VOV4.Êđê- Hrue mbrue (8/7), knơ̆ng bruă kiă kriê kahan răng mgang knông lăn čar Daknông mkŏ mjing leh klei bi kƀĭn ksiêm wĭt bruă răng mgang knông lăn hlăm 6 mlan êgao. Tui si knơ̆ng bruă kiă kriê kahan răng mgang knông lăn Daknông, mkrah thŭn anei klei răng kriê ti knông lăn mâo klei êđăp ênang jăk, klei gang mkhư̆ phung čhĭ mnia soh hŏng klei bhiăn, phung ñu kma soh hŏng klei bhiăn, lehanăn mdrơ̆ng hŏng klei ruă tưp covid 19 mâo leh klei tŭ dưn.

Mbĭt hŏng bruă răng mgang klei êđăp ênang ti knông lăn, kahan răng mgang knông lăn lŏ đru leh kơ phung ƀuôn sang 1.250 hrue ai mă bruă, đru mkra brei êlan truh 6km hlăm krĭng ƀuôn sang, mkra wĭt 6 boh sang kơ dŭm gŏ êsei dleh dlan. knơ̆ng bruă kiă kriê kahan răng mgang knông lăn čar brei thâo, hlăm wưng kơ anăp kahan răng mgang knông lăn lŏ dơ̆ng hâo hưn, mtrŭt mjhar phung ƀuôn sang hlăm krĭng knông lăn amâo mâo đru, amâo mâo mdăp, amâo atăt ôh mnuih găn knông lăn soh hŏng klei bhiăn. Lehanăn djăp êpul êya lŏ dơ̆ng mtrŭt mjhar phung ƀuôn sang brei mâo klei răng hŏng mnuih tlĕ mŭt hlăm knông lăn soh hŏng klei bhiăn hlăm ViệtNam./.

Pô mblang: Y-Khem Niê