VOV4.Êđê- Hruê 26-7, Anôk bruă lĭng kahan leh anăn kahan ksiêm ƀuôn prŏng Hồ Chí Minh  hrăm mbĭt trŭn ngă bruă bi hgŭm ksiêm dlăng bruă hluê ngă klei kčah mtrŭn gang mkhư̆ klei ruă tưp ti alŭ wăl. Hluê anăn, dŭm êpul pŏk ngă bi hgŭm mơ̆ng 16 mmông hruê 26-7-2021 leh anăn ngă bruă jih hruê mlam, ti 12 anôk gak, êlan mŭt leh anăn 90 anôk gak ti dŭm alŭ wăl phŭn. 450 čô knuă druh lĭng kahan hlăm Êpul kahan Gia Địng leh anăn Êpul kahan ksiêm dlăng mrô 31, Anôk bruă lĭng kahan ƀuôn prŏng Hồ Chí Minh bi hgŭm hŏng dŭm êtuh čô kahan ksiêm hlăm êlan klông, kahan ksiêm, 113 leh anăn phung kahan knhăk hlăm Êpul kahan ksiêm ƀuôn prŏng Hồ Chí Minh čiăng mđĭ ktang bruă gak răng leh anăn mđĭ hnơ̆ng hiu suang dlăng hlăm dŭm ktuê êlan. Gưl bi hgŭm ngă bruă anei, knuă druh, lĭng kahan đru êpul kahan ksiêm hlăm bruă brei mnuih, êdeh êdâo dôk găn êrô hlăm êlan klông mjưh, ksiêm dlăng klei hâo hưn čiăng bi mklă djŏ êpul, mnuih, êdeh êdâo dưi brei ngă bruă hlăm wưng hluê ngă Asăp mtrŭn 16; tơdah ƀuh hlei pô ngă soh snăn bi trông hŏng êpul kahan ksiêm ngă hră mơar đŭ bi kmhal hluê si  hdră bhiăn kčah mtrŭn.

Pô mblang: H’Zawut Ƀuôn Yă