VOV4.Êđê - Hluê si klei gĭt gai mơ̆ng Phŭn bruă mdrao mgŭn, Knơ̆ng bruă vaccin Việt Nam mrâo jao 1 êklăk 113 êbâo 4 êtuh aruăt vaccin AstraZeneca kơ Anôk bruă  ksiêm hriăm Pasteur ƀuôn prŏng Hồ Chí Minh čiăng mbha kơ dŭm čar, ƀuôn prŏng nah Dhŭng, hmao đru kơ bruă tlŏ mgang kơ mnuih ƀuôn sang. Gưl tal êlâo ba jao êbeh 1 êklăk 1 êtuh êbâo aruăt vaccin anei jing bruă yuôm bhăn ti anăp klei ruă Covid-19 lŏ bluh mâo ktang, klei čiăng tlŏ mgang mơ̆ng mnuih ƀuôn sang dôk đĭ, boh nik ti dŭm krĭng mâo lu mnuih ruă msĕ si ƀuôn prŏng Hồ Chí Minh, Bình Dương… Bruă tlŏ vaccin gang mkhư̆ klei ruă pral, amâo lŏ mâo klei bi tưp hlăm êpul êya hnưm srăng đru kơ dŭm čar nah Dhŭng, kluôm ala bi hrŏ klei ktrŏ kơ bruă mdrao mgŭn, bi hrŏ ênoh mnuih djiê. Yap truh jih hruê 15-8, Việt Nam mâo leh hlăm brô 21 êklăk 5 êtuh aruăt vaccin dŭm mta. Ƀuôn prŏng Hồ Chí Minh leh anăn dŭm alŭ wăl tlŏ leh giăm 14 êklăk 5 êtuh aruăt vaccin Covid-19, hlăm anăn mâo giăm 1 êklăk 4 êtuh êbâo čô mnuih dưi tlŏ ênŭm 2 aruăt.

H Zawut pô mblang