VOV4.Êđê- Mơ̆ng akŏ hruê kăm anei, Phŭn bruă lĭng kahan mkŏ mjing leh Knăm pŏk ngă Hdră bi ktưn hŏng akŏ “Êpul lĭng kahan hŏng kluôm ala sa ai tiê bi ktưn gang mkhư̆ leh anăn tŭ dưi hŏng klei ruă tưp Covid-19. Mđing truh kơ knăm pŏk ngă, knuă druh, lĭng kahan ti lu anôk bruă hlăm kluôm ala tui hluê asăp trŭn ba lĭng kahan mđĭ ktang êpul lĭng kahan ti dŭm čar nah Dhŭng hluê ngă bruă gang mkhư̆ klei ruă Covid-19.

Bi ala kơ bruă Đảng kahan gưl dlông, Phŭn bruă lĭng kahan, Êpul gơ̆ng bruă bi ktưn – pah mni Phŭn bruă lĭng kahan, mtrŭt klei bi ktưn, Đại tướng Lương Cường Khua knơ̆ng kiă kriê bruă kđi čar lĭng kahan yang ƀuôn lač bruă bi ktưn “Lĭng kahan mbĭt hŏng kluôm ala sa ai ngă bruă jih ai tiê mdrơ̆ng lehanăn dưi hŏng klei ruă tưp Covid 19”, čiăng kơ jih jang grăp čô knuă druh păn kjăp ai tiê “Mdrơ̆ng hŏng klei ruă tưp msĕ si bi kdơ̆ng hŏng roh”, “Knư̆ lĕ hlăm klei dleh dlan knư̆ brei mâo ai tiê bi ktưn”, “Gĭr leh, brei lŏ gĭr hĭn”, mâo bruă klam prŏng kyua phung ƀuôn sang, kyua lăn čar, hŏng ai tiê čŏng gĭr, hgao klei dleh dlan, knap mñai, mprăp ai tiê ba akŏ mdrơ̆ng hŏng klei ruă tưp, bi leh jăk bruă čuăn kđi čar, yap anei jing bruă čuăn  mơ̆ng lĭng kahan hlăm klei bi blah êjai klei êđăp ênang. Jih jang phung lĭng kahan ti dŭm alŭ wăl mâo klei bi mguôp kjăp, đru hŏng dŭm gưl bruă Đảng, bruă sang čư̆ êa mghaih msir klei dleh dlan, đru hrui êmiêt boh mnga mnơ̆ng pla mjing, mkăp mnơ̆ng ƀơ̆ng huă mnơ̆ng yua aguah tlam lehanăn dlăng kriê klei suaih pral kơ phung ƀuôn sang, mprăp djăp hdră mdrơ̆ng hŏng klei ruă tưp ti hnơ̆ng ktang hĭn čiăng pral thâo mghaih msir, amâo hlăm klei rŭng răng hŏng djăp mta klei truh.

Đại tướng Lương Cường mñă jih jang lĭng kahan ngă klei bi ktưn, bi êdah klei thâo gĭr prŏng, čŏng jih ai tiê ba akŏ hlăm bruă čuăn mdrơ̆ng hŏng klei ruă tưp:

“Lŏ dơ̆ng păn kjăp bruă hlăk dôk găn mơ̆ng klei ruă tưp, boh nik hlăm dŭm alŭ wăl phŭn čiăng bi pral mâo klei kčĕ đru hŏng bruă Đảng kahan gưl dlông, Phŭn bruă lĭng kahan, Êpul ngă bruă mjêč mơ̆ng knŭk kna ti alŭ wăl nah Dhŭng, êpul kiă kriê, gĭt gai lehanăn êpul bruă mdrơ̆ng hŏng klei ruă tưp dŭm gưl bi ngă bruă hŏng klei tŭ dưn mdrơ̆ng hŏng klei ruă tưp. Mâo nanao klei bi mguôp kjăp hŏng dŭm gưl bruă Đảng, bruă sang čư̆ êa lehanăn kahan alŭ wăl mă bruă kjăp hlăm grăp êpul, anôk gak răng ti knông lăn, êa ksĭ, gang mkhư̆ bi kjăp klei ñu kma soh hŏng klei bhiăn. Mkŏ mjing dŭm alŭ wăl bi ktlah, sang êa drao jing jai, jih ai tiê hgŭm mkă dlăng kman, lehanăn tlŏ vaccine kơ puhng ƀuôn sang, mdrao mgŭn mnuih ruă, boh nik mnuih ruă kjham ti dŭm boh sang êa drao hlăm anôk bruă kahan lehanăn kơ êngao”.

Ti knăm mtrŭt mjar mâo mkŏ hŏng 220 anôk hlăm kluôm lĭng kahan mâo leh klei sa ai prŏng hlăm bruă bi ktưn, hŏng bruă đua klam klă mngač mdrơ̆ng hŏng klei ruă tưp. Kahan dôk hlăm dŭm alŭ wăl nah Dhŭng hlăk dôk găn hŏng klei ruă tưp dleh dưi ksiêm dlăng, hlăm anăn mâo ƀuôn prŏng Hồ Chí Minh, Thiếu tướng Nguyễn Trường Thắng, Khua knơ̆ng ki kriê kahan alŭ wăl 7 brei thâo, hlăm jih jang si klei jing lĭng kahan mơ̆ng alŭ wăl srăng ba akŏ mtam yơh hlăm bruă mdrơ̆ng hŏng klei ruă tưp:

“Jih jang kahan alŭ wăl pŏk gưl bi ktưn ti wưng hlăk mjêč đru phung ƀuôn sang, hgŭm kjăp hŏng djăp gưl bruă Đảng, bruă sang čư̆ êa, êpul êya, lehanăn jih jang phung ƀuôn sang, djăp êpul êya djŏ tuôm ngă jih jang bruă hŏng klei mđrăm mbĭt, hŏng klei kjăp hlue ngă djŏ bruă gang mkhư̆ klei ruă tưp, pŏk dŭm krĭng êngiê, bi hrŏ krĭng huĭ hyưt, anăp mjing wăl êngiê sơăi. Lehanăn bi mguôp kjăp hlăm bruă đru dŏng mnuih ư̆ êpa, mnuih ruă, amâo mâo lui phung ƀuôn sang lĕ hlăm klei ư̆ êpa, kƀah wư, knap mñai”.

Hŏng kahan răng mgang knông lăn, Knơ̆ng kiă kriê kahan răng mgang knông lăn dŭm čar nah Dưr, Dưr kwar Krah mâo ruah leh truh 58 čô nai aê mdrao kahan mâo klei thâo hlăm bruă nao dru ktrâo atăt phung nai aê mdrao ti sang hră mjuăt bi hriăm nai êa drao kahan, lehanăn knuă druh nai êa drao kahan mơ̆ng kahan răng mgang knông lăn. Phung hriăm nao hlăm klei mjuăt bi hriăm, dưi bi hriămmbŏ klei thâo halwm bruă mdrơ̆ng hŏng klei ruă tưp, mprăp ai tiê đuĕ nao kơ Dhŭng, maoa mprăp leh djăp ênŭm čiăng pral bi mguôp ngă bruă, đru hrăm mbĭt hŏng jih jang êpul êya hlăk dôk ngă bruă hlăm anôk maoa klei ruă tưp, kñăm gang mkhư̆ bi jih klei ruă tưp, djŏ hŏng klei khua knŭk kna gĭt gai. Hlăm knăm trŭn nao, Trung tướng Đỗ Danh Vượng khua bruă kđi čar, kahan răn gmgang knông lăn lač:

“Bi ala kơ bruă Đảng, Knơ̆ng kiă kriê kâo jao bruă klam kơ jih jang lĭng kahan, tui si klei bruă Đảng, Khua kiă kriê lĭng kahan čang hmăng, êlâo hĭn brei jih jang thâo săng kơ hnơ̆ng huĭ hyưt, kơ klei mjêč hlăm bruă čuăn gang mkhư̆ klei ruă tưp hlăm klei thâo săng bi mâo djăp bruă klam, bruă čuăn kdrăm kưah mơ̆ng lĭng kahan, hlăm anăn mâo wăt kahan răng mgang knông lăn trŭn hlăm bruă anei, ƀuh klă bruă klam jao kơ pô, mơ̆ng anăn mâo klei gĭt hĭn hrăm mbĭt hŏng jih jang lĭng kahan mdrơ̆ng lehanăn dưi hŏng klei ruă tưp. Lehanăn srăng tŭ mă ya mta bruă jao djŏ tui si grăp êpul bruă, anôk pô mâo tiŏ nao čiăng si wĕ nga dưi mdrơ̆ng hŏng klei ruă tưp pral hĭn, jăk hĭn, rơ̆ng dưi răng mgang klei suaih pral, klei êđăp ênang kơ klei hdĭp phung ƀuôn sang hlăm kluôm ala”.

Drei dưi lač hlăm giăm thŭn thŭn leh êgao, kahan răng mgang knông lăn jing nanao leh êpul kahan ba akŏ, mâo mkŏ mjing leh mnư̆ mnang kjăp ktuê knông lăn hŏng 1.974 anôk gak răng, hŏng 8 êbâo 221 čô knuă druh lĭng kahan răng mgang knông lăn gang mkhư̆ klei mnuih mŭt kbiă soh hŏng klei bhiăn, lehanăn mdrơ̆ng hŏng klei ruă tưp, mtrŭt mjhar klei bi ktưn hlăm phung ƀuôn sang bi đru hgŭm gang mkhư̆ klei ruă tưp ti dŭm ƀang jang knông lăn, amâo mâo uêñ kơ klei suăi êmăn, huĭ hyưt mơ̆ng klei tưp lar kman klei ruă, čiăng hrăm mbĭt đru kơ mnuih dôk hlăm anôk bi ktlah, krĭng kăm mkhư̆. Knăm mphŭn trŭn kơ bruă tal anei jing leh sa klei bi knăl kơ ai tiê mprăp kăp đru ti dŭm anôk hlăk dôk mâo bruă mjêč “Nao sơăi yơh ti anôk čiăng, ngă jih jang djăp mta bruă mâo lăn čar iêu” mơ̆ng lĭng kahan răng mgang knông lăn./.

Pô mblang: Y-Khem Niê