ktang, amâodah êdu đei ôh. Bi đĭng brông djĕ mdar nanao čiang kơ jih jang djam jeh hlăm đĭng ksă tar, lehanăn đĭng m’ô kăn khiă sa nah rei. Êjai dôk brông, mơ̆ng đĭng m’ô bi kbiă êa mơ̆ng đĭng hlai mbĭt hŏng djăp mta djam mtam drei jeh hlăm anăn, mjing mtam sa mta mnâo jăk snăk mơ̆ng djam brông.

Mnuih Mnông yua sa aruăt giê knur kčŭt suê hlăm lam đĭng brông čiăng kơ jih jang djam hlăm đĭng ƀhĭ lehanăn bi lŭk mbĭt. Năng ai kyua msĕ snăn yơh mâo anăn pia djam brông suê. Dôk brông hlăm brô 30 mnĭt, lông leh amrêč hra, lehanăn lŏ dưm djam ƀâo, snăn srăng jing sa mta djam ƀơ̆ng jăk êdi.

Djam brông suê anei jing jăk snăk kơ klei suaih pral phung mniê mrâo kkiêng, mnuih khua thŭn awăt êmăn, lehanăn hŏng phung hđeh ktiêl amâo mâo thâo prŏng. Djam brông suê amâo mâo djŏ knŏng jing djam pioh ƀơ̆ng hlăm grăp hruê đuič ôh, ƀiădah lŏ jing djam mtam pioh mdơ̆ng kơ tue hlăm dŭm knăm mơak djuê ana Mnông./.

Pô mblang: Y-Khem Niê