VOV4.Êđê – Hlăm lu thŭn êgao, kđông răng mgang knông lăn Hồ Le (Anôk bruă gĭt gai lĭng kahan răng mgang knông lăn čar Kon Tum) mđĭ ktang bruă đru čung ba mnuih ƀuôn sang, ngă jăk hdră êlan mơ̆ng Đảng, hdră bhiăn knŭk kna, mơ̆ng năn mguôp rơ̆ng klei êđăp ênang kluôm ala ƀuôn ti krĭng knông lăn.

Alŭ wăl kđông kahan răng mgang knông lăn Hồ Le kriê dlăng mâo 8 alŭ hlăm 2 să Ia Đal lehanăn Ia Tơi, kdriêk Ia H’Drai, čar Kon Tum hŏng 717 gŏ êsei, 2.245 čô mnuih, lu jing mnuih mă bruă hlăm kdrăn ngă lŏ hma hlăm Anôk bruă 716, Binh đoàn 15 lehanăn Anôk bruă mguôp hnư Duh bi liê lehanăn mđĭ kyar Duy Tân. Hlăm 17 thŭn êgao, mơ̆ng leh mkŏ mjing kđông kahan truh kơ ară anei, êngao kơ bruă klam hiu suang dlăng, ksiêm dlăng krĭng knông lăn, Kđông kahan lŏ ngă jăk bruă mtrŭt mjhar mnuih ƀuôn sang.

Boh nik, mơ̆ng akŏ thŭn 2020 truh kơ ară anei, kđông kahan tiŏ nao leh êpul hluê ngă bruă klam hiu suang dlăng, kiă kriê, gak răng, kñăm gang mkhư̆ klei ruă Covid 19, rơ̆ng kjăp bruă ksiêm dlăng krĭng knông lăn, alŭ wăl. Hlăm anăn, mkŏ mjing leh 150 gưl ksiêm dlăng krĭng knông lăn, gang mkhư̆ klei ruă Covid 19. Mbĭt anăn, krơ̆ng kjăp klei bhiăn krĭng knông lăn, pral hmao ƀuh, msir mghaih phung tlĕ mŭt hlăm ala čar soh hdră bhiăn, mkŏ mjing klei huai mdoh rơ̆k rung ti dŭm gơ̆ng knăl knông lăn ala čar lehanăn êlan hiu suang dlăng knông lăn mâo 19 km, krơ̆ng kjăp 3 êpul mă bruă ti alŭ wăl bi hgŭm hŏng bruă sang čư̆ êa alŭ wăl, pral msir mghaih dŭm boh klei mâo hlăm alŭ wăl mâo kđông kahan kriê dlăng.

Hlăm hdră mtrŭt mjhar mnuih ƀuôn sang, kđông kahan đru kčĕ hŏng bruă Đảng, bruă sang čư̆ êa 2 să Ia Đal lehanăn Ia Tơi, kdriêk Ia H’Drai bi kjăp êpul knuă druh să, alŭ ngă bruă ba wĭt klei tŭ dưn, bi hriăm mbŏ 6 čô đoàn viên êdah kdlưn čiăng bi mŭt Đảng, bi hgŭm hŏng Anôk bruă sang čư̆ êa să Ia Đal, Binh đoàn 15 mkŏ mjing Keh “Hruê kyua mnuih ƀun” čar mâo leh giăm 30 êklăk prăk, nao čuă êmuh 24 čô knuă druh, lĭng kahan ruă duam, gŏ êsei mâo klei hdĭp dleh dlan êbeh 9 êklăk prăk, mđup brei êbeh 40 hnư mnơ̆ng lehanăn êbeh 600 blah čhiăm guôm ƀô̆ kơ dŭm gŏ êsei mâo klei hdĭp dleh dlan hmăi mơ̆ng klei ruă Covid 19, mđup brei 4 hnư mnơ̆ng kơ sang hră gưl tlâo čiêm rông hđeh mnuih djuê ƀiă kdriêk lehanăn dŭm sang hră gưl hđeh điêt, gưl sa, gưl dua să Ia Đal ƀri mphŭn pŏk thŭn hriăm mrâo lehanăn mjưh ruê̆ thŭn hriăm truh 6 êklăk prăk; ba jao prăk đru kơ Hdră bruă Hrăm mbĭt hŏng adei nao sang hră kơ 3 čô hđeh mâo ênoh 22,5 êklăk prăk, đru 15 êklăk prăk kơ gŏ êsei 1 čô hđeh jing anak rông kđông kahan răng mgang knông lăn.

Êngao anăn, kđông kahan tiŏ nao leh 12 čô knuă druh, lĭng kahan bi hgŭm hŏng bruă sang čư̆ êa alŭ wăl nao hgŭm hlăm hdră truih mdjiê 2 ha dliê pui ƀơ̆ng ti krĭng alŭ 8, să Ia Đal lehanăn truih mdjiê 3 ha đang ksu pui ƀơ̆ng ti anôk bruă 716 hlăm alŭ Ia Đer, să Ia Đal; bi hgŭm hŏng Anôk bruă 716, anôk bruă sang čư̆ êa să Ia Đal mtô mblang leh kơ hdră dôk dơ̆ng ƀơ̆ng huă doh gang mkhư̆ klei ruă ti mnuih lehanăn mnơ̆ng rông 12 blư̆, mâo giăm 300 čô mnuih nao hgŭm, đru kơ mnuih ƀuôn sang mkra wĭt 7 boh sang jhat rai, hrui buč hbei, duiñ kñŭl lehanăn dlăng kriê kphê, mkăp ana mjeh lehanăn ktrâo lač kơ dŭm pluh gŏ êsei kơ hdră mnêč pla djam mtam, mkŏ mjing gru hmô rông êmô ana mđai, đru sa drei êmô ana kơ gŏ êsei ƀun, mbĭt anăn đru kơ mnuih ƀuôn sang alŭ wăl lŏ mkra war rông, rông hŏng klei doh, gang mkhư̆ kjăp klei ruă tưp. Kđông kahan ăt ba nao 2 čô knuă druh, lĭng kahan jing mnuih djuê ƀiă nao đru kơ 2 gŏ êsei ƀun tlaih kơ ƀun, kahan mbha 16 čô knuă druh, lĭng kahan jing Đảng viên nao đru 53 gŏ êsei mđĭ kyar bruă duh mkra.

Hluê ngă hdră “Jih jang mnuih ƀuôn sang nao hgŭm răng mgang klei dưi kiă kriê krĭng lăn, răng mgang kjăp knông lăn ala čar hlăm boh klei mrâo’’, kđông kahan răng mgang knông lăn Hồ Le, Knơ̆ng gĭt gai lĭng kahan răng mgang knông lăn čar Kon Tum mtô mblang, mtrŭt mjhar 3 êpul êya lehanăn 13 gŏ êsei mnuih ƀuôn sang ti să Ia Đal nao kuôl kă čŏng kriê dlăng 13 km êlan knông lăn, 13 ƀĕ gơ̆ng knăl knông lăn lehanăn 5 êpul răng mgang klei êđăp ênang ala ƀuôn. Hŏng să Ia Tơi, kđông kahan răng mgang knông lăn dôk bi hgŭm ksiêm dlăng, mtô mblang lehanăn mtrŭt mjhar êpul êya, mnuih, nao hgŭm sa ai hlăm hdră čŏng kriê dlăng klei êđăp ênang ti krĭng knông lăn.

Thiếu tá, khua kđông kahan Nguyễn Văn Ngọc – kđông kahan răng mgang knông lăn Hồ Le mñă klă: Leh 17 thŭn mkŏ mjing lehanăn đĭ kyar, hŏng knhuah gru kdrưh k’ăm mơ̆ng Ling kahan Awa Hô, knuă druh lĭng kahan kđông răng mgang knông lăn Hồ Le mơ̆ng dŭm ênuk gưl amâo uêñ klei dleh dlan, hrăm mbĭt hŏng mnuih ƀuôn sang dŭm djuê ana hdĭp ti krĭng knông lăn păn kjăp phao ktuang răng mgang krĭng knông lăn mơ̆ng ala čar ƀrư̆ hruê ƀrư̆ h’ĭt kjăp hĭn./.