VOV4.Êđê- Hdră mtrŭn mrô 05 mơ̆ng Anôk kiă kriê bruă Đảng kdriêk Lăk, čar Dak Lak kơ bruă hluê ngă hdră mkŏ dăp mnơ̆ng pla, mnơ̆ng rông wưng thŭn 2021-2025, leh giăm sa thŭn hluê ngă mjing leh ai lar bra êlam, pŏk sa hdră bi hrŏ ƀun h’ĭt kjăp kơ mnuih ƀuôn sang djuê ana ƀiă ti krĭng dleh dlan anei.

Klei êdah kdưn mơ̆ng hdră mtrŭn mrô 05 mơ̆ng bruă Đảng ti kdriêk Lak, čar Dak Lak jing iêo mthưr ai bruă kđi čar mơ̆ng kdriêk truh kơ alŭ ƀuôn nao hgŭm mbĭt. Phung knuă druh, đảng viên êdah kdlưn nao hgŭm êlâo, hŏng ai tiê bruă klam “Giăm hŏng mnuih ƀuôn sang, kyua mnuih ƀuôn sang, răng kriê mnuih ƀuôn sang”. Amâo yua ôh ngăn prăk mơ̆ng knŭk kna, kluôm kdriêk iêo mthưr klei bi mguôp mơ̆ng knuă druh, đảng viên, dŭm anôk bruă, knơ̆ng bruă bi mguôp hŏng ƀuôn sang mnuih djuê ƀiă, đru bi mguôp ngăn prăk prăk, ana mdjeh kơ dŭm gŏ sang ƀun ƀin, mtô mjuăt klei pla mjing, răng kriê. Hlăm thŭn tal êlâo ngă hdră anei, Kdriêk Lak mâo klei êdah kdlưn ktang hlăm bruă mlih mta ana kyâo pla mjing, guôm mtah lăn amâo mâo kyâo.

Khua dlăng bruă Đảng Võ Ngọc Tuyên mđup brei mjeh ana pla mjing kơ mnuih ƀuôn sang Ƀuôn Triêt

Ti Ƀuôn Dơ Tu, să Ƀuôn Triết, kdriêk Lak čar Dak Lak, dŭm anôk lăn amâo jing, čŏng čư̆ ară anei dưi guôm mtah kyua grăp sang mâo arăp mkăp brei mjeh kyâo, mtô klei pla mjing djŏ hŏng lăn anăn. Ayŏng Y Jony Ƀyă, ti ƀuôn Dơ Tu, să Ƀuôn Triêt, kdriêk lăk, hơ̆k mơak kyua mâo hmao pla pluă dŭm pluh ana knheh Thailand êlâo kơ yan hjan, đĭ hriê mtah jăk kluôm 4 sao lăn:

“Gŏ sang kâo mâo klei lač jăk kơ kdriêk, să lu êdi kyua mkăp brei leh mjeh ana boh kroh mlih klei pla mjing hŏng klei bi hmô pla pluă. Gŏ sang kâo srăng gĭr kriê dlăng čiăng mđĭ bruă duh mkra hŏng ana ƀơ̆ng ƀoh, ƀrư̆ ƀrư̆ dưi tlaih mơ̆ng klei knap mñai.”

Si să Yang Tao, kdriêk Lăk, đang war pla pluă ana knheh mơ̆ng gŏ sang Y-Gham Triêt, ti ƀuôn Bhô̆k ăt đĭ hriê siam leh hruê mmông pla mjing. Y-Gham brei thâo, Amâo djŏ ôh knơ̆ng dưi mđup brei dŭm pluh ana mjeh, phung knuă druh hlăm să, kdriêk lŏ hriê truh ti đang pla mjing mtô bruă pla mjing leh anăn kriê dlăng čiăng ana boh đĭ hriê jăk. Thâo săng klă boh tŭ dưn hlăm bruă mlih ana pla mjing, ayŏng Y-Gham mĭn tĭng thŭn anei srăng lŏ blei thiăm mjeh čiăng pla kluôm anôk lăn pô lui hơăi mang lu thŭn leh.

“Gŏ sang kâo mâo să mkăp brei ana mjeh, kâo lač jăk êdi kơ knŭk kna mâo leh klei đru. Kâo hmăng hmưi knŭk kna lŏ mkăp brei thiăm kơ kâo čiăng lŏ pla thiăm hlăm đang anei, gĭr ktưn mđĭ kyar bruă duh mkra”.

Mnuih ƀuôn sang pla mjeh ana boh kroh

 Nguyễn Văn Huyên, khua bruă Đảng să Yang Tao, kdriêk Lăk brei thâo, ară anei kluôm să mkăp brei leh êbeh 7 êbâo mjeh ana ƀơ̆ng ƀoh mâo ana knheh, ana boh đung, ana kčil kơ 1.473 gŏ sang ƀun ƀin. Mbĭt hŏng anăn, alŭ wăl mkŏ mjing leh 22 klei bi hmô pla ana knheh mjeh Thailand ti 11 hlăm să, čiăng kơ mnuih ƀuôn sang thâo bi hriăm, lŏ iêo mthưr dŭm anôk bruă bi mguôp, phung mâo ai tiê kmah blei thiăm ana mjeh đru kơ mnuih ƀuôn sang:

“Hmei mâo leh klei ksiêm dlăng kluôm ênhă lăn hlăm alŭ wăl êlâo dih mnuih ƀuôn sang lui hơăi mang. Hmei mtă kơ mnuih ƀuôn sang srăng lŏ wĭt pla mjing hlăm đang hma pô, kñăm mprăp bi mlih klei rông mnơ̆ng dhơ̆ng, klei pla mjing tui si hdră mtrŭn mrô 05. Leh mkŏ mjing klei hâo hưn, hmei iêo mthưr ngă bruă yang ƀuôn hŏng jih jang êpul êya, knơ̆ng bruă, ăt msĕ hŏng grăp čô knuă druh, đảng viên hlăm alŭ wăl bi mguôp. Bi kơ să hmei, bi mguôp leh êbeh 10 êklăk prăk čiăng blei mjeh ana boh knheh Thailand. Ana knheh anei yơh jing lu bruă kñăm leh anăn ăt kñăm lăm lui klei ư̆ êpa, bi hrŏ klei ƀun ƀĭn kơ mnuih ƀuôn sang hlăm wưng kơ anăp.”

Dŭm ana mjeh amâo mă prăk đru kơ gŏ êsei ƀun

 Lak jing kdriêk mâo ênoh gŏ sang ƀun ƀin lu tal 2 ti čar Dak Lak hŏng hnơ̆ng êbeh 27%. Hlăm anăn, hlăm 90 ƀuôn mnuih djuê ƀiă, hnơ̆ng gŏ sang ƀun ƀin dôk mâo 60%. Lu thŭn êgao, mâo lu gŏ sa mnuih djuê ƀiă dôk lui đang huâng, sang huâng, lui lăn hơăi mang, ngă truh bruă lăm lui klei ƀun ƀin tuôm hŏng lu klei dleh dlan. Võ Ngọc Tuyên, khua bruă Đảng ti kdriêk Lak brei thâo: Leh giăm sa thŭn mkŏ mjing, phung knuă druh, đảng viên mâo leh klei iêo mthưr, mđup brei êbeh 100 êbâo mjeh ana ƀơ̆ng boh, hlăm anăn lu hĭn jing ana knheh Thailand, kruê̆ mih, kruê̆ dŭng, boh soai, boh truôl, ƀoh đung hŏng ênoh êbeh 2 êklai prăk. Giăm 10.000 gŏ sang ƀun ƀin dưi mâo ana mjeh leh anăn mnuih ƀuôn sang mlih leh klei pla mjing, bi guôm mtah êbeh 200 ha lăn hŏng, lăn lui hơăi mang.

“Hdră mtrŭn ba mdah jing klă klơ̆ng, mâo boh tŭ dưn leh anăn mâo klei bi lar ktang êdi. Truh kơ mmông anei, kdriêk Lăk ka mâo yua ôh ngăn prăk knŭk kna, kyua hmei dưi iêo mthưr dŭm anôk bruă bi mguôp mkăp brei ana mjeh kơ dŭm ƀuôn bi mguôp. Hruê mmông jing ƀiă êdi knŏng mơ̆ng hruê 5/3 truh kơ ară anei dưi pla êbeh 100 êbâo mjeh dŭm mta. Dưi bi êdah klei khăp, bruă klam mơ̆ng Đảng, knŭk kna hŏng mnuih ƀuôn sang, boh nik jing mnuih ƀuôn sang mnuih djuê ƀiă.”

Hdră mtrŭn mrô 05 mơ̆ng êpul khua bruă Đảng kdriêk Lak, čar Dak Lak dưi ngă tŭ jing leh anăn mâo klei sa ai mơ̆ng phung knuă druh, đảng viên leh anăn mnuih ƀuôn sang. Mơ̆ng anăn dưi mâo klei bi mlih hlăm klei mĭn leh anăn klei ngă bruă mơ̆ng mnuih ƀuôn sang hlăm dŭm alŭ, ƀuôn, mbĭt anăn lŏ mtrŭt mđĭ bruă mkra mjing, pŏk êlan dưi bi hrŏ klei ƀun ƀin kjăp ti alŭ wăl anei.

Pô mblang: Y-Ƀel Êban