VOV4.Êđê - Mnơ̆ng ƀơ̆ng mnuih Êđê ti čar Dak Nông hing ang hŏng dŭm mta djam tam mâo mnâo phĭ hŏng kan krô mâo mnâo jăk, mdê êdi. Êngao kơ trŏng phĭ amâo dah boh ya ut dliê, mnuih Êđê lŏ mâo dua mta hla phĭ mdê êdi khăng pioh tŭk hŏng kan krô jing hla hbei ƀlang leh anăn djam ƀlê.

Hla hbei ƀlang jing sa mta hla djam mâo klei phĭ lehanăn mnuih Êđê khăp sơnăk kơ hla djam anei. Hla hbei ƀlang kreh yua jing hla mâo kuôt hrah, kreh yua kơ klei tŭk djam êa, đeh hŏng mnga tei hŭng knô amâodah đeh hŏng kan krô… Hlăm anăn hla hbei ƀlang đeh hŏng kăn krô ênưih mjing ƀiă dah ƀơ̆ng jăk êdi.

Êlâo hĭn, mă hla hbei blang leh reh điêt lehanăn tram hŏng êa hlơr čiăng bi ƀiă klei phĭ lehanăn bi thu hĕ êa. Dŭm gŏ sang Êđê khăp ƀơ̆ng phĭ ktang amâo guôn tram ôh hla hbei ƀlang hŏng êa hlơr lehanăn tŭk mtah snăn yơh. Mă hla hbei ƀlang mtah nao ba tlê hŏng plăng, amâo tlê lĭk ôh, djam anei đeh par knŏng dŭm mnĭt ksă yơh. Dưm gŏ hlăm kpur čiăng kơ hlơr, tuh ƀiă êa prăi, čăm êsŭn Êđê plĕ hlăm gŏ lehanăn mplĕ hla ƀlang hŏng kan điêt aruăt krô, leh bi ƀăt amrêč hra srăng mâo yơh djam ƀơ̆ng jăk yâo. Djam hla ƀlang mâo mnâo ƀâo mngưi mơ̆ng plăng lehanăn mnâo kan krô jing jăk êdi.

Sa mta hla djam ăt mâo klei phĭ mnuih Êđê kreh yua tŭk hŏng kan krô điêt aruăt jing hla djam ƀlê. Djam anei jing sa mta hla djam dôk hlăm dliê. Djam ƀlê čăt jing kpum, hla điêt dlông lehanăn hla čăt mđrĭng mbĭt, hla mda dlăng mâo êa mtah kñĭ msĕ hŏng boh kruê̆ msăm. Mnuih Êđê kreh pĕ dŭm knăt hla mda lehanăn hla djam ƀlê mâo klei phĭ wĭt tŭk djam. Hla djam ƀlê đeh hŏng kan krô ăt msĕ hŏng hla hbei ƀlang. Khădah, hla djam ƀlê amâo guôn reh điêt amâo dah tlê ôh, mkra ñu sơnăn yơh. Đeh hla djam ƀlê hŏng kăn krô hlăm ƀrô 5 mnĭt lehanăn dưm amrêč hra čiăng bi ƀăt. Mdê kơ klei yua plăng msĕ hŏng djam hla hbei ƀlang, djam ƀlê srăng yua lu amrêč, êjai dôk đeh mâo mnâo ƀâo mngưi lehanăn mnâo trô̆ mơ̆ng amrêč. Djam ƀlê êjai ƀơ̆ng mâo klei ƀâo mngưi, ñuôt lehanăn bhĭ bhĭ ƀiădah nao ƀơ̆ng sơnăk.

Hŏng klei khăp ƀơ̆ng phĭ lehanăn hăng, Mnuih Êđê dlăng kơ hla djam hbei ƀlang lehanăn hla ƀlê jing 2 mta djam jăk sơnăk, huă hŏng êsei dôk hlơr jing nao huă êdi lehanăn mâo mnâo jăk sơnăk. Klei phĭ mơ̆ng 2 mta hla djam anei tơdah ƀơ̆ng tal êlâo amâo mâo thâo ƀơ̆ng ôh. Leh mâo mmah 2; 3 blư̆, mnuih ƀơ̆ng srăng ƀuh mâo klei mmih dôk hlăm klei phĭ anăn. Lehanăn, mnuih ƀơ̆ng srăng khăp snăk kyua sa mta djam mâo lu mnâo ktang, bi kdơ̆ng hdơ̆ng diñu ƀiă dah ngă kơ mnuih ƀơ̆ng mâo thâo lŏ hngah ôh ƀơ̆ng jăk êdi.