VOV4.Êđê - 72 thŭn leh, hrô kơ klei dôk mơak hŏng anak čô snăn kahan hđăp Phùng Văn Toàn ti ƀuôn hgŭm Nghiã Tân, ƀuôn prŏng Gia Nghiã, čar Dak Nông lŏ ruah kơ pô bruă kriê dlăng wăl msat. Giăm 10 thŭn hŏng anei, ñu hrô gŏ sang phung găp djuê čuh brei brui mngưi, kriê dlăng êbeh 5 êtuh boh msat phung êngiă asei ti Wă msat phung êngiă asei čar čiăng hdơr knga kơ phung ƀĭng kahan.

Dŭm hruê anei ti ƀuôn prŏng Gia Nghĩa, čar Dak Nông dôk ngă klei bi kbưi yang ƀuôn tui si hră mtrŭn mrô 16 mơ̆ng khua knŭk kna čiăng gang mkhư̆ klei ruă tưp Covid-19. Ƀiădah ti msat lĭng kahan čar Dak Nông, dŭm boh msat lĭng kahan êngiă asei dôk dưi mprăp čiăng ngă knăm bi hdơr dŭm čô jhŏng ktang êngiă asei hlăm hruê 27/7. Phùng Văn Toàn, pô kiă kriê, găk răng msat lĭng kahan êngiă asei lač, thŭn anei, kyua klei ruă tưp bluh đĭ ktang, lu gŏ sang lĭng kahan êngiă asei mâo dưi hriê čuh brui mngưi, ung mô̆ kâo mprăp leh lu hruê mmông mprăp kơ mnơ̆ng myơr, sut bi doh dŭm boh msat đru kơ dŭm gŏ sang lĭng kahan êngiă asei mâo klei juh hlăm ai tiê.  “Pô dôk dưi hdĭp ară anei kâo lŏ mĭn kơ dŭm čô ƀĭng kahan êjai dôk hlăm wưng knap mñai mâo di ñu, leh mâo klei êngiê di ñu amâo lŏ dôk ôh. Mâo đa đa dŭm boh msat mâo leh sa thŭn amâo dah 5 thŭn truh kơ 7 thŭn amâo mâo ôh mnuih hlăm gŏ sang hriê čuh brui mngưi, ƀiădah mâo kâo bi ala gŏ sang ngă brei bruă anăn, čiăng kơ dŭm čô diñu dôk đih ti nei mâo klei bi juh, klei mđao hlăm dŭm boh msat”

Phùng Văn Toàn yăl dliê, thŭn 1970, ñu nao kahan hlăm klei bi kdơ̆ng hŏng Mi sua wĭt klei êngiê kơ ala čar, Ngă bruă ti krĭng kwar dhŭng truh kơ hruê dưi hluh hlir ala čar. Truh kơ thŭn 1979, mâo klei bi blah ti knông lăn krĭng dưr, ñu lo dơ̆ng nao bi blah đru kơ ala čar. Thŭn 1992, ñu lehanăn gŏ sang kƀiă đuê̆ mơ̆ng ƀuôn phŭn Vĩnh Phúc truh ti Dak Nông kčưm kơ bruă duh ƀơ̆ng. Čiăng bi hdơr dŭm čô ƀĭng kahan leh djiê, ñu čŏng akâo ngă bruă kriê dlăng msat grăp hruê čuh brui mngưi dŭm boh msat ti msat lĭng kahan êngiă asei čar Dak Nông. Hŏng ñu, kriê dlăng amâo knŏng djŏ bruă mă ôh, ƀiădah jing bruă klam, klei khăp hŏng dŭm čô ƀĭng kahan leh êngiă asei.

Trương Văn Bình, k’iăng khua bruă đoàn čar Dak Nông brei thâo, dŭm bruă ngă mơ̆ng Phùng Văn Toàn dưi lŏ bi čuê klei khăp ala čar kơ hđeh ênuk mrâo ti čar Dak Nông, grăp blư̆ hlăm dŭm hruê Tết, knăm prŏng hlăm ala čar, dŭm čô hđeh êdam êra srăng nao truh ti msat lĭng kahan êngiă asei čiăng đru kơ ñu kriê dlăng dŭm boh msat anăn. “Ñu mâo klei hur har kơ hmei, ktrâo anôk čuh brui mgưi kơ dŭm êpul nao čuă, mâo lu hdră tơdah adiê hlĭm hjan ñu kăn êdu ai lei, hrăm mbĭt hŏng dŭm êpul, hđeh êdam êra ngă bi leh dŭm hdră anăn msĕ si: čuh pui diăn bi hdơr. Mơ̆ng sa čô mâo klei bi hmô msĕ hŏng Phùng Văn Toàn. Êpul hđeh êdam êra mâo leh bruă čŏng nao đru kơ ñu dŭm bruă msĕ si; kih waih, bi doh, čŭt mnga, bi djŏ rup na nao, Phùng Văn Toàn jing sa gru hmô brei kơ hmei thâo bruă klam hđeh êdam êra, klei bhiăn mnăm êa hdơr kơ akŏ êa”.

Ară anei msat lĭng kahan êngiă asei čar Dak Nông mâo 500 boh msat, hlăm anăn mâo êbeh 200 boh msat ka thâo ôh găp djuê, ƀuôn sang. Aduôn Nguyễn Thị Hương, k’iăng khua kiă kriê knơ̆ng bruă mnuih mă bruă kahan êka êkeh lehanăn yang ƀuôn čar Dak Nông brei thâo, giăm 10 thŭn ngă bruă kriê dlăng msat, grăp hruê Phùng Văn Toàn ngă na nao bruă kih waih sang bi hdơr, kriê dlăng ana kyâo, sŭt dŭm boh msat, čuh brui mgưi, pui bi mngač kơ dŭm boh msat lĭng kahan êngiă asei. “Ñu ƀuh anei jing bruă ngă mâo klei yuôm bhăn msĕ hŏng mnuih mduôn khua ngă klei jăk, kyuanăn ñu ƀuh mâo klei mơak hlăm ai tiê. Wăt kơ mô̆ ñu ăt msĕ sơnăn mơh, grăp thŭn mâo lu hruê knăm, hruê Tết ăt đru hlăm dŭm bruă mprăp mnơ̆ng myơr kơ lĭng kahan êngiă asei. Lehanăn grăp thŭn hmei mâo dŭm bruă đru kơ ñu hlăm bruă kriê dlăng msat lĭng kahan êngiă asei, lehanăn čiăng kơ ñu mâo klei hdĭp mơak hĭn”

Hŏng dŭm klei đru hlăm bruă kriê dlăng, răng mgang msat lĭng kahan êngiă asei čar Dak Nông, thŭn 2020, Phùng Văn Toàn jing sa hlăm 3 čô mơ̆ng čar Dak Nông mâo klei pah mni jing “klei bi hmô ñăt kriêp kyua yang ƀuôn” mơ̆ng phŭn bruă mnuih mă bruă - kahan êka êkeh lehanăn yang ƀuôn. Anei jing sa klei mơak lehanăn bruă klam čiăng kơ Phùng Văn Toàn lŏ hur har hŏng bruă kriê dlăng ƀĭng kahan dôk pĭt lehanăn guôn găp djuê nao drông.