VOV4.Êđê- Bri hlăm wưng klei kƀĭn trông phung khua bruă kƀĭn ala tar rŏng lăn tal 5, ti sang bruă êpul hgŭm lu ala čar ti Viên, ala čar Austria, khua bruă kƀĭn ala Vương Đình Huệ mâo leh klei bi tuôm hŏng khua kiă kriê anôk bruă pui kmlă nguyên tử Quốc tế (IAEA) Ra-pha-en Ma-ri-a-nô Gờ-Rốt-xi. Hlăm klei tŭ drông IAEA hưn mdah srăng mkăp brei 3 kdrăp ksiêm mkă kman PCR thâo ba hiu lehanăn lu Sinh phẩm, hŏng ênoh êbeh 470.000 Euro kơ ala čar Việt Nam hlăm bruă gang mkhư̆ klei ruă tưp. Khua kiă kriê IAEA pah mni Việt Nam dưi mgơ̆ng asei hlăm êpul hgŭm khua kiă kriê IAEA wưng thŭn 2021-2023 lehanăn hmăng hmưi Việt Nam lŏ đru mguôp kơ IAEA. Khua bruă kƀĭn ala Vương Đình Huệ lač kơ IAEA kah mbha klei thâo, đru bi kluôm ênŭm klei bhiăn ala čar lehanăn dưn yua pui kmlă nguyên tử čiăng mđĭ kyar bruă duh mkra, nao mbĭt hŏng bruă răng mgang wăl hdĭp mda lehanăn bi mdrơ̆ng hŏng klei mlih yan adiê, đru Việt Nam ba jao kdrăp mrâo mrang, mtô mjuăt, mđĭ klei thâo kơ bruă dưi yua klei mrâo mrang hạt nhân hlăm bruă mdrao mgŭn, gang mkhư̆ klei ruă tưp Covid-19.

Pô mblang: Y-Ƀel Êban