VOV4.Êđê - Ti krĭng wăl gơ̆ng knông lăn mrô 790, ƀăng jang knông lăn Bờ Y, kdriêk Ngọc Hồi, Anôk bruă gĭt gai lĭng kahan čar Kon Tum mkŏ mjing leh klei mđup brei mnơ̆ng ƀơ̆ng huă, kdrăp mnơ̆ng mdrao gŭn kơ êpul kahan ksiêm, êpul lĭng kahan 2 čar Attapư leh anăn Sê Kông, ala čar Lao. Ênoh jih jang Anôk bruă gĭt gai lĭng kahan răng mgang knông lăn čar Kon Tum mđup brei kơ êpul 2 čar mâo 13 ton braih, 80 thŭng ƀung hdang krô, čhiăm guôm ƀô̆, čhum ao răng mgang asei mlei, êa rao kngan hŏng ênoh êbeh 220 êklăk prăk.

Bi ala kơ êpul kahan ksiêm, êpul lĭng kahan 2 čar Attapư leh anăn Sê Kông mni lač jăk klei đru klă sĭt, djŏ mmông mơ̆ng Anôk bruă gĭt gai lĭng kahan răng mgang knông lăn čar Kon Tum, mbĭt anăn lŏ dơ̆ng mpŭ, răng kriê knhuah gru bi hgŭm yuôm bhăn, hyuă kjăp klei bi hgŭm hlăm bruă răng mgang klei êđăp ênang krĭng knông lăn leh anăn bi kdơ̆ng gang mkhư̆ klei čhĭ mnia matuĭ.

H Zawut pô mblang