VOV4.Êđê - Thŭn leh khua, jing kahan êka êkeh ƀiădah Hoàng Biên Thùy ti să Hòa Xuân, ƀuôn prŏng Ƀuôn Ama Thuôt, čar Dak Lak ăt nao hgŭm sĭt êmĭt đru kơ dŭm bruă hlăm yang ƀuôn. Ti anăp klei mâo dleh dưi ksiêm dlăng mơ̆ng klei ruă Covid 19, hŏng bruă klam jing Khua êpul kahan hđăp să, Thùy mâo leh lu bruă ngă klă sĭt hlăm klei bi hgŭm kngan gang mkhư̆ klei ruă tưp.

Mơ̆ng leh klei ruă tưp lŏ bluh đĭ gưl tal 4 ti alŭ wăl, khădah dôk hlăm sang, ƀiădah hŏng zalo Êpul hgŭm phung kahan hđăp să, nguyễn Văn Bằng, ti alŭ mrô 1, să Hoà Xuân, ƀuôn prŏng Ƀuôn Ama Thuôt, čar Daklak thâo djăp ênŭm kơ boh klei ruă tưp dôk găn. Bằng brei thâo, êpul Zalo anei mâo Hoàng Biên Thùy, Khua Êpul hgŭm kahan hđăp să Hoà Xuân mkŏ mjing lehanăn kreh hâo hưn jêñ jêñ boh klei mâo.“Hâo hưn kơ bruă mdrơ̆ng hŏng klei ruă tưp mơ̆ng zalo mơ̆ng Thùy thâo kjăp hlăm bruă anei, snăn ñu ktrâo atăt ƀhĭ ênŭm, hưn mơ̆ng grăp mta klei mtă, klei hưn, asăp mtrŭn lehanăn jih jang boh klei mâo mơ̆ng klei ruă tưp hlăm grăp wưng mdê mdê čiăng kơ pô thâo ƀuh, lehanăn lŏ bi yăl dliê hŏng phung ƀuôn sang”.

Amâo mâo djŏ knŏng kăp hâo hưn, kăp ktrâo atăt jih jang mnuih thâo ba yua zalo čiăng thâo kơ boh klei ruă tưp, snăn Hoàng Biên Thùy lŏ hnêč truh kơ sang grăp čô mnuih pioh hâo hưn. Jing hlăm Êpul kiă kriê bruă mdrơ̆ng hŏng klei ruă tưp să, Thùy jao kiă kriê ti alŭ mrô 1, lehanăn mrô 4. Grăp blư̆ mâo klei hưn mrâo, ñu mbĭt hŏng êpul mdrơ̆ng hŏng klei ruă tưp alŭ ktrâo atăt phung ƀuôn sang. Amai Nguyễn Thị Sơn, ti alŭ mrô 1, să Hoà Xuân, ƀuôn Ama Thuôt lač:“Kâo ƀuh awa Thùy hur har êdi truh kơ anôk hâo hưn mdrơ̆ng hŏng klei ruă Covid, ktrâo atăt ƀhĭ klĭ čiăng kơ phung ƀuôn sang dưi thâo si hdră bi yua zalo. Lač jăk kơ awa Thùy lu êdi, jing mnuih khua asei leh, wĭt mdei leh ƀiădah ăt hur har hŏng phung ƀuôn sang êdi”.

Hoà Xuân jing sa mâo ênhă prŏng, êlan klông hlăm kdriêk mkŏ hŏng êlan dơ̆ng prŏng mrô 14 hŏng dŭm kdriêk Ƀuôn Đon; Êa Sup. Hlăm să mâo êbeh 300 čô mnuih hlăk dôk nao ngă bruă ti dŭm car Đồng Nai, Bình Dương, lehanăn ƀuôn prŏng Hồ Chí Minh. Păn kjăp klei anei, hŏng bruă klam jing mnuih hlăm êpul kiă kriê bruă mdrơ̆ng hŏng klei ruă tưp Covid 19 hlăm să, awa Thùy jih ai tiê kăp kčĕ kơ phung khua kiă kriê hdră mă bruă bi jăk kăp hâo hưn, ktrâo atăt kơ phung ƀuôn sang. Êpul kiă kriê bruă mdrơ̆ng hŏng klei ruă tưp Covid 19 să Hoà Xuân ăt kreh truh hlăm dŭm boh alŭ, ƀuôn čiăng hâo hưn, ktrâo atăt jih jang mnuih hlue gưt hdră êlan mdrơ̆ng hŏng klei ruă tưp. Ksiêm dlăng mnuih wĭt mơ̆ng dŭm krĭng mâo klei ruă tưp; đru jih jang mnuih mkŏ Bluezone. Mbĭt hŏng anăn, awa Thùy čŏng mkŏ mjing êpul Zalo lehanăn ktrâo atăt jih jang ƀĭng hgŭm, lehanăn jih jang mnuih bi thâo yua čiăng kơ găl ênưih hlăm bruă hâo hưn kơ bruă mdrơ̆ng hŏng klei ruă tưp.

Hoàng Biên Thùy yăl dliê, kbiă hriê mơ̆ng lĭng kahan, tuôm găn leh hlăm dŭm bruă ngă, snăn thâo hĕ ƀ’ƀiă hlăm kdrăp yua mrâo. Mâo klei bruă Đảng lehanăn Êpul hgŭm kơ dlông jưh knang, asei ñu khădah thŭn leh khua ƀiădah ăt čiăng đru mguôp ai tiê pô hŏng bruă mbĭt:“Hŏng klei đua klam jing lĭng kahan wĭt leh hŏng ƀuôn sang, ăt adôk djă pioh knhuah sa čô lĭng kahan Awa Hô, khădah jing kahan êka êkeh, jing sa čô kahan hđăp, ƀiădah bruă čuăn mơ̆ng Đảng jao ăt bi leh. Hlăm gưl mâo klei ruă tưp anei kâo kreh mđrăm mbĭt hŏng ayŏng adei mkŏ mjing dŭm gưl hâo hưn mtrŭt phung ƀuôn sang thâo si hdră mdrơ̆ng hŏng klei ruă tưp. Wăt hlăm bruă hâo hưn hŏng klei blŭ, amâodah pŏk djăp hdră hâo hưn, yua đĭng blŭ thâo mĭn čiăng đru ktrâo brei kơ digơ̆ păn kjăp hdră mdrơ̆ng hŏng klei ruă tưp, anăn jing bruă klam pô hŏng yang ƀuôn”.

Jing kahan êka êkeh 4/4 lehanăn giăm 70 thŭn leh, ƀiădah hlăm lu thŭn êgao, awa Thùy hur har nanao hlăm bruă yang ƀuôn. Tui si Nguyễn Đức Thuận, Khua bruă Đảng să Hoà Xuân, ƀuôn prŏng Ƀuôn Ama Thuột, găn leh hlăm dua wưng păn bruă jing khua Êpul hgŭm phung kahan đăp, awa Thùy jing nanao mnuih hur har jih ai tiê hlăm djăp bruă mơ̆ng alŭ wăl jao. Lu ƀĭng hgŭm kahan hđăp jih ai tiê leh bi đru hlăm bruă mkŏ mkra krĭng ƀuôn sang mrâo, jao lăn pioh mkra êlan, mđĭ kyar klei hdĭp mda gŏ sang pô lehanăn đru kơ ƀĭng hgŭm dôk hlăm klei dleh dlan.

Boh nik, mơ̆ng leh mâo klei ruă tưp covid 19 bluh đĭ hlăm thŭn dih truh kơ ară anei, khădah să Hoà Xuân ka mâo ôh mnuih ruă, ƀiădah bruă gang mkhư̆ klei ruă tưp ti alŭ wăl mâo nanao klei mđing leh. Hŏng bruă klam jing khua êpul hgŭm phung kahan hđăp, ñu hâo hưn, mtô mblang kơ jih jang ƀĭng kahan hđăp đru bi ksiêm dlăng bruă hlăm yang ƀuôn pioh hâo hưn, kiă kriê mnuih mŭt kbiă hlăm alŭ wăl, ngă bi kjăp hdră mdrơ̆ng hŏng klei ruă tưp:“Bruă Đảng mâo klei bi mni, ñu jing khua êpul hgŭm phung kahan hđăp hlăm dua wưng păn bruă, khădah ară anei thŭn leh khua giăm 70 thŭn leh, ƀiădah klei hur har, jih ai tiê ñu mâo nanao klei ba anăp hlăm djăp mta bruă, boh nik hlăm bruă bi kjăp êpul hgŭm, mkŏ mjing bruă Đảng, mkŏ mjing bruă sang čư̆ êa. Boh nik giăm anei hĭn jing să mkŏ mjing êpul kiă kriê bruă mdrơ̆ng hŏng klei ruă tưp snăn hlăm anăn mâo awa Hoàng Biên Thùy nao hgŭm mbĭt jih ai tiê hlăm bruă hâo hưn”.

Thŭn leh khua, asei mlei amâo mâo jăk suaih ôh, ƀiădah hŏng bruă klam mơ̆ng sa čô kahan leh wĭt hŏng klei hdĭp aguah tlam, kahan hđăp Hoàng Biên Thùy mâo leh lu klei đru mguôp hŏng alŭ wăl. Ti anăp klei dleh dưi ksiêm dlăng klei ruă tưp anei, hlăm “hdră êlan mdrơ̆ng hŏng klei ruă tưp msĕ si bi kdơ̆ng hŏng roh” hlăk mâo klei mđing hĭn êdi, snăn bruă mơ̆ng ñu ngă knư̆ hĭn mơh jing klei klă mngač, yuôm bhăn, đru leh hŏng bruă sang čư̆ êa, lehanăn phung ƀuôn sang gang mkhư̆, msưh kdŭn bi dưi klei ruă tưp Covid 19./.