VOV4.Êđê - Klei bi kdung wưng kčah truh hdră kñăm krĭng ƀuôn sang mrâo jing klei khyua kiă kriê kdriêk Lạc Dương, čar Lâm Đồng bi mĭn. Ƀiădah plah wah 2 hdră jing truh hdră kñăm hlăk êjai dŭm mta tur knơ̆ng ka klă sĭt kjăp ktang lehanăn bi kdung wưng čiăng mkŏ mjing hnơ̆ng kčah jăk, alŭ wăl anei ruah leh hdră msir tal dua. Ngă êmưt čiăng rơ̆ng klei klă sĭt, kjăp ktang hlăm bruă mkŏ mjing krĭng ƀuôn sang mrâo.

Truh kơ jih thŭn 2020. Ti kluôm kdriêk Lạc Dương mâo 4 boh să dưi mâo klei čih yap mơ̆ng dhar bruă sang čư̆ êa čar Lâm Đồng bi mklă srăng mâo ênŭm hnơ̆ng čuăn mkŏ mkra krĭng ƀuôn sang mrâo. Ti să Đưng K’Nơ̆ mâo truh 14/19 hnơ̆ng čuăn. Bruă rŭ mdơ̆ng hlăm bruă duh mkra - yang ƀuôn mâo dŭm hdră êlan čiăng mprăp kơ klei hdĭp, bruă duh mkra mơ̆ng mnuih ƀuôn sang hlăm dŭm să jing krĭng ƀuôn sang mrâo ăt dôk mâo klei duh bi liê lehanăn đĭ kyar êlâo hĭn. Dŭm bruă mâo kơ bruă duh ƀơ̆ng mbĭt hŏng bruă lŏ krŭ wĭt bruă ngă lŏ hma, bi mlih hdră êlan bruă duh mkra ti krĭng ƀuôn sang, mkra hdră êlan lehanăn bi mđĭ klei hdĭp mnuih ƀuôn sang jing bruă tal êlâo hĭn. Dŭm hdră êlan čiăng bi hrŏ klei ƀun ƀin, rơ̆ng kơ klei hdĭp hlăm yang ƀuôn mâo boh tŭ dưn yuôm bhăn. Kyuanăn, truh mlan 11/2020 hlăm alŭ wăl adôk knŏng 122 gŏ êsei dôk hlăm klei ƀun knap, hlăm ƀrô 1,8%. Ti năn, hnơ̆ng gŏ sang dôk hŏng klei ƀun ƀin jing mnuih djuê ƀiă mâo 119 gŏ sang, hlăm ƀrô 2,5%. Ênoh prăk ba wĭt sa thŭn hlăm sa čô mnuih ti kdriêk mâo hlăm ƀrô 45,9 êklăk prăk.

Ară anei hlăm bruă rŭ mdơ̆ng krĭng ƀuôn sang mrâo ti kdriêk Lạc Dương, čar Lâm Đồng mâo 3 klei kpăk êgun ti 3 boh phŭn jing: Wăl hdĭp mda, êlan klông êrô êbat lehanăn să krĭng taih kbưi Đưng K’Nơ̆. Bi kơ dŭm klei hlăm wăl hdĭp mda, Hoàng Văn Hãnh - k’iăng anôk bruă ngăn dŏ lehanăn wăl hdĭp mda kdriêk Lạc Dương brei thâo: 3/5 boh phŭn mơ̆ng hnơ̆ng čuăn wăl hdĭp mda dưi mâo leh hlăm grăp să. Hlăm anăn mâo dŭm bruă hiu mă lehanăn dŭ mdiăng jah jâo, hrui mă jah yua grăp hruê lehanăn mkra brŏng čiăng mplĕ jah djâo. Boh nĭk hlăm bruă hrui mă dŭm jah hruh, giêt êa drao mgang kơ ana pla mjing. Khădah mâo đa đa gŏ sang, mnuih ƀuôn sang ka thâo săng klă ôh klei yuôm bhăn kơ dŭm bruă ngă anei, amâo hur har lehanăn amâo čŏng mă ôh, mâo klei hmăi amâo jăk kơ jih jang hdră êlan čiăng truh kơ krĭng ƀuôn sang mrâo.

Bi kơ bruă êlan klông, klei kpăk êgun dôk mâo ti kdriêk Lạc Dương jing ti anôk êlan mâo boh taih 7.000m mơ̆ng alŭ 2 nao ti alŭ Đưng Trang hlăm să Đưng K’Nơ̆. Nguyễn Văn Huynh, khua hlăm bruă duh mkra - rŭ mdơ̆ng kdriêk Lạc Dương brei thâo: Čiăng rơ̆ng kơ bruă să Đưng K’Nơ̆ srăng mâo ênŭm dŭm klei čuăn kơ êlan klông čiăng đru mguôp kơ klei srăng bi leh ênŭm hnơ̆ng čuăn mkŏ mkra krĭng ƀuôn sang mrâo hlăm thŭn 2021, anôk bruă anei mâo klei mtrŭt mjhar leh kơ bruă sang čư̆ êa kdriêk Lạc Dương mâo bruă lŏ mkra wĭt, lehanăn mkra jăk hĭn dŭm bĭt êlan hŏng ênoh duh bi liê mĭn tĭng hlăm ƀrô 4 êklai prăk. Năng ai srăng bi leh hlăm thŭn 2021.

Tơdah dưi bi leh 2 bruă ti dlông êjai dôk mâo prăk duh bi liê. Bruă dôk ka leh jing knŏng dôk ti să Đưng K’Nơ̆. Čiăng rŭ mdơ̆ng krĭng ƀuôn sang mrâo thŭn 2021, klei čiăng duh bi liê mơ̆ng să Đưng K’Nơ̆ mâo dŭm bruă hlăm: Êlan klông, mnơ̆ng dhơ̆ng yua hlăm dhar kreh, êa yua doh, kdrăp mkăp pioh êa lehanăn boh nĭk kơ bruă srăng bi hrŏ klei ƀun ƀin.

Mâo klei čiăng prŏng mơ̆ng kđi čar kdriêk Lạc Dương brei ƀuh klă hlăm dŭm bruă kñăm kơ klei bi mguôp, klei đru să Đưng K’Nơ̆. Kčưm mơ̆ng thŭn 2021, khua kiă kriê kdriêk nao lehanăn ksiêm dlăng, gĭt gai kơ dŭm boh phŭn djŏ tuôm hŏng bruă mđĭ hnơ̆ng klei hdĭp mnuih ƀuôn sang ti să Đưng K’Nơ̆. Kyua bruă duh bi liê jing knŏng klei čiăng, bi kơ bruă mđĭ klei hdĭp mnuih ƀuôn sang čiăng mâo klei sa ai jing klei yuôm bhăn hĭn hlăm bruă đĭ kyar lehanăn bi leh hdră êlan mkŏ mkra krĭng ƀuôn sang mrâo thŭn 2021 ti să Đưng K’Nơ̆.

Tui si hdră êlan êlâo dih, truh thŭn 2021, kdriêk Lạc Dương, čar Lâm Đồng srăng mâo klei dưi mkŏ mkra krĭng ƀuôn sang mrâo. Khădah ƀuh lu bruă čuăn amâo mâo kjăp ôh, kyuanăn kdriêk Lạc Dương bi mklă srăng kdung truh ti thŭn 2022. Bruă bi kdung amâo mâo yuôm ôh mkă hŏng klei čiăng kjăp hĭn hlăm dŭm hnơ̆ng čuăn, jing klei hdĭp jăk siam kơ mnuih ƀuôn sang. Kyuanăn ngă bruă êmưt ƀiădah kjăp jing yuôm bhăn hĭn kyua bruă prŏng dưi rŭ mdơ̆ng ti atur kjăp, snăn jih jang dưi dôk kjăp.