VOV4.Êđê - Hluê ngă Hdră mtrŭn mrô 04 hruê 19 mlan 8 thŭn 2016 mơ̆ng Anôk bruă Đảng čar Kon Tum gưl XV kơ bruă lŏ dơ̆ng mkŏ mkra dŭm să dleh dlan hlăm boh klei mrâo, dưi tiŏ nao mjĕ mjing, đru kơ să dleh dlan Văn Lem, kdriêk Đăk Tô, 5 thŭn êgao, mđĭ lar klei dưi, bruă klam thơ̆ng kơ bruă, Keh răng mgang lehanăn mđĭ kyar dliê čar Kon Tum mâo leh lu bruă ngă klă sĭt, tŭ dưn hlăm bruă đru kơ dŭm să mjĕ mjing kriê dlăng, răng mgang lehanăn mđĭ kyar dliê.

Hruê 18-6 mrâo êgao, hluê ngă Hdră mơ̆ng bruă Đảng Keh răng mgang leh anăn Mđĭ kyar dliê čar Kon Tum kơ klei đru, mkŏ mjing să bi mjĕ Văn Lem, kdriêk Đăk Tô, sa êpul mă bruă mơ̆ng Keh dưi mbha bi hgŭm hŏng bruă Đảng, Knơ̆ng bruă sang čư̆ êa să mkŏ mjing Knăm pŏk ngă “Têt pla ana kyâo hdơr nanao kơ Awa  Hồ” thŭn 2021. Klei bi kƀĭn dưi mkŏ mjing ti Sang Roong ƀuôn Măng Rương, mâo lu mnuih ƀuôn sang alŭ wăl. Amai Y Bé Khua bruă êdam êra ƀuôn Măng Rương brei thâo: “Kâo mơak snăk, hruê anei mâo dŭm êpul êdam êra hŏng alŭ, să kƀĭn pla ana kyâo čiăng êdei anei mnuih ƀuôn sang ƀuh klei tŭ dưn pô pla ana kyâo. Mâo ana kyâo mtah ƀuôn sang mâo êa pioh yua.”

Hlăm klei pŏk ngă mtam “Têt pla ana kyâo hdơr nanao kơ Awa Hồ” thŭn 2021, Keh răng mgang leh anăn Mđĭ kyar dliê čar Kon Tum mđup brei leh kơ bruă Đảng, bruă sang čư̆ êa leh anăn mnuih ƀuôn sang să Văn Lem ana hngô 3 hla, mta 2 thŭn čiăng pla kơup êyui ktuê êlan, riêng gah Sang Roong mơ̆ng dŭm boh ƀuôn kñăm mjing wăl hdĭp mda jăk siam leh anăn wăl hdĭp mda mtah -doh-siam. Phung knuă druh Êpul mă bruă mơ̆ng keh ktrâo lač kơ mnuih ƀuôn sang hdră pla mjing, răng mgang leh anăn kriê dlăng čiăng ana hngô hriê kơ prŏng. A Hùng, Khua Knơ̆ng bruă sang čư̆ êa să Văn Lem brei thâo, klei năng mđing jing bi mklă dŭm bruă ngă snei, klei mnuih ƀuôn sang hlăm să thâo săng kơ ana pla mjing, pla dliê leh anăn răng mgang dliê ƀrư̆ hruê ƀrư̆ dưi mđĭ: “Jih wưng êgao truh wưng ară anei mnuih ƀuôn sang ti să Văn Lem jih ai tiê kơ bruă kriê dlăng răng mgang dliê. Bruă klam, pral mprăp êdeh êdâo, djăp mta bruă djŏ tuôm kơ bruă kriê dlăng răng gang dliê. Ksiêm dlăng nanao, păn kjăp boh klei ti alŭ wăl hlăm wăl dliê alŭ phăn jao. Boh nik ară anei mâo hdră mtrŭn mơ̆ng čar, kdriêk kơ bruă pla ana kyâo ti să Văn Lem snăn brei lač anei jing bruă klam yuôm bhăn êdi kơ klei pla dliê hlăm duôr čư̆ kla sah kba ti să Văn Lem. Mnuih ƀuôn sang hŏng phung êdam êra tĭ alŭ jih ai tiê kơ bruă kriê dlăng răng mgang dliê leh anăn pla dliê.”

Đru să bi mjĕ mjing Văn Lem hlăm bruă thơ̆ng, jing hluê ngă hdră êlan tla prăk răng mgang dliê, grăp thŭn Keh răng mgang leh anăn Mđĭ kyar dliê čar Kon Tum mkŏ mjing Êpul mă bruă kyua  Khua Keh ngă khua êpul ktrâo lač kơ bruă sang čư̆ êa să ksiêm dlăng bruă čih mkra, bi mklă hdră mĭn tĭng hrui, bi liê kơ prăk răng mgang dliê, kriê dlăng ba yua, bi mklă ba yua prăk răng mgang dliê, mkŏ mjing hră mơar čih mkra ênoh kriê dlăng, răng mgang dliê kơ gŏ sang, mnuih, êpul êya mnuih ƀuôn sang alŭ. Hồ Thanh Hoàng, Khua Keh răng mgang leh anăn Mđĭ kyar dliê čar Kon Tum brei thâo, mơ̆ng klei đru, đru thơ̆ng kơ bruă mơ̆ng keh, bruă kriê dlăng, răng mgang dliê ti să bi mjĕ mjing dưi hluê ngă jăk. Mnuih ƀuôn sang thâo săng hnơ̆ng yuôm bhăn leh anăn klei tŭ sĭt êdi mơ̆ng bruă răng mgang, mđĭ kyar dliê. “Mnuih ƀuôn sang bi mlih leh klei thâo. Êlâo dih mnuih ƀuôn sang răng mgang dliê ka čŏng ngă bruă ôh. Ară anei mnuih ƀuôn sang răng mgang dliê čŏng ngă. Digơ̆ thâo săng bruă anei jing hdră ngă bruă mưn. Răng mgang dliê jing hdră jăk hĭn čiăng dưi mâo mă prăk răng mgang dliê hŏng klei jăk hĭn. Mơ̆ng prăk bi liê hdră răng mgang dliê đru mguôp mkra mđĭ klei hdĭp mnuih ƀuôn sang.”

Ăt ti gŭ klei ktrâo lač, kčĕ hdră mnêč mơ̆ng Keh răng mgang leh anăn Mđĭ kyar dliê čar Kon Tum, mnuih ƀuôn sang 4 alŭ ti să Văn Lem, kdriêk Đăk Tô pŏk ngă Hdră đru pla dliê mkra mjing ti lăn huâng, duôr čư̆ kla, lăn sah kba hŏng ênhă 123 ha mơ̆ng ênoh prăk răng mgang dliê mơ̆ng să. Hdră anei đru kơ mnuih ƀuôn sang să Văn Lem mâo thiăm bruă mă, mđĭ prăk hrui wĭt, đru msir klei ư̆ êpa, bi hrŏ klei ƀun knap mrâo đru hluê ngă tŭ dưn hdră kñăm pla mrâo 15 êbâo ha dliê mơ̆ng Hdră mtrŭn Klei bi kƀĭn bruă Đảng čar Kon Tum tal XVI kčah. Năng mđing hĭn jing hŏng bruă pla dliê 5000ha dliê mâo să kriê dlăng. Ênoh prăk tla răng mgang dliê mơ̆ng dŭm êpul êya dưi mâo grăp thŭn đru kơ mnuih ƀuôn sang mđĭ prăk hrui wĭt leh anăn dưi mđĭ lar lu bruă ngă yuôm bhăn čiăng êpul êya ƀrư̆ hruê ƀrư̆ đĭ kyar.