VOV4.Êđê- Hlăm klei bi tuôm hŏng Khua Adŭ bruă Êpul hgŭm lu ala čar ti Austria, Ghada Fathi Waly, Khua bruă kƀĭn ala Vương Đình Huệ bi mklă, Êpul hgŭm lu ala čar ngă bruă klam yuôm bhăn hlăm hdră êlan blŭ hrăm leh anăn hrăm mbĭt hŏng Việt Nam hlăm bruă mkŏ mjing leh anăn mđĭ kyar lăn čar, mjing klei găl mđĭ kyar, mđĭ kơhưm, gru rup Việt Nam ti dlông rŏng lăn. Khua bruă kƀĭn ala Vương Đình Huệ bi mni kơ Êpul hgŭm bruă đru leh kơ Việt Nam hlăm hdră gang mkhư̆ klei ruă Covid-19; lŏ dơ̆ng đru Việt Nam mđĭ kyar bruă duh mkra êdei klei ruă tưp, mguôp hŏng bruă msir mgaih klei hmaĭ amâo jăk mơ̆ng Covid-19 hŏng bruă duh ƀơ̆ng mơ̆ng mnuih ƀuôn sang. Khua bruă kƀĭn ala Vương Đình Huệ čang hmăng, Êpul hgŭm lu ala čar lŏ dơ̆ng mđĭ lar bruă klam răng mgang klei êđăp ênang dlông rŏng lăn, mpŭ hdră bhiăn quốc tế, đru kơ dŭm ala čar, hlăm anăn mâo Việt Nam ngă Hdră klei bi kƀĭn kyua klei đĭ kyar hơĭt kjăp.

Pô mblang: H’Zawut Ƀuôn Yă